ཉེན་རྟོག་པས་མེ་མདའ་བརྒྱབ་ནས་བོད་མི་གཉིས་ལ་རྨས་སྐྱོན།

༄༅༎བོད་མདོ་ཁམས་དཀར་མཛེས་ཁུལ་གྱི་གསེར་རྟ་རྫོང་ཁོངས་ཁེ་སྐོར་ཤང་གི་རྒྱ་མིའི་ཉེན་རྟོག་པའི་ལས་ཁུངས་མདུན་ལ་ཕྱི་ཚེས་༡༦་ཉིན་བོད་མི་བདུན་གྱིས་རྒྱ་ནག་གཞུང་གི་བཙན་དབང་ལ་ངོ་རྒོལ་གནང་སྐབས་རྒྱ་མིའི་ཉེན་རྟོག་མི་སྣས་མེ་མདའ་བརྒྱབ་ནས་བོད་མི་གཉིས་ལ་རྨས་སྐྱོན་བཟོས་པ་མ་ཟད་ བོད་མི་འགའ་ཤས་འཇུ་བཟུང་བཀག་ཉར་བྱས་སྐོར་རྒྱ་གར་ལྷོ་ཕྱོཌ་རྣམ་གྲོལ་གླིང་ནས་ཚུལ་ཁྲིམས་ནོར་བུ་ལགས་ཀྱིས་གནས་ཚུལ་ངོ་སྤྲོད་གནང་འདུག ཁོང་གིས་མུ་མཐུད་ནས་གསུངས་དོན་ལྟར་ན་འདི་ཟླའི་ཚེས་༡༥་སྟེ་གཟའ་སྤེན་པའི་ཉིན་གསེར་རྟ་ཁེ་སྐོར་ཤང་ཐོག་བོད་ཀྱི་རྒྱལ་དར་འཕྱར་ནས་རྒྱ་ནག་གཞུང་ལ་ངོ་རྒོལ་གྱི་འབོད་ཚིག་འཁོད་པའི་ཡིག་ཆ་མང་པོ་ཁེ་སྐོར་ཤང་ནང་ཐོན་འདུག་ལ་ ཡང་ཕྱི་ཚེས་༡༦ཉིན་བོད་མི་བདུན་གྱིས་ཁེ་སྐོར་ཤང་རྒྱ་ནག་གཞུང་གི་ཉེན་རྟོག་པའི་ལས་ཁུངས་མདུན་ངོ་རྒོལ་གནང་སྟེ་བོད་ལ་རང་དབང་དགོས་ ༧རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས་པ་སོཌ་སྐད་འབོད་གནང་བར་བརྟེན་ནས་རྒྱ་མིའི་ཉེན་རྟོག་མི་སྣས་ཁོང་རྣམས་འཇུ་བཟུང་གིས་བཙན་འཁྲིད་བྱས་འདུག་ རྒྱ་ནག་གཞུང་གིས་བཙན་དབང་ལ་ངོ་རྒོལ་གནང་མཁན་བོད་མི་བདུན་པོ་དེ་རྣམས་ནི་ཁེ་སྐོར་ཤང་ཚེ་ཤུལ་སྡེ་བ་ནས་བོད་མི་གསུམ་དང་མགོ་མཆོག་སྡེ་བ་ནས་བོད་མི་གཉིས་ རྟ་ཤུལ་སྡེ་བ་ནས་བོད་མི་གཅིག་དང་ཡང་ས་གནས་གང་ནས་ཡིན་མིན་གསལ་ཁ་མེད་པ་ནས་བོད་མི་གཅིག་བཅས་ཡིན་པ་རེད་ དེའི་རྗེས་སུ་འབྲེལ་ཡོད་བོད་མི་ཁག་གཅིག་གིས་རྒྱ་མིའི་ཉེན་རྟོག་མི་སྣས་འཛིན་བཟུང་བྱས་པའི་བོད་མི་རྣམས་གློད་བཀྲོལ་གཏོང་རོགས་ཞེས་ཞུ་བ་འཐེན་དུ་བསྐྱོད་སྐབས་ རྒྱ་མིའི་ཉེན་རྟོག་པས་ཁོང་རྣམས་ལ་ཡ་ལན་མ་བྱས་པའི་རྐྱེན་གྱིས་ཕན་ཚུན་རྩོད་གླེང་ཤོར་དུས་རྒྱ་མིའི་ཉེན་རྟོག་པས་མེ་མདའ་བརྒྱབ་སྟེ་ཞུ་བ་འཐེན་མཁན་བོད་མི་གཉིས་ལ་རྨས་སྐྱོན་བཏང་འདུག་  ད་ལྟའི་ཆར་ཤང་ཐོག་ཏུ་རྒྱ་ནག་གཞུང་གིས་རྒྱ་མིའི་ཉེན་རྟོག་མི་སྣ་ཇེ་མང་དུ་བཏང་སྟེ་དམ་བསྒྲཌ་བྱེད་ཤུཌ་ཆེ་རུ་བཏང་ཡོད་པ་དང་གསེར་རྟ་རྫོང་ཁོངས་ལ་ཁ་པར་སོཌ་བརྒྱུད་ནས་འབྲེལ་བ་ཞུ་རྒྱུར་དཀའ་ངལ་ཡོད་སྟབས་གནས་ཚུལ་ཁ་གསལ་རག་གི་མིན་འདུག་ཅེས་རྒྱ་གར་ལྷོ་ཕྱོཌ་རྣམ་སྒྲོལ་གླིང་ནས་ཚུལ་ཁྲིམས་ནོར་བུ་ལཌ་ཀྱིས་འགྲེལ་བརྗོད་གནང་འདུག༎