སྲིད་སྐྱོང་མཆོག་གི་ལས་འཁུར་ལོ་གསུམ་པའི་གཏམ་བཤད།

མངོན་འདོད་མ་བརྗེད་པའི་ཐོག་ནས་བཀའ་ཤག་སྐབས་༡༤པས་དཀའ་ལས་རྒྱག་རྒྱུར་མི་དམངས་ཀྱི་ཕྱར་གྲུ་མཉམ་འདེགས་དགོས་པ་གསུངས་འདུག
ཕྱི་ཟླ་༨ཚེས་༨ཉིན་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པའི་ལས་འཁུར་དམ་འབུལ་གནང་སྟེ་ལོ་གསུམ་ཧྲིལ་པོ་འཁོར་བ་དང་སྟབས་བསྟུན་མཆོད་འབུལ་སྨོན་ལམ་སྐབས་སྲིད་སྐྱོང་མཆོག་གིས་གསུང་བཤད་གནང་དོན། དེ་རིང་ང་ཚོ་འདི་གར་འཛོམས་ནས་མཆོད་འབུལ་སྨོན་ལམ་ཚོགས་དགོས་དོན་ནི། གཙོ་བོ་ཤ་ཁྲག་གཅིག་པའི་གཞིས་ལུས་བོད་རིགས་སྤུན་ཟླ་སྤྱི་དང་། ཡང་སྒོས་ད་བར་དུ་བོད་བསྟན་སྲིད་ཆེད་དུ་ཕྱི་ལོ་ཆིོག་སྟོང་དགུ་བརྒྱ་ལྔ༌བཅུ་ང་གྲངས་ནས་རང་སྲོག་བློས་གཏོང་གནང་མཁན་ཁོང་རྣམ་པས་དབུས་འབྲེལ་ཡོད་ནང་མི། དམིགས་བསལ་རང་ལུས་མེར་སྲེག་གཏོང་མཁན་༡༣༠བྱུང་ཡོད་ཁོངས་ནས་༡༡༢འདས་གྲོངས་སུ་གྱུར་བ་རྣམ་པའི་ནང་མི་སོགས་ཀྱི་ཆེད་དུ་མཆོད་འབུལ་སྨོན་ལམ་འཚོགས་བཞིན་ཡོད་ཙང་། ཚང་མས་ཐུགས་སྨོན་གནང་རོགས་ཞུ་རྒྱུ་ཡིན། དེ་བཞིན་རང་ལུས་མེར་སྲེག་གཏོང་མཁན་རྣམ་པས་གཙོས་དུས་ད་ལྟ་བར་དུ་བོད་བསྟན་སྲིད་ཆེད་དུ་སྐུ་ལས་སྐྱོན་མཁན་ཚོའི་མངོན་འདོད་༧གོང་ས་༧སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་རྒྱུ་དང་། བོད་མིར་རང་དབང་བསྐྱར་གསོ་དགོས་པ་རྣམས་ཆགས་ཡོད། ཁོང་རྣམ་པའི་མངོན་འདོད་མ་བརྗེད་པའི་ཐོག་ནས་བཀའ་ཤག་སྐབས་༡༤པས་དཀའ་ལས་རྒྱག་རྒྱུས་མཚོན་མི་དམངས་ནས་ཀྱང་ཕྱར་གྲུ་མཉམ་འདེགས་ཐོག་རྒྱབ་སྐྱོར་མུ་མཐུད་ནས་གནང་རོགས་ཞུ་རྒྱུ་ཡིན་ཞེས་གསུངས་འདུག
ཡང་སྲིད་སྐྱོང་མཆོག་གིས་དབུ་མའི་ལམ་གྱི་སྐོར་གསུང་དོན། སྤྱིར་བཏང་བཀའ་ཤག་སྐབས་ ༡༤པས་དབུ་མའི་ལམ་གྱི་གོ་རྟོགས་སྤེལ་ཆེད་ཕྱི་ཟླ་༦ཚེས་༥ ཉིན་གསར་འགོད་ལྷན་ཚོགས་ཤིག་སྐོང་ཚོགས་བྱས་པ་གཞིར་བཟུང་རྒྱལ་སྤྱིའི་ཐོག་སྙན་གྲགས་ཆེ་བའི་གསར་འགྱུར་བརྒྱུད་ལམ་ཁག་ཏུ་ཉེ་བའི་ལོ་རྒྱུས་ནང་ཁྱབ་བསྒྲགས་ཤུགས་ཆེ་ཤོས་ཕྱིན་ཡོད། དབུ་མའི་ལམ་གྱི་སྐོར་ལ་གོ་རྟོགས་སྤེལ་དགོས་དོན་ནི། ཕྱག་རོགས་བཀའ་བློན་རྣམ་པ་དང་གྲོས་ཚོགས་ཀྱི་ཚོགས་མི་རྣམ་པ། དེ་བཞིན་སྲིད་སྐྱོང་སོགས་ཕྱི་རྒྱལ་ཡུལ་གྲུ་ཁག་མང་དག་ཅིག་ནང་བསྐྱོད་སྐབས། མང་པོ་ཞིག་གིས་དབུ་མའི་ལམ་གྱི་སྐོར་ཤེས་ཀྱི་འདུག་ཀྱང་ཁག་གཅིག་གིས་ཤེས་ཀྱི་མི་འདུག ང་ཚོས་བློ་འཚབ་བྱེད་དགོས་དོན་ནི། དབུ་མའི་ལམ་ལ་གོ་བ་ལོག་པར་ལེན་པའི་ཐོག་ནས་འགྲེལ་བཤད་ལོག་པ་རྒྱག་མཁན་མང་པོ་ཞིག་ཡོང་གི་འདུག དེ་དག་ནི་རྒྱ་ནག་གཞུང་གིས་དབུ་མའི་ལམ་ལ་འགྲེལ་བཤད་ལོག་པ་བརྒྱབ་པར་བརྟེན་ནས་བྱུང་བ་ཞིག་ཆགས་ཡོད་སྟབས་ང་ཚོའི་ངོས་ནས་དབུ་མའི་ལམ་གང་འདྲ་ཞིག་ཡིན་མིན་གོ་རྟོགས་སྤེལ་བ་བརྒྱུད་ནས་ཤེས་པ་བཟོ་རྒྱུ་ཧ་ཅང་གལ་ཆེན་པོ་ཆགས་ཡོད། ལྷག་པར་དབུ་མའི་ལམ་གྱི་དྲ་རྒྱའི་ནང་བོད་རྒྱ་དབྱིན་གསུམ་གཙོ་བོར་གྱུར་བའི་ཇར་མན་དང་། ཕ་རན་སི། ཨི་ཊ་ལི།སེ་པན་བཅས་ཡིག་རིགས་ཁག་བདུན་ཐོག་ལྟ་ཐུབ་པ་བཟོས་ཡོད་པ་སོགས་གསུང་འདུག
གསར་འགོད་པ་ཚེ་བརྟན་རྡོ་རྗེ།