སྲིད་སྐྱོང་མཆོག་གླེང་སྟེགས་ཕྱི་ལོ་༢༠༠༠་ཞེས་པར་ལྷན་ཞུགས་གནང་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཡོ་རོབ་ཀྱི་ཡུལ་གྲུ་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་(Prague)་ཏུ་(Forum 2000)་འམ་གླེང་སྟེགས་ཕྱི་ལོ་༢༠༠༠་ཞེས་པའི་ཚོགས་འདུ་དབྱེ་འབྱེད་ཀྱི་མཛད་སྒོར་ལྷན་ཞུགས་གནང་འདུག
གླེང་སྟེགས་ཕྱི་ལོ་༢༠༠༠་ཞེས་པ་ནི། ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་(Vaclav Havel)་མཆོག་ནས་༡༩༩༦་ལོར་གསར་བཙུགས་གནང་བའི་དགེ་རྩ་ཡིན་ཞིང་། ཚོགས་པ་དེས་ལོ་ལྟར་གླེང་སྟེགས་ཕྱི་ལོ་༢༠༠༠་ཞེས་རྒྱལ་སྤྱིའི་ལྷན་ཚོགས་གོ་སྒྲིག་ཞུ་བཞིན་པ་རེད།
ད་རེས་ཀྱི་ལྷན་ཚོགས་དེ་ཐེངས་༢༣་ཆགས་ཀྱི་ཡོད་པ་དང་། ཐེངས་འདིའི་ལྷན་ཚོགས་ནང་ (Prague)་གྲོང་ཁྱེར་གྱི་སྤྱི་ཁྱབ་དང་། སྐུ་ཞབས་(Havel)་མཆོག་གི་བུ་སྤུན་(Ivan Havel)་ དང་། ནོ་བེལ་རྩོམ་ཡིག་གཟེངས་རྟགས་བཞེས་མྱོང་ཡོད་པ་(Tawakkol Karman)་དང་། (NED)་ཞེས་ཨ་རིའི་དམངས་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་(Carl Gershman) དེ་བཞིན་ཡོ་རོབ་བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས་སོགས་ཁྱོན་མི་སྣ་༣༠༠་སྐོར་ཞིག་མཉམ་ཞུགས་གནང་ཡོད་པ་རེད།
སྲིད་སྐྱོང་བློ་བཟང་སེང་གེ་མཆོག་གིས་ཚེས་༡༣་ལྷན་ཚོགས་ཉིན་དང་པོའི་སྐབས། འགྲོ་བ་མིའི་ལས་དོན་གྱི་འགན་འཁྲི་ཞེས་པའི་བརྗོད་གཞི་དང་འབྲེལ་ནས་སྲིད་འཛིན་ཟུར་པ་(Vaclav Havel)་མཆོག་གི་འགྲོ་བ་མིའི་འགན་འཁྲི་ཞེས་པའི་ལྟ་གྲུབ་དང་། ལྟ་གྲུབ་དེས་དེང་གི་དུས་རབས་ནང་དམངས་གཙོ་དང་།  རང་དབང་འཐབ་རྩོད་ཐད་གནད་འགག་ཇི་ཆགས་སྐོར་གཏམ་བཤད་གནང་ཡོད་པ་རེད། སྲིད་སྐྱོང་མཆོག་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་(Prague)་ནང་ཉིན་གསུམ་བཞུགས་རིང་། གསར་འགྱུར་རྒྱུད་ལམ་ཁག་ལ་བཅར་འདྲིའི་ལས་རིམ་དང་ དེ་བཞིན་གནད་ཡོད་མི་སྣ་མཇལ་འཕྲད་ཀྱི་མཛད་འཆར་ཡོད་འདུག
(Prague)་ཁུལ་གྱི་མཛད་འཆར་གྲུབ་མཚམས་སྲིད་སྐྱོང་མཆོག་(Belgium)་གྱི་རྒྱལ་ས་(Brussels)་དུ་ཕེབས་ནས་ཡོ་རོབ་མཐུན་ཚོགས་ཀྱི་འཐུས་མི་གསར་པ་ཁག་གཅིག་མཇལ་འཕྲད་གནང་རྒྱུ་ཡིན་འདུག་པ་དང་། དེ་ནས་ཇར་མན་གྱི་གྲོང་ཁྱེར་(Frankfurt)་ཏུ་ (Schwarz Schilling Conference)་ཞེས་པའི་ལྷན་ཚོགས་སུ་བཅར་རྒྱུ་དང་། དེ་ནས་ཧྥ་རན་སུར་ཕེབས་རྒྱུ་ཡིན་འདུག