རྒྱ་གར་ལྷོ་ཕྱོགས་སུ་བོད་དོན་གོ་རྟོགས་ཀྱི་འགྲེམས་སྟོན་ཞིག་འཚོག་བཞིན་པ།

རྒྱ་གར་ལྷོ་ཕྱོགས་མངའ་སྡེ་ཀཱ་ན་ཀྲ་ཀའི་མཱེའེ་སོར་གྲོང་ཁྱེར་ནང་རྟེན་གཞི་བྱས་པའི་གཞན་ཕན་ཐེབས་རྩ་ཁང་ནས་ལོ་ལྟར་ལོ་གསར་མ་སླེབས་གོང་། མཱེ་སོར་གྲོང་ཁྱེར་གྱི་ (Nexus Centre City) ནེཀ་ས་སི་ཁྲོམ་རྭ་དང་མཉམ་འབྲེལ་གྱིས། རྒྱ་གར་ལྷོ་ཕྱོགས་བཅའ་སྡོད་རྒྱ་གར་བ་རྣམས་ལ་བོད་ཀྱི་རིག་གཞུང་འགྲེམས་སྟོན་སོགས་བརྒྱུད་བོད་དོན་གོ་རྟོགས་སྤེལ་གྱི་ཡོད་པ་བཞིན། འདི་ལོའི་ཟླ་ ༢ ཚེས་ ༡༩ ནས་ ༢༣ བར་ཉིན་གྲངས་ ༥ རིང་བོད་དོན་གོ་རྟོགས་ཀྱི་འགྲེམས་སྟོན་དེ་བཞིན་འཚོག་བཞིན་ཡོད་པ་རེད་འདུག

རྒྱ་གར་ལྷོ་ཕྱོགས་མཱེ་སོར་གྲོང་ཁྱེར་གྱི་ (Nexus Centre City) ཁྲོམ་རྭ་དེ་ནི་མཱེའེ་སོར་གྲོང་ཁྱེར་ནང་གི་ཁྲོམ་རྭ་ཆེ་ཤོས་གྲས་ཤིག་རེད་འདུག་པ་དང་། ཁྲོམ་རྭ་དེའི་ནང་ལོ་ལྟར་བོད་དོན་གོ་རྟོགས་ཀྱི་འགྲེམས་སྟོན་གོ་སྒྲིག་ཞུས་པ་དེས། གཙོ་བོ་ཁུལ་དེར་གནས་སྡོད་རྒྱ་གར་ཡུལ་མི་གཙོ་བོར་གྱུར་བའི་ས་ཕྱོགས་གང་ས་ནས་ཕེབས་པའི་ཕྱི་རྒྱལ་ཡུལ་གྲུ་ཁག་གི་མི་རིགས་མང་དག་ཅིག་ལ་བོད་ཀྱི་ཆོས་དང་རིག་གཞུང་ངོ་བོ་སོགས་ཀྱི་གོ་རྟོགས་ཆེད་དུ་དམིགས་བཞིན་ཡོད་པ་དང་།  འདི་ལོའི་འགྲེམས་སྟོན་སྐབས་ལོ་གསར་པའི་དགའ་སྤྲོའི་རྣམ་པ་མ་ཡིན་པར་འགྲེམས་སྟོན་ཁོ་ནའི་རྣམ་པའི་ཐོག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་རྩོམ་ཁག་གཅིག་དང་། བོད་མདོ་དབུས་ཁམས་གསུམ་གྱི་ཆས་གོས་དང་ལོ་གསར་གྱི་ཁ་ཟས། དེ་བཞིན་བོད་ཀྱི་ཐོན་རྫས་སྣ་མང་འགྲེམས་སྟོན་བརྒྱུད་བོད་ཀྱི་ལོ་གསར་ངོ་སྤྲོད་དང་བོད་དོན་གོ་རྟོགས་སྤེལ་བཞིན་ཡོད་ཅེས།  རྒྱ་གར་ལྷོ་ཕྱོགས་གཞན་ཕན་ཐེབས་རྩ་ཁང་གི་ལས་འཆར་འགན་འཛིན་བསོད་ནམས་ཕུན་ཚོགས་ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

