སྲིད་སྐྱོང་མཆོག་ནས་ལྕམ་ཨཛ་ར་ཛི་ཡ་དང་མཇལ་མོལ།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབྱིན་ཡུལ་ནང་གི་མཛད་རིམ་ཁག་ལེགས་པར་གྲུབ་རྗེས་ཕྱི་ཚེས་༢ཉིན་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨཛ་ར་ཛི་ཡ་(Uzra Zeya)མཆོག་དང་མཇལ་འཕྲད་གནང་ཞིང་།
འདི་ག་རླུང་འཕྲིན་ཁང་ནས་ཨ་རིའི་ཕྱི་སྲིད་དྲུང་ཆེ་སྐུ་ཞབས་ཨེན་ཐོ་ནི་ བི་ལིང་ཀིན་ Antony Blinken མཆོག་རྒྱ་ནག་ཏུ་རིང་མིན་ཕྱི་ཟླ་ ༢ ཚེས་ ༥ དང་ ༦ བཅས་ཉིན་གྲངས་གཉིས་རིང་གི་འཚམས་གཟིགས་གནང་གི་ཡོད་པ་དེའི་ཐོག་ལྕམ་ཨཛ་ར་ཛི་ཡ་(Uzra Zeya)མཆོག་དང་གླེང་སློང་བྱུང་ཡོད་མིན་སྐོར་བཀའ་འདྲི་ཞུས་སྐབས་སྲིད་སྐྱོང་མཆོག་གིས་གནད་དོན་འདིའི་ཐོག་དམིགས་བསལ་གྲོས་བསྡུར་བྱུང་མེད་པ་འགྲེལ་བརྗོད་གནང་བྱུང་།
སྲིད་སྐྱོང་སྤེན་པ་ཚེ་རིང་མཆོག་ཨ་རི་དང་དེ་བཞིན་ཁེ་ཎ་ཌ་གཉིས་ནང་གི་གཞུང་འབྲེལ་ཕྱོགས་ཕེབས་དབུ་འཛུགས་གནང་ཡོད་རེད། ཟླ་བ་འདིའི་ཚེས་༢ནས་༡༧བར་ཨ་རིའི་རྒྱལ་སའི་ནང་གནད་ཡོད་གཞུང་འབྲེལ་མི་སྣ་མཇལ་འཕྲད་དང་དེ་བཞིན་ཨ་རིའི་གྲོང་ཁྱེར་དགུ་ཙམ་གྱི་ནང་ས་གནས་བོད་རིགས་མང་ཚོགས་དང་ཐུག་འཕྲད་སོགས་གནང་རྒྱུ་ཡིན་འདུག
གཞི་རྩའི་སྲིད་སྐྱོང་སྤེན་པ་ཚེ་རིང་མཆོག་ཨ་མི་རི་ཀའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་(Nancy Pelosi)མཆོག་གིས་གཞུང་འབྲེལ་གྱི་མགྲོན་ཤོག་ཕུལ་བ་ལྟར་ཕྱི་ལོ་༢༠༢༢ཟླ་༤ནང་ཨ་མི་རི་ཀར་གཞུང་འབྲེལ་ཕྱོགས་བསྐྱོད་གནང་ཡོད་པ་དང་། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་དང་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨཛ་ར་ཛི་ཡ་(Uzra Zeya)མཆོག་རྣམ་གཉིས་དངོས་སུ་མཇལ་འཕྲད་ཐོག་མ་དེ་གནང་ཡོད་པ་རེད།
གསར་འགོད་པ། བསྟན་འཛིན་བདེ་སྐྱིད།
རྩོམ་སྒྲིག་པ། སྐལ་ལྡན་བློ་གྲོས།
དྲ་ཐོག་སྤེལ་མཁན། པ་སངས་དོན་ལྡན།