ལྷོ་ཨཕ་རི་ཀའི་ཁྲིམས་ཁང་ནས་ཐག་གཅོད་གསལ་བསྒྲགས།

༄༅༎སྔ་ལོ་ལྷོ་ཨཕ་རི་ཀ་གཞུང་གིས་༧གོང་མཆོག་ལ་ཡུལ་དེར་ཆིབས་བསྒྱུར་གནང་རྒྱུའི་ཐོངས་མཆན་ཕྱག་འཁྱེར་མ་ཕུལ་བ་དེའི་ཐད། ཡུལ་དེའི་ཕྱོགས་འགལ་ཆབ་སྲིད་ཚོགས་པ་གཉིས་ཀྱིས་ཁྲིམས་གཏུགས་བྱས་པ་དེ་ནི། རྒྱུ་མཚན་ལྡན་པ་ཞིག་ཆགས་ཀྱི་མི་འདུག་ཅེས་ཡུལ་དེའི་ཁྲིམས་ཁང་ཞིག་གིས་གསལ་བསྒྲགས་གནང་འདུག 
དེ་ཡང་ལྷོ་ཨཕ་རི་ཀའི་གྲོང་ཁྱེར་ཁེཔ་ཀྲའོན་ནང་རྟེན་གཞི་བྱས་པའི་མཐོ་རིམ་ཁྲིམས་ཁང་དེ་ཡིས་ཐག་གཅོད་གསལ་བསྒྲགས་གནང་བའི་ནང༌། ཏྭ་ལའི་བླ་མ་རྒྱལ་ཁབ་འདིའི་ནང་ཕེབས་མ་ཐུབ་པ་དེ་ནི། ཁོང་རང་ཉིད་ཀྱིས་ཐོངས་མཆན་ལག་འཁྱེར་ཞུ་བའི་སྙན་ཞུ་ཕྱིར་འཐེན་བྱས་པ་ལས་བྱུང་བ་ཞིག་ཡིན་པར་བརྟེན། གཞུང་གིས་ཁོང་ལ་ཐོངས་མཆན་མ་ཕུལ་བ་རེད་ཅེས་པའི་གྱོད་འཛུགས་དེ་རྒྱུ་མཚན་ལྡན་པ་ཆགས་ཀྱི་མེད་སྐོར་གསུངས་འདུག་ཀྱང༌། ལྷོ་ཨཕ་རི་ཀའི་ཕྱོགས་འགལ་ཨིན་ཀ་ཐ་རང་དབང་ཆབ་སྲིད་ཚོགས་པས་ཁྲིམས་ཁང་གི་ཐག་གཅོད་དེའི་ཐོག་ལན་འདེབས་ཀྱི་བསྒྲགས་གཏམ་ཤིག་སྤེལ་བའི་ནང༌། ཨཕ་རི་ཀ་གཞུང་གིས་རྒྱལ་སྤྱིའི་སྤྱི་ཚོགས་ཡོངས་རྫོགས་ཧ་ལས་ཧང་སང་དགོས་པའི་མ་དྲང་བའི་བྱ་སྤྱོད་ཞིག་སྤེལ་ཡོད་པ་དེ། ད་ལམ་ཡུལ་འདིའི་མཐོ་རིམ་ཁྲིམས་ཁང་ཞིག་གིས་ཡོ་བསྲང་བྱེད་མ་ཐུབ་པ་དེའི་ཐོག དམངས་གཙོ་དང༌། རང་དབང༌། ཡ་རབས་བཟང་སྤྱོད་ཀྱི་བལྟ་ཚུལ་འཛིན་མཁན་འཛམ་གླིང་མི་མང་གིས་མཐོང་ཚུལ་ག་འདྲ་ཞིག་ཡོང་གི་རེད་དམ། མི་ཚང་མས་དྲང་པོ་མ་བྱུང་བར་ངོས་འཛིན་བྱེད་པའི་ནོར་འཁྲུལ་དེ། ད་ལམ་ཁྲིམས་ཁང་གིས་ཡོ་བསྲང་བྱེད་མ་ཐུབ་པ་དེ་ཡིས། ང་ཚོའི་གཞུང་འཛིན་ལམ་ལུགས་ལ་སྐྱོན་ཆ་ཆེན་པོ་ཡོད་པ་གསལ་སྟོན་བྱས་པ་རེད་ཅེས་གསུངས་འདུག།