སྲིད་སྐྱོང་སྤེན་པ་ཚེ་རིང་མཆོག་ཀྲུ་ཀྲིང་བོད་མིའི་གཞིས་ཆགས་སུ་ཕེབས་སྐབས་ས་གནས་འགོ་འཛིན་གཙོས་མི་མང་རྣམས་ནས་ཕེབས་བསུ་གཟབ་རྒྱས་ཞུས་ཡོད་པ།
འདི་ཚེས་༥ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཨ་རུ་ནཱ་ཅལ་མངའ་སྡེའི་ནང་ཀྲུ་ཀྲིང་བོད་མིའི་གཞིས་ཆགས་སུ་ཕེབས་འབྱོར་བྱུང་ཡོད་ཅིང་། ཁུལ་དེར་མུ་མཐུད་འཚམས་གཟིགས་གནང་མུས་ཡིན་འདུག
Photo: RFA
ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་མངའ་སྡེའི་སྐུ་མགྲོན་དུ་མགྲོན་འབོད་ཞུས་པ་ལྟར། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་བྱང་ཤར་ཨ་རུ་ནཱ་ཅལ་དང་མེ་གྷ་ལ་ཡ་མངའ་སྡེའི་ཁུལ་གྱི་བོད་མིའི་གཞིས་ཆགས་ཁག་ཏུ་གཞུང་འབྲེལ་འཚམས་གཟིགས་གནང་བཞིན་པ་དང་། ད་རིང་ཕྱི་ཚེས་ ༥ ཉིན་གྱི་སྔ་དྲོ་སྲིད་སྐྱོང་སྤེན་པ་ཚེ་རིང་མཆོག་ཐད་འཕུར་གནམ་གྲུ་བརྒྱུད་ཀྲུ་ཀྲིང་བོད་མིའི་གཞིས་ཆགས་སུ་ཕེབས་འབྱོར་གནང་འདུག སྐབས་དེར་སྲིད་སྐྱོང་མཆོག་ལ་ཀྲུ་ཀྲིང་ས་གནས་འགོ་འཛིན་དང་། ངེས་གསང་མདོ་སྔགས་བྱང་ཆུབ་དར་རྒྱས་གླིང་དགོན་པའི་མཁན་པོ་དང་ས་གནས་ཀྱི་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་འདུག
སྲིད་སྐྱོང་མཆོག་གིས་ཀྲུ་ཀྲིང་གཞི་ཆགས་སུ་ས་གནས་འགོ་འཛིན་ལས་ཁུངས། འཕྲོད་བསྟེན་ཡན་ལག་སྨན་ཁང་། ས་གནས་རང་བདེན་ཚོགས་ཆུང་གི་ལས་ཁུངས། ཡན་ལག་སྨན་རྩིས་ཁང་བཅས་ལ་གཟིགས་སྐོར་གནང་འདུག
སྤྱིར་ཨ་རུ་ན་ཅལ་མངའ་ཁོངས་སུ་ཆགས་པའི་ཀྲུ་ཀྲིང་གཞིས་ཆགས་དེ་བཞིན་ཐོག་མར་རྒྱུན་རིང་པོ་ཞིག་ལ་ངེས་བརྟན་མེད་པར་གནས་ཡོད་པ་དང་ཕྱི་ལོ་ ༡༩༩༠ ལོར་ཏི་ཛུ་དར་རྒྱས་གླིང་ས་གནས་འགོ་འཛིན་འོག་གནས་འདུག ཡང་ཕྱི་ལོ་ ༢༠༡༣ ལོར་ཏི་ཛུ་གཞིས་ཆགས་ཁོངས་ནས་ལོགས་སུ་ས་གནས་འགོ་འཛིན་ཞིག་བསྐོ་གཞག་གནང་འདུག ད་ལྟ་ཀྲུ་ཀྲིང་གཞིས་ཆགས་ཁོངས་སུ་ཁ་འཐོར་ས་གནས་ ༡༧ ནང་ལ་བོད་མི་བཙན་བྱོལ་བ་ཁྱིམ་ཚང་༢༡༤ ཙམ་དང་མི་འབོར་ ༨༠༠ ཙམ་ཡོད་འདུག ཁུལ་དེའི་ནང་གནས་སྡོད་བྱེད་མཁན་བོད་མི་རྣམས་པདྨ་བཀོད། ཀོང་པོ། དག་པོ། རི་བོ་ཆེ་བཅས་ནས་བཙན་བྱོལ་དུ་ཕྱི་ལོ་ ༡༩༥༩ རྗེས་སུ་ཡོང་བ་དེ་འདྲ་ཡིན་པ་དང་། ཡང་བོད་མི་ཁག་ཅིག་ཕྱི་ལོ་ ༡༩༡༤ ལོར་བོད་དང་རྒྱ་གར་གྱི་ས་མཚམས་མེཀ་མོ་ཧན་ས་ཐིག(McMohan Line) ཞེས་པ་འཐེན་ནས་བོད་ས་མ་ཤོར་གོང་ནས་ཁུལ་དེར་གནས་སྡོད་བྱེད་མཁན་ཡང་ཁག་ཅིག་བྱུང་འདུག ཀྲུ་ཀྲིང་ས་གནས་ནི་བོད་མིའི་སྒྲིག་འཛུགས་ཀྱི་གཞིས་ཆགས་གཞན་དང་མི་འདྲ་བའི་གནས་སྟངས་དང་མཐུན་རྐྱེན་གང་ཅི་ཐོག་ནས་ཧ་ཅང་ཞན་པོ་ཡོད་པ་དང་། ཁོང་ཚོའི་འཚོ་བའི་རྟེན་གཞི་གཙོ་བོ་ནི་སྔ་མ་ཡིན་ན་སོ་ནམ་ཞིང་ལས་དང་ལམ་བཟོ་སོགས་རྒྱུགས་ནས་འཚོ་བ་སྐྱེལ་བཞིན་ཡོད་པ་དང་། ད་ཆ་བོད་མི་ཕལ་ཆེ་བ་ཟ་ཁང་དང་ཚོང་རྩག་རྩིག་གཉེར་བ་དང་གཞོན་སྐྱེས་རྣམས་ཕལ་ཆེ་བ་དང་ཞབས་དམག་སྒར་ནང་འཛུལ་ཞུགས་བྱེད་ཀྱི་འདུག
