སྲིད་སྐྱོང་མཆོག་གིས་ཇར་མ་ནིའི་གྲོང་ཁྱེར་ཕེ་རེངྐ་ཕརྚ་ནང་ཕེབས་ནས་མཛད་རིམ་ཁག་སྐྱོང་བཞིན་པ།

ཕྱི་ཟླ་བཞི་པའི་ཚེས་༢༢ཉིན་གྱི་དགོང་དྲོ་སྲིད་སྐྱོང་མཆོག་ཇར་མ་ནིའི་གྲོང་ཁྱེར་ Frankfurt རུ་ཕེབས་འབྱོར་སྐབས། སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་། ལས་བྱེད་སྐལ་ལྡན་མཚོ་མོ་ལགས། ཇར་མ་ནིའི་བོད་རིགས་ཚོགས་པའི་ཚོགས་གཙོ་བསྟན་འཛིན་ཡེ་ཤེས་ལགས། Frankfurt བོད་རིགས་ཚོགས་པའི་ཚོགས་གཙོ་དབང་མོ་དཀར་མཚོ་ལགས། Frankfurt བོད་ཁང་གི་འབྲེལ་མཐུད་པ་བསྟན་འཛིན་ཐོས་བསམ་ལགས་དང་། དེ་བཞིན་ས་གནས་བོད་མི་དང་ བེལ་ཇམ་དང་སུད་སི་ཁུལ་གྱི་བོད་མི་རྣམས་ནས་ཕེབས་བསུའི་སྣེ་ལེན་གཟབ་རྒྱས་ཞུས་གནང་འདུག ཇར་མ་ནི་ནང་ཕེབས་བཞུགས་གནང་བའི་རིང་སྲིད་སྐྱོང་མཆོག་གི་མཛད་རིམ་ཁག་ནི། ཇར་མ་ནིའི་བསམ་མཛོད་བསྟི་གནས་ཁང་གི་ཉམས་ཞིབ་པ་རྣམས་དང་ལྷན་དུ་ཚོགས་འདུར་མཉམ་ཞུགས་གནང་རྒྱུ་མ་ཟད། ཇར་མ་ནིའི་གསར་འགོད་པ་ཁག་ཅིག་དང་མཇལ་འཕྲད། དེ་བཞིན་ཕྱི་ཚེས་༢༣ཉིན་སྲིད་སྐྱོང་མཆོག་གིས་ Frankfurt བོད་ཁང་དུ་ས་གནས་བོད་མི་མང་ཚོགས་དང་མཇལ་འཕྲད་གནང་རྒྱུའི་མཛད་རིམ་འདུག
སྲིད་སྐྱོང་མཆོག་དང་ལྷན་དུ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་དང་། སྲིད་སྐྱོང་སྐུ་སྒེར་གྱི་དྲུང་ཆེ་བསྟན་འཛིན་གསལ་སྒྲོན་ལགས་རྣམ་གཉིས་ཕེབས་ཡོད་པ་རེད། ཕྱི་ཚེས་༢༤ཉིན་སྲིད་སྐྱོང་མཆོག་ཇར་མ་ནིའི་གྲོང་ཁྱེར་ Frankfurt ནས་ཨ་རིའི་རྒྱལ་ས་ཝ་ཤིང་ཊོན་ཕྱོགས་སུ་ཕེབས་ཐོན་གྱིས་ཨ་རིའི་རྒྱལ་ས་ཝ་ཤིང་ཀྲོན་ནང་ཉིན་གྲངས་ལྔ་ལྷག་ཙམ་རིང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་་པེ་ལོ་སི་མཆོག་དང་ཕྱི་སྲིད་ལྷན་ཁང་དུ་ཨ་རིའི་བོད་དོན་དམིགས་གསལ་འབྲེལ་མཐུད་པ་སོགས་གནད་ཡོད་གཞུང་འབྲེལ་མི་སྣ་ཁག་དང་མཇལ་མོལ་གྱི་མཛད་རིམ་མང་པོ་ཞིག་ཡོད་པ་རེད། །
གསར་འགོད་པ། འཆི་མེད།
རྩོམ་སྒྲིག་པ། རིག་ལྡན་སྒྲོལ་མ།
དྲ་ཐོག་སྤེལ་མཁན། རྟ་མགྲིན་དབང་ཕྱུག