༸གོང་ས་མཆོག་མཇལ་རྒྱུ་ནི་སྲིད་འཛིན་གྱི་ཐུགས་འགན་ཡིན་པ།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་སྙན་གྲགས་ཅན་གྱི་ཞི་བདེའི་གཟེངས་རྟགས་བཞེས་མཁན་གྱི་སྐྱེས་བུ་དམ་པ་ཞིག་ཡིན་དུས་ཕེ་རན་སིའི་སྲིད་འཛིན་གྱི་མཚན་གནས་ཐོག་ནས་མཇལ་འཕྲད་གནང་རྒྱུ་དེ་སྲིད་འཛིན་གྱི་ཐུགས་འགན་ཡིན་པའི་སྐོར་སྲིད་འཛིན་སར་ཀོ་ཛི་མཆོག་གིས་གསུངས་པའི་གནས་ཚུལ་ཐོན་འདུག

རྒྱ་ནག་གིས་ཐབས་ཤེས་འདྲ་མིན་གྱི་ཐོག་ནས་ཕེ་རན་སིའི་སྲིད་འཛིན་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཀྱི་མཛད་འཆར་ཐོག་དོ་ཕོག་གཏང་རྒྱུའི་འབད་བརྩོན་གནང་ཡོད་ཀྱང་འཆར་གཞི་ཡོད་པ་ལྟར་ཕྱི་ཚེས་དྲུག་ཉིན་ཕེ་རན་སིའི་སྲིད་འཛིན་ནི་ཀོ་ལ་སེ་སར་ཀོ་ཛི་མཆོག་གིས་མཇལ་འཕྲད་གྲོས་མོལ་གནང་ཡོད་ཅིང་ཕེ་རན་སིའི་སྲིད་འཛིན་མཆོག་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་འགྲོ་བ་མིའི་ཐོབ་ཐང་གསལ་བསྒྲག་གནང་ནས་ལོ་ངོ་དྲུག་བཅུ་འཁོར་བའི་དུས་ཚིགས་ཀྱི་གསུངས་བཤད་གནང་ཡོད་པ་དང་ཁོང་གིས་གསུངས་བཤད་གནང་དོན་ལ་ཁོང་ཕེ་རན་སི་རྒྱལ་ཁབ་ཀྱི་དབུ་ཁྲིད་ཡིན་པའི་ཆ་ནས་མི་རིགས་ཀྱི་འབྱུང་ཁུང་དང་སོ་སོའི་ཆོས་ཕྱོགས་གྲུབ་མཐའ་དང་རྩ་དོན་གྱི་འཐབ་རྩོད་གནང་གི་ཡོད་ནའི་ནོ་བེལ་ཞི་བདེའི་གཟེངས་རྟགས་བཞེས་མཁན་རྣམས་མཇལ་འཕྲད་གནང་རྒྱུ་དེ་ཐུགས་འགན་ཞིག་ཡིན་པའི་སྐོར་བཀའ་གནང་འདུག ཁོང་གིས་མུ་མཐུད་ནས་གསུངས་དོན་ལ་གལ་ཏེ་ཕེ་རན་སིའི་ཕྱོགས་ནས་འདི་འདྲའི་གཟེངས་སུ་ཐོན་པའི་ཞི་བདེའི་གཟེངས་རྟགས་བཞེས་མཁན་རྣམས་ལ་ཆེས་མཐོང་གི་ས་མིག་མ་ཕུལ་བ་ཡིན་ན་ཕེ་རན་སི་རྒྱལ་ཁབ་ཀྱིས་ནོ་བེལ་ཞི་བདེའི་གཟེངས་རྟགས་ཀྱི་ལོ་རྒྱུས་ལ་དྲང་པོ་མ་གནང་བ་འཁོད་སྲིད་ཀྱི་རེད་ཅེས་གསུངས་གནང་འདུག རྒྱ་ནག་གི་ངོས་ནས་ཕེ་རན་སི་དང་རྒྱ་ནག་དབར་གྱི་ཚོང་འབྲེལ་དང་ལྷག་དོན་དུ་རྒྱ་ནག་ནང་ཕེ་རན་སིའི་དངོས་ཟོག་རྒྱ་ནག་གི་མི་མང་གིས་ངོ་རྒོལ་གྱི་ཚུལ་དུ་བེད་སྤྱོད་མ་གཏོང་བ་སོགས་ཤུགས་རྐྱེན་ངན་པ་ཡོང་སྲིད་པའི་ཉེན་བརྡ་བཏང་ཡོད་པ་མ་ཟད་པེ་ཅིང་དུ་ཡོད་པའི་ཕེ་རན་སི་གཞུང་ཚབ་ཆེན་པོ་ཀྱང་རྒྱ་ནག་གི་ཕྱི་སྲིད་ལས་ཁང་དུ་བཀའ་འགུགས་གནང་ནས་ཕེ་རན་སིའི་སྲིད་འཛིན་མཆོག་གིས་༸གོང་ས་མཆོག་དང་མཇལ་འཕྲད་གནང་རྒྱུར་ངོ་རྒོལ་བྱས་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གི་མཉམ་དུ་འབྲེལ་བ་ཡག་པོ་གནང་དགོས་ཀྱང་འགྲོ་བ་མིའི་ཐོབ་ཐང་དང་མང་གཙོའི་གནད་དོན་ཐོག་ནུབ་ཕྱོགས་ཀྱི་རྒྱལ་ཁབ་དབུ་ཁྲིད་རྣམས་ཀྱིས་ཇར་མ་ནིའི་སྲིད་བློན་ལྕམ་ཨེན་ཇེ་ལ་མར་ཀེལ་མཆོག་གིས་གནང་བ་ལྟར་བཞེངས་ཕྱོགས་བརྟན་པོ་འཛིན་དགོས་པའི་ལམ་སྟོན་གནང་ཡོད་པ་བཅས་ཀྱི་གནས་ཚུལ་ཐོན་འདུག