ཁོར་ཡུག་སྲུང་སྐྱོབ་པ་རིན་ཆེན་བསམ་གྲུབ་ལགས་གློད་བཀྲོལ།

༄༅༎ཁོར་ཡུག་སྲུང་སྐྱོབ་པ་རིན་ཆེན་བསམ་གྲུབ་ལགས་རྒྱལ་ཁབ་ཁ་བྲལ་གཏོང་མཁན་གྱི་ཉེས་འཛུགས་འོག་ལོ་ལྔའི་རིང་བཙོན་འཇུག་ཁྲིམས་ཐག་བཅད་ནས་ཁ་ས་ཕྱི་ཟླ་༨་པའི་ཚེས་བརྒྱད་ཉིན་ལྷ་ས་བཙོན་ཁང་ནས་གློད་བཀྲོལ་བཏང་འདུག    ཁོང་གི་སྤུན་ཆུང་བ་འཇིགས་མེད་རྣམ་རྒྱལ་ལགས་ལ་ངལ་རྩོལ་བསྒྱུར་བཀོད་ཀྱི་བཙོན་འཇུག་ཟླ་བ་ཉི་ཤུ་རྩ་གཅིག་གི་ཁྲིམས་ཐག་བཅད་དེ་བཙོན་འཇུག་བྱས་པ་ཡང་དེ་སྔོན་གློད་བཀྲོལ་ཐོབ་ཡོད་པ་རེད།     བུ་སྤུན་འབྲིང་བ་ཀརྨ་བསམ་སྒྲུབ་ལགས་ལ་ཚབས་ཆེའི་ཇག་བཅོམ་གྱི་ནག་ཉེས་བསགས་ལུགས་ཀྱི་གྱོད་གཞིའི་འོག་ལོ་བཅོ་ལྔའི་བཙོན་དུས་ཁྲིམས་ཐག་བཅད་དེ་བཙོན་རའི་ནང་ལྷུངས་ཡོད་པ་རེད།    རིན་ཆེན་བསམ་གྲུབ་ལགས་དང་འཇིགས་མེད་རྣམ་རྒྱལ་བཅས་རྣམ་གཉིས་ལ་རྒྱལ་ཁབ་ཀྱི་བདེ་འཇགས་ལ་གནོད་པའི་བྱ་བ་སྤེལ་བའི་ཉེས་འཛུགས་བྱས་ཡོད་ཅིང་།     ཁོང་བུ་སྤུན་གསུམ་གྱིས་ཁམས་ཨ་ཆུང་སེང་གེ་གནམ་རྫོང་དང་བླངས་ཁོར་ཡུག་སྲུང་སྐྱོབ་ཚོགས་པ་ཞེས་པ་བཙུགས་ཤིང་། རྒྱ་ནག་གི་ལས་བྱེད་པ་དག་གིས་ཡུལ་དེའི་རི་སྐྱེས་སྲོག་ཆགས་རྣམས་འདེད་བཞིན་པའི་སྐོར་ཞུ་གཏུགས་བྱས་པར་བརྟེན་འཛིན་བཟུང་བྱས་འདུག     རྒྱ་ནག་གཞུང་གིས་ཁོང་གཉིས་ཀྱིས་ཁྲིམས་འགལ་གྱི་ཐོག་ནས་ཁོར་ཡུག་དང་འབྲེལ་བའི་གནས་ཚུལ་བསྡུ་རུབ་བྱས་ཤིང་། རྒྱལ་ཁབ་ཀྱི་བདེ་འཇགས་ལ་གནོད་པའི་ལས་ཀ་བྱས་ཚུལ་གྱི་ཉེས་འཛུགས་བྱས་ཡོད་པ་རེད། བུ་སྤུན་འབྲིང་བ་ཀརྨ་བསམ་འགྲུབ་ལགས་ལ་མི་ལོ་༡༥ བཙོན་འཇུག་ཁྲིམས་ཐག་བཅད་ཡོད་པ་རེད།    ཁོང་ནི། ཁོར་ཡུག་སྲུང་སྐྱོབ་ཀྱི་ལས་འགུལ་བ་དང་། དུས་རྒྱུན་ཚོང་ལས་གཉེར་མཁན་གྱི་ཚོང་པ་སྟོབས་ཆེན་ཞིག་ཡིན་པ་རེད།    ཀརྨ་བསམ་འགྲུབ་ལགས་ལ་མི་ལོ་༡༥ རིང་བཙོན་འཇུག་ཁྲིམས་ཐག་བཅད་པ་མ་ཟད། ཆབ་སྲིད་ཁེ་དབང་ལོ་༥ ཕྲོགས་པ་དང། རྒྱ་སྒོར་༡༠༠༠༠ ཉེས་ཆད་བཏང་ཡོད་པ་རེད༎

གསར་འགོད་པ་ཚེ་བརྟན་རྣམ་རྒྱལ།