སྲིད་སྐྱོང་མཆོག་གིས་ཅེཀ་སྤྱི་མཐུན་རྒྱལ་ཁབ་ནང་བགྲོ་གླེང་གཏམ་བཤད།

སྲིད་སྐྱོང་མཆོག་གིས་ཅེཀ་སྤྱི་མཐུན་རྒྱལ་ཁབ་ནང་གནད་ཡོད་མི་སྣ་ཁག་ཅིག་དང་མཇལ་འཕྲད་དང་གཏམ་བཤད་སོགས་ཀྱི་མཛད་རིམ་སྤེལ་བཞིན་པ་རེད།
བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག ཟླ་འདིའི་སྤྱི་ཚེས་༡༣་ཉིན།  ཅེཀ་སྤྱི་མཐུན་རྒྱལ་ཁབ་ནང་ཆེད་ཕེབས་ཀྱིས། སྤྱི་ཚེས་༡༥་ཉིན། ཡུལ་དེའི་སྲིད་འཛིན་ཞིང་གཤེགས་སྐུ་ཞབས་(Vaclav Havel)་མཆོག་དང་༧གོང་ས་མཆོག་བར་ངོ་ཤེས་གྲོགས་པོ་ཆགས་དོན་སྐོར་གྱི་མཛད་རིམ་ཞིག་གོ་སྒྲིག་གནང་ཡོད་པ་དེའི་སྟེང་དུ་སྲིད་སྐྱོང་མཆོག་དང་གཞན་གཏམ་བཤད་གནང་མཁན་མི་སྣ་བཞི་ཡིས་གཏམ་བཤད་གནང་ཡོད་པ་བོད་རིགས་ཚོགས་པའི་ཚོགས་གཙོ་བསོད་ནམས་རྒྱ་མཚོ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ངོ་སྤྲོད་གནང་ཡོད།
ད་དུང་ཁོང་གིས་གསུངས་ན། དེའི་རྗེས་སྲིད་སྐྱོང་མཆོག་གིས་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་སྐུ་ཞབས་(Jiri Ruzicka)་མཆོག་དང་། ཡུལ་དེའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་སྐུ་ཞབས་(Přemysl Rabas)་མཆོག་ལྷན་ཞུགས་ཐོག་སྲིད་སྐྱོང་མཆོག་གིས་བོད་དོན་སྐོར་གཏམ་བཤད་གནང་རྒྱུ་ཡིན་འདུག་པ་དང་། དེ་ནས་སྲིད་སྐྱོང་མཆོག་གིས། གློག་རྡུལ་འཕྲུལ་ཆས་ཀྱིས་སོ་ལྟ་བྱེད་བཞིན་པའི་དུས་རབས་༢༡་དང་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཞེས་པའི་བརྗོད་གཞིའི་ཐོག་བགྲོ་གླེང་སོགས་གནང་རྒྱུ་ཡིན་འདུག
སྤྱི་ཚེས་༡༤་ཉིན་(Forum 2000)་འམ་གླེང་སྟེགས་ཕྱི་ལོ་༢༠༠༠་ཞེས་པའི་ཚོགས་འདུར་མཉམ་ཞུགས་གནང་ཡོད།
སྤྱི་ཚེས་༡༦་ཉིན་སྲིད་སྐྱོང་མཆོག་ཅེཀ་སྤྱི་མཐུན་རྒྱལ་ཁབ་ནས་བྷེལ་ཇམ་(Belguim)་ལ་ཕེབས་ཐོན་གནང་རྒྱུ་ཡིན་འདུག