བོད་ཀྱི་གློག་བརྙན་ལ་དགའ་མོས་ཆེ་ཤོས་བྱུང་བ།

༄༅༎བོད་པའི་གློག་བརྙན་སྤྲིན་པའི་རྒྱབ་ཀྱི་ཉི་མ་ཞེས་པ་དེ་ཨ་རིའི་པམ་སི་པི་རིང་(Palm Springs)ཞེས་པའི་རྒྱལ་སྤྱིའི་གློག་བརྙན་གྱི་དུས་སྟོན་དེར་གློག་བརྙན་གཟིགས་མཁན་རྣམས་ཀྱིས་དགའ་མོས་ཆེ་ཤོས་གནང་ཡོད་པ་རེད་

རྒྱ་ནག་གཞུང་འབྲེལ་ཤིང་ཧ་གསར་འགྱུར་ལས་ཁང་གིས་ཕྱི་ཚེས་༦ཉིན་གནས་ཚུལ་ཞིག་སྤེལ་བའི་ནང་གོང་ཞུས་གློག་བརྙན་གྱི་དུས་སྟོན་དེར་རྒྱ་མིའི་གློག་བརྙན་གཉིས་ཕྱིར་འཐེན་བྱས་ཡོད་སྐོར་གནས་ཚུལ་བཏོན་ཡང་དོན་དངོས་ཐོག་རྒྱ་གཞུང་གིས་དུས་སྟོན་གོ་སྒྲིག་གནང་མཁན་རྣམས་ལ་བོད་པའི་གློག་བརྙན་དེ་དུས་སྟོན་ནས་ཕྱིར་འཐེན་བྱེད་དགོས་པའི་གནོན་ཤུགས་དེ་ལམ་ལྷོང་མ་བྱུང་བའི་རྗེས་གོང་ཞུས་རྒྱ་མིའི་གློག་བརྙན་གཉིས་པོ་དེ་དག་དུས་སྟོན་དེ་ནས་ཕྱིར་འཐེན་མི་བྱེད་ཀ་མེད་བྱུང་ཡོད་པ་རེད་ གནད་དོན་དེའི་སྐོར་ལ་དུས་སྟོན་དེ་གོ་སྒྲིག་སྒྲིག་འཛུགས་ཀྱི་འགན་འཛིན་སྐུ་ཞབས་ཌེ་རིལ་མེཀ་ཌོ་ནལ་ཌི་(Darryl Macdonald)ཡིས་རྒྱ་གཞུང་གི་མི་སྣས་སྤྲིན་པའི་རྒྱབ་ཀྱི་ཉི་མ་ཞེས་པའི་གློག་བརྙན་དེ་དུས་སྟོན་གྱི་གློག་བརྙན་འགྲན་བསྡུར་ནས་ཕྱིར་འཐེན་བྱེད་དགོས་པའི་ཞུ་སྐུལ་དེར་ང་ཚོས་ངོས་ལེན་བྱས་མེད་ཅེས་གསུང་པ་ཨ་རིའི་སི་ཁི་རིན་ཌེ་ལི་(Screen Daily)ཞེས་པའི་གསར་ཤོག་དེས་ལུང་འདྲེན་གནང་ཡོད་པ་རེད་ སྤྲིན་པའི་རྒྱབ་ཀྱི་ཉི་མ་ཞེས་པའི་གློག་བརྙན་དེའི་ནང་བོད་ཀྱི་དབུ་འཁྲིད་༸གོང་ས་ཏ་ལའི་བླ་མ་མཆོག་དང་བོད་མི་མང་གི་དལྟའི་རང་དབང་གི་འཐབ་རྩོད་དེར་འཛམ་གླིང་ནང་གི་སྟོབས་ཆེ་ཤོས་ཀྱི་རྒྱལ་ཁབ་ཅིག་གིས་ཡ་ང་སྙིང་རྗེ་སྤུ་ཙམ་མེད་པར་དྲག་གནོན་བྱས་དང་བྱེད་བཞིན་པའི་སྐོར་གྱི་གློག་བརྙན་ཞིག་ཡིན་པ་རེད་ གློག་བརྙན་དེ་ཕྱི་ལོ་༢༠༠༨ལོར་བོད་རྒྱལ་ཡོངས་ཐོག་ཞི་རྒོལ་བྱུང་བའི་བརྒྱུད་རིམ་དང་དེར་རྒྱ་ནག་གུང་བྲན་གཞུང་གིས་དྲག་གནོན་གྱི་ལན་འདེབས་ཇི་བྱས་དང་ཕྱི་ལོ་༢༠༠༨ལོའི་འཛམ་གླིང་ཨོ་ལོམ་པིཀ་རྩེད་འགྲན་དེར་རྒྱལ་སྤྱིའི་ཐོག་ནས་ཚོར་སྣང་ལན་འཆར་དང་བོད་རྒྱའི་བར་གྱི་ཞི་མོལ་དེ་མཚམས་འཇོག་བྱུང་བའི་སྐོར་སྟོན་གནང་ཡོད་པ་རེད་ གློག་བརྙན་དེ་དབྱིན་ཡུལ་ནང་བཞུགས་མཁན་བོད་རིགས་བསྟན་འཛིན་བསོད་ནམས་ལགས་དང་ཁོང་གི་སྐུ་ཟླ་རི་ཏུ་ས་རིན་(Ritu Sarin)རྣམ་གཉིས་ཀྱིས་བཟོས་གནང་ཡོད་པ་རེད་            པམ་སི་པི་རིང་(Palm Springs)ཞེས་པའི་རྒྱལ་སྤྱིའི་གློག་བརྙན་གྱི་དུས་སྟོན་དེ་མཚན་སྙན་ཆེ་བའི་གློག་བརྙན་གྱི་དུས་སྟོན་ཞིག་ཡིན་པ་དང་དེ་ཨ་རིའི་ནུབ་ཕྱོགས་ཀེ་ལི་ཕོར་ནི་ཡའི་མངའ་སྡེའི་ནང་སྲུང་བརྩི་ཞུས་ཡོད་པ་རེད་