ཐེའི་དབན་སྲིད་འཛིན་ཟུར་པས་རྒྱ་གཞུང་ལ་ཉེན་བརྡ།

༄༅༎ཐེའི་དབན་སྲིད་གཞུང་གིས་རྒྱ་ནག་གཞུང་དང་ཚོང་འབྲེལ་ཡར་རྒྱས་གཏོང་བ་ནི་རྒྱ་ནག་གུང་གྲན་ཏང་གིས་སྲིད་གཞུང་གིས་ཐེའི་དབན་ལ་བཏང་འཛིན་ཇེ་ཆེར་གཏོང་རྒྱུའི་གོ་སྐབས་སྐྲུན་པ་ཡིན་ལུགས་ཐེའི་དབན་སྲིད་འཛིན་ཟུར་པ་ལི་ཏང་ཧུའི་ཡིས་གསུངས་གནང་འདུག

ཐེའི་དབན་རང་བཙན་ལ་རྒྱབ་སྐྱོར་གནང་མཁན་སྲིད་འཛིན་ཟུར་པ་ལི་ཏེང་ཧུའི་ཡིས་ཁོང་གི་ཕྱོགས་གཏོགས་པ་ཁག་ཅིག་ལ་གསུང་བཤད་གནང་སྐབས་ད་ཡོད་སྲིད་གཞུང་གིས་རྒྱ་ནག་ལ་ཚོང་འབྲེལ་གཞི་རྒྱ་ཇེ་ཆེར་གཏོང་བཞིན་པ་དེས་ཐེའི་དབན་རྒྱ་ནག་གི་མངའ་འོག་ཅིག་ཏུ་འགྱུར་ཉེན་ཡོད་པའི་སྐྱོན་བརྗོད་གནང་འདུག

དེ་ནི་རྒྱ་ནག་སྐམ་ས་ཆེན་མོ་དབུས་གཞུང་དང་ཐེའི་དབན་ས་གནས་སྲིད་གཞུང་ཞིག་ཏུ་འགྱུར་ཉེན་ཡོད་པ་དང་མཐར་ཐུག་ཐེའི་དབན་རྒྱ་ནག་གཞུང་གིས་བཀའ་བཀོད་འོག་ཚུད་ཉེན་ཡོད་པ་སོགས་ཀྱི་ཉེན་བརྡར་བཏང་གནང་འདུག དེང་ཐེའི་དབན་དང་རྒྱ་ནག་གཉིས་དབར་ཚོང་འབྲེལ་ཡར་རྒྱས་གཏོང་རྒྱུའི་གྲོས་མཐུན་ཡིག་ཆ་གཏན་འབེབས་བྱེད་བཞིན་པ་ཡིན་ཞིང་ཉེ་ལམ་རྒྱ་ནག་གཞུང་གིས་ ཐེའི་དབན་ནས་དངོས་ཟོག་མ་གནས་ཨ་སྒོར་ཐེར་འབུམ་གཉིས་ཙམ་ནང་འདྲེན་བྱ་རྒྱུའི་མངགས་ཆ་བྱས་ཡོད་པ་རེད། ཐེའི་དབན་སྲིད་གཞུང་གིས་རྒྱ་ནག་དང་ཚོང་འབྲེལ་བྱེད་བཞིན་པར་འགག་པ་གནང་གི་མེད་ཀྱང་ཐེའི་དབན་ལོགས་སུ་རྒྱལ་ཁབ་ཅིག་ཡིན་པའི་བདག་དབང་གནས་བབ་རྒྱུན་གནས་བྱ་རྒྱུ་ཤིན་ཏུ་གལ་འགངས་ཆེན་པོ་ཡིན་པར་སྲིད་འཛིན་ཟུར་པ་ལི་ཏེང་ཧུའི་ཡིས་གསུངས་གནང་ཡོད་པ་རེད། ད་ནི་ཐེའི་དབན་མི་མང་གིས་མནོ་བསམ་ཟབ་མོ་ཞིག་གཏོང་དགོས་པའི་དུས་ལ་བབས་ཤིང་དཔལ་འབྱོར་ཁེ་ཕན་ཆེད་དུ་རང་གི་བླ་སྲོག་བློས་གཏོང་བྱེད་མི་རུང་ཞེས་སྲིད་འཛིན་ཟུར་པ་ལི་ཏང་ཧུའི་ཡིས་སློབ་གསོ་གནང་འདུག

ཕྱི་ལོ་༡༩༨༨ནས་༢༠༠༠ལོ་བར་ལི་ཏེང་ཧུའི་ཡིས་སྲིད་འཛིན་ལས་གནས་བཟུང་སྐབས་ཁོང་གིས་རང་བཙན་དོན་གཉེར་གྱི་ལས་དོན་མང་པོ་གནང་ཡོད་པར་བརྟེན་རྒྱ་ནག་གཞུང་གིས་ཁོང་ཁ་བྲལ་བ་ཡིན་པའི་སྐྱོན་འཛུགས་གནང་ཡོད་པ་རེད།

ཉེ་ལམ་ཐེའི་དབན་དང་རྒྱ་ནག་གཉིས་ཀྱི་འབྲེལ་ལམ་བཟང་དུ་ཕྱིན་ཏེ་ཕར་ཚུར་འགྲུལ་བཞུད་གནམ་གྲུ་གཏོང་འགོ་བཙུགས་ཡོད་པ་མ་ཟད་སྲིད་འཛིན་མ་ཡིན་འཇུ་ཡིས་སྔར་ལོ་སྲིད་འཛིན་ལས་གནས་བཟུང་བ་ནས་བཟུང་ཚོང་འབྲེལ་སོགས་ཕྱོགས་གང་ཐད་འབྲེལ་ལམ་བཟང་དུ་བཏང་ཡོད་པ་རེད༎