༸གོང་ས་མཆོག་ལ་སྲིད་སྐྱོང་སྤེན་པ་ཚེ་རིང་ལགས་མཇལ་བཅར་དང་འབྲེལ། ཉེ་ཆར་བྱང་ཨ་མི་རི་ཀ་དང་ཡོ་རོབ་བཅས་སུ་སྲིད་སྐྱོང་གིས་གཞུང་འབྲེལ་ཕྱོགས་བསྐྱོད་ཀྱི་སྐོར་སྙན་སྒྲོན་ཕུལ་པ།

ཉེ་ལམ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས། ཡོ་རོབ་ཀྱི་འཇར་མན་རྒྱལ་ཁབ་དང་བྱང་ཨ་མི་རི་ཀའི་ནང་གཞུང་འབྲེལ་ཕྱོགས་བསྐྱོད་གནང་བའི་སྐོར། སྤྱི་ཟླ་༥པའི་ཚེས་༡༥ཉིན་བཞུགས་སྒར་ཕོ་བྲང་དུ། ༧གོང་ས་མཆོག་ལ་སྲིད་སྐྱོང་སྤེན་པ་ཚེ་རིང་མཇལ་བཅར་དང་འབྲེལ་སྙན་སེང་ཕུལ་ཡོད་པ།༧གོང་ས་མཆོག་གི་མཇལ་ཁ་གྲུབ་རྗེས་སྲིད་སྐྱོང་སྤེན་པ་ཚེ་རིང་ནས་འགྲེལ་བརྗོད་གནང་གི་འདུག གཞན་ཡང་སྲིད་སྐྱོང་སྤེན་པ་ཚེ་རིང་མཆོག་ནས་རིང་མིན་ཨ་མི་རི་ཀའི་གཞུང་གི་བོད་དོན་དམིགས་བསལ་འབྲེལ་མཐུད་པ། ལྕམ་Uzra་Zeyaལགས་བཞུགས་སྒར་དུ་འཚམས་གཟིགས་གནང་གི་ཡོད་པ་དེ། ཉི་མ་གཉིས་རིང་གི་མཛད་འཆར་ཡིན་པ་རིམ་པས་ལས་རིམ་ཁག་འབྱོར་ཡོང་གི་རེད་ཅེས་འགྲེལ་བརྗོད་གནང་གི་འདུག སྲིད་སྐྱོང་སྤེན་པ་ཚེ་རིང་ལགས་ནས་༧གོང་ས་མཆོག་ལ་ཡར་སྙན་སེང་ཞུ་དགོས་པ་ཆ་ཚང་ཞུས་གནང་ཡོད་པ་དང་། ༧གོང་ས་མཆོག་གིས་ཐུགས་དགྱེས་ཚོར་གནང་བ་འགྲེལ་བརྗོད་གནང་གི་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ནས་བཀའ་ཤག་སྐབས་བཅུ་དྲུག་པའི་ཐུགས་འགན་བཞེས་པ་ནས་བཟུང་། བོད་དོན་ཆབ་སྲིད་དང་འབྲེལ་བའི་ཕྱི་རྒྱལ་དུ་གཞུང་འབྲེལ་ཕྱོགས་བསྐྱོད་ཐོག་མ་དེ། ཡོ་རོབ་སུད་སིའི་རྒྱལ་ཁབ་ཀྱི་ནང་སྤྱི་ལོ་༢༠༢༡ལོར་ཕྱོགས་བསྐྱོད་གནང་ཡོད་པ་དང་། སྤྱི་ལོ་༢༠༢༢ལོའི་སྤྱི་ཟླ་༤ནང་གི་ཕྱི་རྒྱལ་དུ་ཕྱོགས་ཕེབས་གནང་བ་དེ་ནི། བྱང་ཨ་མི་རི་ཀ་ཁུལ་དུ་གཞུང་འབྲེལ་ཕྱོགས་བསྐྱོད་གནང་བ་ཐོག་མ་དེ་ཆགས་ཀྱི་ཡོད་ཅིང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་སྤྱི་ཟླ་༤པའི་ཚེས་༢༢ཉིན། ཡོ་རོབ་འཇར་མན་གྱི་གྲོང་ཁྱེར་Frankfurtནང་ཆེད་ཕེབས་ཀྱིས།ཉམས་ཞིབ་པ་དང་བོད་རིགས་ཚོགས་པ་ཁག། གསར་འགོད་པ་སོགས་ལ་མཇལ་འཕྲད་གནང་ཡོད་པ་བཞིན། སྤྱི་ཟླ་༤པའི་ཚེས་༢༥ནས་ཨ་མི་རི་ཀའི་གྲོས་ཚོགས་འོག་མའི་ཚོགས་གཙོ་ལྕམ་ནན་སི་ཕི་ལོ་སི་མཆོག་ནས་མགྲོན་འབོད་ལྟར། ཨ་མི་རི་ཀའི་ནང་ཕྱོགས་ཕེབས་ཀྱིས་ཨ་རིའི་བོད་དོན་དམིགས་བསལ་འབྲེལ་མཐུད་པ་དང་། ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན། ཨ་རིའི་གྲོས་ཚོགས་འཐུས་མི་དང་རྒྱ་རིགས་མང་གཙོ་དོན་གཉེར་བ་སོགས་ལ་མཇལ་འཕྲད་ཀྱིས་བོད་དོན་བཀའ་མོལ་གནང་ཡོད་ཅིང་། ཁེ་ཎ་ཊའི་ནང་དུའང་ཕྱི་འབྲེལ་ཚན་པ་དང་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་སོགས་ལ་ཕྱོགས་བསྐྱོད་མཇལ་མོལ་གནང་ཡོད་པ་རེད།