རྒྱ་ནག་དམག་དཔུང་ཁང་གི་སྒོ་སྲུང་བར་མེ་མདའ་ཕོག་པ།

༄༅༎ཡང་རྒྱ་ནག་གི་ཟི་ཁྲོན་ཞིང་ཆེན་ཁོངས་ཀྱི་ལེ་ཧྲན་ས་གནས་ནང་ཡོད་པའི་རྒྱ་ནག་དམག་དཔུང་ཁང་གི་གོ་སྲུང་བར་གཟའ་ཕུར་བུའི་ཉིན་ངོ་རྟགས་མི་ཆོད་པའི་མིས་མེ་མདའ་རྒྱབ་ནས་རྨས་སྐྱོན་ཕོག་ཏེ་ཁོ་པའི་མེ་མདའ་ཁྲོག་འཅོམ་བྱས་ཡོད་པའི་སྐོར་ཧོང་ཀོང་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་དང་མང་གཙོ་ལྟེ་གནས་ཁང་གིས་གཟའ་པ་སངས་ཉིན་གནས་ཚུལ་ཕྱིར་བསྒྲགས་བྱས་འདུག

གནད་དོན་དེ་བདེན་པ་ཡིན་མིན་སྐོར་རོའེ་ཁྲར་གསར་འགྱུར་བརྒྱུད་ལམ་གྱིས་ས་གནས་ཉེན་རྟོག་ལས་ཁང་ལ་ཁ་པར་ཐོག་ནས་སྐད་ཆ་འདྲི་རྩེད་བྱས་ཡོད་ན་ཡང་ཁ་པར་ལན་འདེབས་བྱེད་མཁན་བྱུང་མེད་པ་གནས་ཚུལ་ནང་འཁོད་བཞག དེའི་གོང་ཙམ་དུ་རྒྱ་ནག་ཟི་ཁྲོན་ཞིང་ཆེན་གྱི་གྲུང་ཆིང་གྲོང་ཁྱེར་གྱི་དམག་དཔུང་ལྟེ་གནས་ཁང་ཞིག་གི་སྒོ་འགྲམ་སྲུང་བྱར་ངོ་རྟགས་མི་ཆོད་པའི་མི་ཁག་ཅིག་གིས་མེ་མདའ་རྒྱབ་ནས་དམར་གསོད་བཏང་ཏེ་ཁོ་པའི་མེ་མདའ་འཁྱེར་ནས་གར་སོང་ཆ་མེད་དུ་གྱུར་ཡོད་པ་དང་རྒྱ་ནག་གཞུང་གིས་ས་གནས་དེའི་ཉེན་རྟོགས་པ་ཉིས་སྟོང་ལྷག་ཙམ་བཏང་ནས་རྩོད་ཞིབ་བྱེད་མུས་ཡིན་པ་རེད། རྒྱ་ནག་ནང་དེང་སྐབས་གནས་ཚུལ་དེ་རིགས་ཇེ་མང་དུ་འགྲོ་བཞིན་པ་དེས་རྒྱ་ནག་གི་སྤྱི་ཚོགས་བརྟན་ལྷིང་དང་འཆམ་མཐུན་གྱི་སྤྱི་ཚོགས་ཟེར་བར་གནོད་འཚེ་ཕོག་རྒྱུར་རྒྱ་ནག་གཞུང་གིས་ཞེད་སྣང་དང་དོགས་ཟོན་ཆེན་པོ་བྱེད་ཀྱི་ཡོད་པ་རེད།