སྲིད་སྐྱོང་མཆོག་འགན་འཛིན་ལྷན་ཚོགས་ཀྱི་ཚོགས་མིར་བསྐོ་གཞག

༄༅།    །དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་རྒྱ་གར་རྒྱལ་ཡོངས་སློབ་ཕྲུག་གྲོས་ཚོགས་ཞེས་པའི་སྒྲིག་འཛུགས་ཀྱི་འགན་འཛིན་ལྷན་ཚོགས་ཀྱི་ཚོགས་མིར་བསྐོ་གཞག་བྱུང་འདུག  དེ་ཡང་དབུས་བོད་མིའི་སྒྲིག་འཛུགས་ཀྱི་དྲ་ཚིགས་ཐོག་གནས་ཚུལ་སྤེལ་བར་གཞིགས་ན། རྒྱ་གར་གྱི་སྐད་ནང་ Bharatiya Chaatra Sansand འམ་རྒྱ་གར་རྒྱལ་ཡོངས་སློབ་ཕྲུག་གྲོས་ཚོགས་ཞེས་པའི་སྒྲིག་འཛུགས་དེ་བཞིན་ཕྱི་ལོ་ ༢༠༡༡ ལོར་སྐུ་ཞབས་ Rahul V Karad ཞེས་པས་ཆེད་འཛུགས་གནང་བ་ཞིག་ཡིན་པ་དང༌། སྒྲིག་འཛུགས་དེ་ཡིས་རྒྱ་གར་གྱི་ན་གཞོན་སློབ་ཕྲུག་ཚོའི་ནང་མང་གཙོའི་འགྲོ་ལུགས་ཀྱི་གོ་རྟོག་སྤེལ་བ་དང་ཆབས་ཅིག་གཞོན་སྐྱེས་ཚོས་ཆབ་སྲིད་ཚོགས་པ་ཁག་གི་ནང་འཛུལ་བཞུགས་ཀྱིས་སྤྱི་ཚོགས་ཀྱི་ཞབས་འདེགས་སྒྲུབ་དགོས་པའི་སྐུལ་སློང་གནང་མཁན་ཞིག་ཡིན་ཞིང༌། ད་ལྟའི་ཆར་སྒྲིག་འཛུགས་དེའི་འགན་འཛིན་ལྷན་ཚོགས་ཀྱི་ཚོགས་མིའི་ཁོངས་སུ་རྒྱ་གར་ནུབ་ཕྱོགས་ Gujurat མངའ་སྡེའི་རིག་རྩལ་དང་མཐོ་རིམ་ཤེས་ཡོན་བློན་ཆེན་སྐུ་ཞབས་ Raesh Tope དང༌། རྩེད་རིགས་དང་ན་གཞོན་ལས་དོན་བློན་ཆེན་སྐུ་ཞབས་ Padmakar Valvi། རྒྱ་གར་དབུས་འོས་བསྡུ་ལྷན་ཁང་གི་འགན་འཛིན་བཅུ་པ་སྐུ་ཞབས་ TN Seshan། མེས་པོ་དམ་པ་གྷན་དྷིའི་ཐེབས་རྩ་ཁང་གི་འགན་འཛིན་སྐུ་ཞབས་ Tushar Gandhi། རྒྱ་གར་སྲིད་བློན་ལས་ཁུངས་ཀྱི་དྲུང་ཆེ་ཟུར་པ་སྐུ་ཞབས་ Sudheendra Kulkarni། ཨིན་ཇིའི་སྦི་སྦི་སི་གསར་འགྱུར་ལས་ཁང་གི་གསར་འགོད་པ་ཟུར་པ་སྐུ་ཞབས་ Mark Tully བཅས་ཡོད་མུས་ཐོག་ད་ལམ་སྲིད་སྐྱོང་བློ་བཟང་སེང་གེ་མཆོག་བསྐོ་གཞག་གནང་ཡོད་པ་ དང༌། སྲིད་སྐྱོང་བློ་བཟང་སེང་གེ་མཆོག་གིས་འདི་ལོའི་ཕྱི་ཟླ་དང་པོའི་ནང་སྒྲིག་ འཛུགས་དེ་ཡི་རྒྱལ་ཡོངས་ཚོགས་ཆེན་ཐེངས་ལྔ་པ་རྒྱ་གར་གྲོང་ཁྱེར་ Pune ནང་སྐོང་འཚོགས་གནང་བའི་ཐོག་མིའི་སྤྱི་ཚོགས་ནང་ཆོས་ཀྱི་ཕན་ཐོགས་དང་གནོད་ཚབས་ཇི་འདྲ་བཟོ་ཡི་ཡོད་པའི་བརྗོད་གཞིའི་ཐོག་གསུང་བཤད་གནང་ཡོད་པ་རེད།

གསར་འགོད་པ་ངག་དབང་ཆོས་འཕེལ།