བསོད་ནམས་ཕུན་ཚོགས་ལགས་ཀྱིས་མུ་མཐུད་གསུངས་དོན་ལ། ལོ་ལྟར་བོད་ཀྱི་ལོ་གསར་མ་ཚེས་གོང་དུ་མཱེའེ་སོར་གྲོང་ཁྱེར་གྱི་ (Nexus Centre City) ཁྲོམ་རྭར་འཚོག་བཞིན་པའི་བོད་དོན་གོ་རྟོགས་ཀྱི་འགྲེམས་སྟོན་དེར། རྒྱ་གར་བ་གཙོས་པའི་ཕྱི་རྒྱལ་ཡུལ་མི་རྣམས་ནས་དགའ་མོས་ཆེན་པོ་གནང་གི་ཡོད་ཅིང་། ཁྲོམ་རྭ་གཞན་ཁག་གཅིག་ནས་ཀྱང་མཉམ་ལས་ཀྱིས་བོད་དོན་འགྲེམས་སྟོན་གོ་སྒྲིག་ཞུ་རྒྱུའི་ཐད་འདུན་པ་ཆེན་པོ་སྟོན་གྱི་ཡོད་པ་སོགས། ས་གནས་ནས་འགྲེམས་སྟོན་དེར་རྒྱབ་སྐྱོར་ཆེན་པོ་གནང་གི་ཡོད་སྐོར་དང་། ཐེངས་འདིའི་བོད་དོན་གོ་རྟོགས་ཀྱི་འགྲེམས་སྟོན་དེ་བཞིན་ཐེངས་གསུམ་པ་དང་སྤུས་དག་ཤོས་ཤིག་ཆགས་ཀྱི་ཡོད་པ་འགྲེལ་བརྗོད་གནང་གི་འདུག

གཞན་ཡང་ཉིན་ལྔའི་རིང་(Nexus Centre City)ནེཀ་ས་སི་ཁྲོམ་རྭའི་ནང་དུ་འཚོག་བཞིན་པའི་བོད་དོན་འགྲེམས་སྟོན་སྐབས། ཁྲོམ་རྭ་དེའི་ནང་གི་མིང་རྟགས་ཅན་གྱི་ཚོང་ཁང་ ༤༧ ལྷག་ནས་རང་ཉིད་ཀྱི་ཚོང་ཟོག་རྣམས་བོད་ཀྱི་ལོ་གསར་དང་བསྟུན་རིན་གོང་ཆག་ཡང་གཏོང་བཞིན་ཡོད་པ་རེད་འདུག

གཞན་ཕན་ཐེབས་རྩ་ཁང་ནི་ཕྱི་ལོ་ ༢༠༢༠ ལོར་བོད་པའི་འཕྲོད་བསྟེན་དང་ཤེས་ཡོན། སྤྱི་ཚོགས་ཞབས་ཞུ་བཅས་ལ་ཆེད་དམིགས་ཀྱིས་གསར་འཛུགས་གནང་བ་ཞིག་ཡིན་འདུག་ཅིང་། ཐེབས་རྩ་ཁང་དེས་མེའེ་སོར་གྲོང་ཁྱེར་དུ་མཐོ་སློབ་འགྲིམ་བཞིན་པའི་བོད་རིགས་སློབ་ཕྲུག་དང་གཞོན་སྐྱེས་རྣམས་ལ་བོད་ཀྱི་སྡོད་ཁང་གསར་འཛུགས་དང་། རྒྱ་གར་དང་བོད་པའི་སློབ་ཕྲུག་དབར་འབྲེལ་ལམ་ཡར་རྒྱས། མིའི་སྤྱི་ཚོགས་སུ་བཟང་སྤྱོད་ཀྱི་ལམ་ནས་མདུན་ལམ་འཚོལ་སྟངས། ན་གཞོན་དབར་ཤེས་ཡོན་བརྗེ་རེས་ཀྱི་འབྲེལ་ལམ་འཛིན་ཚུལ་སོགས། རྒྱ་གར་དང་བོད་མིའི་སྤྱི་ཚོགས་ནང་གཞན་ཕན་དང་བཟང་སྤྱོད་ཀྱི་གནས་ཚུལ་དང་འབྲེལ་བའི་ལས་དོན་གྲུབ་བཞིན་ཡོད་པ་རེད་འདུག

གསར་འགོད་པ། བདེ་ཆེན་དབང་མོ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བསྟན་འཛིན་བསྟན་སྐྱོང་།