ཀྲུ་ཀྲིང་ས་གནས་སུ་བོད་པའི་སློབ་གྲྭ་མེད་པའི་རྐྱེན་གྱིས་ཕྲུ་གུ་ཚོ་ཤེས་ཡོན་གྱི་ཆེད་དུ་ཐག་རིང་བོད་པའི་སློབ་གྲྭ་ཁག་ཏུ་་བསྐྱོད་དགོས་ཀྱི་་ཡོད་ན་ཡང་དབུས་བོད་མིའི་སྒྲིག་འཛུགས་ཀྱི་ངོས་ནས་ས་ཁུལ་དེ་དག་གི་སློབ་ཕྲུག་ཚོར་སློབ་གྲྭའི་སློབ་ཡོན་དང་ལམ་གྲོན་སོགས་ཀྱི་ཐད་དམིགས་གསལ་ཆག་ཡང་གནང་བཞིན་པ་རེད།།
གསར་འགོད་པ། པ་སངས་ཚེ་རིང་།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲ་ཐོག་སྤེལ་མཁན། རྟ་མགྲིན་དབང་ཕྱུག
བལྟ་བཤེར་མང་ཤོས་བྱས་པའི་གནས་ཚུལ།
RFA
- བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་ཨ་རིར་གཞུང་འབྲེལ་ཕྱོགས་ཕེབས་དང་འབྲེལ་ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་དགོས་པའི་འབོད་སྐུལ་ཞུས་འདུག
- ཨ་རིའི་གཞུང་ངོས་ནས་རྒྱ་ནག་དང་ལྷན་ཚོང་འབྲེལ་གྲོས་མོལ་བྱས་ཚེ་རྒྱ་ནག་གིས་ཨ་རིའི་ཅ་དངོས་ཐོག་སྒོ་ཁྲལ་གུ་ཡངས་གཏང་རྒྱུ་ཡིན་པ་བརྗོད་འདུག
- རྒྱ་ནག་གཞུང་གི་བཀོད་བྱུས་འོག་གཞུང་འབྲེལ་མིན་པའི་ཚོགས་པས་མཉམ་འབྲེལ་རྒྱལ་ཚོགས་སུ་འགྲོ་བ་མིའི་ཐོབ་ཐང་གི་གནད་དོན་ཐད་ཐེ་བྱུས་བྱེད་བཞིན་ཡོད་སྐོར་སྙན་ཐོའི་གསར་པའི་ནང་གསལ་སྟོན།
- ༸གོང་ས་༸སྐྱབས་མགོན་ཆེན་པོའི་གསེར་ཁྲི་མངའ་གསོལ་མཛད་སྒོའི་སྐབས་ཀྱི་གནས་སྟངས་གསལ་བའི་ཆུ་ཚོན་རི་མོ་ངོ་མ་ ༤༠ ཚོང་སྒྱུར་གནང་རྒྱུ་རེད་འདུག
- ཌེ་ལྦེཌ་པར་ཌུ་ལགས་ཨ་རིའི་རྒྱ་ནག་གི་གཞུང་ཚབ་ཆེན་མོར་བསྐོ་གཞག་གནང་གཏན་འཁེལ་འདུག
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
- བཙན་བྱོལ་ནང་གི་མི་རབས་གཞོན་པ་རྣམས་ལ་བོད་ནང་གི་ཛ་དྲག་གནས་སྟངས་ངོ་སྤྲོད་བྱ་ཆེད། སྙིང་སྟོབས་ཀྱི་འབོད་སྒྲ ཅེས་པའི་གཏམ་བརྗོད་གཟིགས་འབུལ་ཞུ་བཞིན་འདུག
- བྱེས་ཀྱི་གདན་ས་བཀྲིས་ལྷུན་པོ་གཙོས་པའི་བོད་མི་གནས་སྡོད་ས་གནས་ཁག་ཏུ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་སྲུང་བརྩི་ཞུས།
- ༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་པ་ ༣༠༠ ལྷག་ལ་མང་མཇལ་སྩལ་བ།
- རྒྱ་ནག་དང་རྒྱ་གར་གཉིས་གྲོས་མོལ་གྱིས། རྒྱ་གར་གྱི་གནས་སྐོར་བ་རྣམས་བོད་ནང་གངས་རིན་པོ་ཆེར་གནས་མཇལ་དུ་བསྐྱོད་རྒྱུ་བསྐྱར་དུ་སྒོ་འབྱེད་རྒྱུ་རེད་འདུག
- ལྷོ་ཀོ་རི་ཡའི་མི་སྒེར་གྱི་གནས་ཚུལ་སྲུང་སྐྱོབ་ལྟ་ཞིབ་ཁང་གིས་ཌིབ་སིག་གིས་ལྷོ་ཀོ་རི་ཡའི་མི་ས་ཡ་༡.༥ཡི་གནས་ཚུལ་ཁྲིམས་འགལ་ཐོག་རྐུ་ཁྱེར་བྱེད་བཞིན་པ་གསལ་སྟོན་བྱས་འདུག