སྲིད་སྐྱོང་མཆོག་གིས་ཕིན་ལེནཌ་(Finland)ཡི་གཞུང་འཛིན་མི་སྣ་དང་གྲོས་ཚོགས་འཐུས་མི་སོགས་དང་མཇལ་འཕྲད་གནང་།

དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་Finland ཡི་རྒྱལ་ས་Helsinki ནང་གཞུང་འབྲེལ་འཚམས་གཟིགས་སུ་ཕེབས་ཏེ་Finlandགྱི་གཞུང་འཛིན་མི་སྣ་དང་གྲོས་ཚོགས་འཐུས་མི་སོགས་མཇལ་འཕྲད་གནང་སྟེ་ཉིན་གཅིག་གི་Finlandནང་གི་འཚམས་གཟིགས་ལེགས་པར་མཇུག་སྒྲིལ་གནང་འདུག དེ་ཡང་འདི་ག་རླུང་འཕྲིན་ཁང་ལ་དབྱིན་ཡུལ་བོད་ཀྱི་སྐུ་ཚབ་དོན་གཅོད་ཁང་གི་དྲུང་ཆེ་བློ་བཟང་ཆོས་སྒྲོན་ལགས་ཀྱིས་ངོ་སྤྲོད་གནང་དོན་ལ། སྲིད་སྐྱོང་སྤེན་པ་ཚེ་རིང་མཆོག་ཕྱི་ཟླ་དང་པོའི་ཚེས་༢༦རེས་གཟའ་པ་སངས་ཉིན་Finland རུ་ཕེབས་འབྱོར་གྱིས་Finland ནང་བོད་དོན་ལ་སྨན་པའི་ཕྱག་ལས་རྣམས་ལམ་ལྷོང་ལྡན་པ་བྱུང་ཡོད་པ་དང་། སྲིད་སྐྱོང་མཆོག་Finland  ནང་དུ་གཞུང་དོན་འཚམས་གཟིགས་གནང་བ་ཐེངས་དང་པོ་ཡིན་པ་རེད།

སྲིད་སྐྱོང་མཆོག་དང་དབྱིན་ཡུལ་བོད་ཀྱི་སྐུ་ཚབ་དོན་གཅོད་བསོད་རྣམས་ཕར་སི་ལགས་རྣམ་གཉིས་Finland གྱི་རྒྱལ་ས་Helsinki ནང་ཕེབས་འབྱོར་སྐབས་Finland ཡི་བོད་དོན་རྒྱབ་སྐྱོར་ཚོགས་པ་སྟེ་TSG ཡི་ཚོགས་གཙོ་Erja Varis ནས་དགའ་བསུ་ཞུས་གནང་བ་དང་། དེ་རྗེས་སྲིད་སྐྱོང་སྤེན་པ་ཚེ་རིང་མཆོག་ནས་འདི་གའི་གཞུང་གི་གནད་ཡོད་མི་སྣ། དེ་བཞིན་གྲོས་ཚོགས་འཐུས་མི་ལྕམ་སྐུ་ Inka Hopsu མཆོག་དང་། ལྕམ་སྐུ་ Maria Ohisalo མཆོག དེ་བཞིན་འབྲེལ་ཡོད་ཚོགས་སྡེ་དང་འགྲོ་བ་མིའི་ཐོབ་ཐང་ཚོགས་པའི་ལས་བྱེད་ཁག་ཅིག་དང་ཉམས་ཞིབ་པ་སོགས་ལྷན་དུ་མཇལ་མོལ་གནང་ཡོད་པ་རེད།    

སྲིད་སྐྱོང་སྤེན་པ་ཚེ་རིང་མཆོག་གིས་ཐོག་མར་ཕྱི་ཚེས་༢༥ ནས་ཕྱི་ཟླ་༢ཚེས་༡ བར་Estonia དང་Latvia, Lithuania བཅས་Baltic རྒྱ་མཚོ་ཁུལ་གྱི་རྒྱལ་ཁབ་གསུམ་དང།Finland བཅས་དང་། དེ་རྗེས་ཕྱི་ཟླ་གཉིས་པའི་ཚེས་༡ ནས་༣ བར་དབྱིན་ཡུལ་དུ་གཞུང་དོན་ཕྱོགས་ཕེབས་གནང་རྒྱུ་ཡིན་པ་རེད། སྲིད་སྐྱོང་མཆོག་དབྱིན་ཡུལ་ནང་ཕྱི་ཟླ་གཉིས་པའི་ཚེས་༡ ནས་༣ བར་འཚམས་གཟིགས་གནང་རྒྱུ་ཡིན་པ་དང་། གཙོ་བོ་Warwick Economic Summit འམ་Warwick དཔལ་འབྱོར་ལྷན་ཚོགས་ཀྱིས་གདན་ཞུ་ཕུལ་བ་ལྟར་Warwick གཙུག་ལག་སློབ་ཆེན་གྱི་ལོ་འཁོར་ལྷན་ཚོགས་སུ་བོད་དོན་སྐོར་གསུང་བཤད་གནང་རྒྱུ་དང་།

ད་དུང་སྲིད་སྐྱོང་མཆོག་གིས་དབྱིན་ཡུལ་ནང་གི་བོད་དོན་རྒྱབ་སྐྱོར་ཚོགས་པ་ཁག་དང་ཐུགས་འཕྲད་གནང་གི་ཡོད་པ་རེད།

དེ་རྗེས་སྲིད་སྐྱོང་མཆོག་Brussels དུ་ཕེབས་ཐོན་གྱིས་དེར་བོད་མི་རྣམས་དང་ཐུགས་འཕྲད་ཀྱི་མཛད་རིམ་གྲུབ་པའི་རྗེས་རྒྱ་གར་དུ་ཕྱིར་ཕེབས་གནང་སྟེ།རྒྱ་གར་ལྷོ་ཕྱོགས་Kollega དོན་ལྡན་གླིང་བོད་མིའི་གཞིས་ཆགས་བཙུགས་ནས་ལོ་ངོ་༥༠ འཁོར་བའི་མཛད་སྒོར་ཕེབས་འཆར་འདུག།

གསར་འགོད་པ། གཡུ་སྒྲོན།

རྩོམ་སྒྲིག་པ། ཚེ་བརྟན་རྣམ་རྒྱལ།

དྲྭ་ཐོག་སྤེལ་མཁན། པ་སངས་དོན་ལྡན།