རྒྱལ་ཚོགས་ནས་མེར་སྲེག་ལས་འགུལ་ལ་ཐུགས་འཚབ།

༄༅།    །དེ་རིང་ཕྱི་ཟླ་༡༡ཚེས་༢ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་ལྕམ་Navi Pillay ཡིས། བོད་ནང་དུ་རང་ལུས་མེར་སྲེག་བཏང་སྟེ། འུ་ཐུག་ཐབས་ཟད་ཀྱིས་ངོ་རྒོལ་གྱི་ལས་འགུལ་སྤེལ་མཁན་མང་དུ་འགྲོ་བ་སོགས་བོད་ནང་གི་གནས་སྟངས་ཐབས་སྡུག་པོ་འགྱུར་བཞིན་པ་དེ་རིགས་མི་ཡོང་བའི་ཆེད་དུ་རྒྱ་ནག་གཞུང་གིས་འབྲེལ་ཡོད་བྱ་ཐབས་ལག་བསྟར་བྱ་དགོས་པའི་ཛ་དྲག་གི་འབོད་སྐུལ་ཞུས་ཡོད་པ་རེད།
དེ་ཡང་ཁོང་གིས་གསལ་བསྒྲགས་ཤིག་སྤེལ་བའི་ནང༌། ངོས་ནས་བོད་མིའི་གནས་སྟངས་ནི།    དངངས་སྐྲག་དང་ཞེ་སྣང༌། སུན་གཙེར། འུ་ཐུག་ཐབས་ཟད་ཀྱི་གནས་སུ་གྱུར་ཏེ་རང་ལུས་མེར་སྲེག་གཏོང་དགོས་པའི་ཐབས་སྡུག་གི་བྱ་བ་སྤེལ་དགོས་བྱུང་བར་ངོས་འཛིན་བྱེད་ཀྱི་ཡོད། དེར་བརྟེན་རྒྱ་ནག་གཞུང་གིས། བོད་མི་ཚོས་མྱོང་བཞིན་པའི་དཀའ་ངལ་དེ་དག་ངོས་འཛིན་ཐུབ་པ་བྱས་ཏེ།    ཁོང་ཚོའི་སེམས་ནང་གི་འདུན་པ་དང་བསམ་ཚུལ་ཇི་ཡོད་ཤོད་ཆོག་པའི་སྨྲ་བརྗོད་རང་དབང་གི་ཐོབ་ཐང་སྤྲོད་དགོས་ཀྱི་རེད་ཅེས་དང༌། བོད་ནང་གི་བོད་མི་ཚོས་སྨྲ་བརྗོད་རང་དབང་དང༌། ཆོས་དད་རང་དབང༌། འདུ་འཛོམས་ཀྱི་རང་དབང་སོགས་གཞི་རྕའི་འགྲོ་བ་མིའི་ཐོབ་ཐང་དེ་རིགས་ལོངས་སུ་སྤྱོད་ཐབས་འབད་བརྩོན་བྱེད་པར་རྒྱ་ནག་གཞུང་གིས་དྲག་གནོན་དང་རྡུང་རྡེག་གཏོང་བའི་བྱ་སྤྱོད་ལ་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་ཞེས་གསུང་ཡོད་པ་རེད།
མཐའ་དོན་དེར་ཁོང་གིས།  ངོས་ནས་རྒྱ་ནག་གཞུང་ལ་འབོད་སྐུལ་ཞུ་རྒྱུར། བོད་ནང་གི་བོད་མི་ཚོར་ཞི་བའི་ལས་འགུལ་སྤེལ་བ་དང༌། སྨྲ་བརྗོད་རང་དབང༌སོགས་ལ་བརྩི་བཀུར་ཞུ་དགོས་པ་དང༌། འགྲོ་བ་མིའི་ཐོབ་ཐང་རྩོད་ལེན་བྱེད་མཁན་འཛིན་བཟུང་བྱས་པ་ཚང་མ་གློད་བཀྲོལ་གཏོང་རོགས་ཞུ་རྒྱུ་ཡིན་ཞེས་གསུང་འདུག །