ལྷོ་ཨ་ཕི་རི་ཀའི་གྲོས་ཚོཌ་མདུན་ངོ་རྒོལ་ལས་འགུལ།

༄༅༎ཕྱི་ཟླ་བཅུ་པའི་ཚེས་༣ རེས་གཟའ་ཟླ་བའི་ཕྱི་དྲོ་ལྷོ་ཨ་ཕེ་རི་ཀའི་ཚོགས་པ་དང་མི་སྒེར་བཅས་མི་གྲངས་༥༠ ཡིས་ལྷོ་ཨ་ཕེ་རི་ཀིའི་གྲོས་ཚོགས་མདུན་འདུ་འཛོམས་ཀྱིས། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལྷོ་ཨ་ཕེ་རི་ཀར་ཆིབས་བསྒྱུར་བསྐྱང་རྒྱུར་ཐོངས་མཆན་ འབུལ་དགོས་ཞེས་མར་མེའི་ཁྲོམ་སྐོར་གྱི་ངོ་རྒོལ་ལས་འགུལ་ཞིག་སྤེལ་ཡོད་པ་རེད།
དེ་ཡང་རྒྱལ་སྤྱིའི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྷོ་ཨ་ཕེ་རི་ཀའི་ཡེ་ཤུའི་ཆོས་དཔོན་ཌེ་སི་མེན་ཀྲུ་ཀྲུ་མཆོག་དགུང་གྲངས་༨༠ ཕེབས་པའི་འཁྲུངས་སྐར་མཛད་སྒོར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཆིབས་བསྒྱུར་ཡོང་བའི་གདན་ཞུ་ཕུལ་ཡོད་པ་དང༌། ཁོང་གི་འཁྲུངས་སྐར་ནི་ཕྱི་ཟླ་བཅུ་པའི་ཚེས་༧རེས་གཟའ་པ་སངས་ཉིན་ཟིན་གྱི་ཡོད་ཀྱང༌། ད་དུང་ལྷོ་ཨ་ཕེ་རི་ཀའི་གཞུང་གིས། ༧གོང་ས་སྐྱབས་མགོན་ཆེན་པོ་མཆོག་ཡེ་ཤུའི་ཆོས་དཔོན་གྱི་འཁྲུངས་སྐར་ལ་ཆིབས་བསྒྱུར་བསྐྱང་རྒྱུར་ཐོངས་མཆན་འབུལ་མེད་པ་རེད། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ད་རེས་ལྷོ་ཨ་ཕེ་རི་ཀར་ཌེ་སི་མེན་ཀྲུ་ཀྲུ་མཆོག་གི་འཁྲུངས་སྐར་མཛད་སྒོར་ཆིབས་བསྒྱུར་བསྐྱང་རྒྱུ་མ་ཟད། ལྷོ་ཨ་ཕེ་རི་ཀའི་གྲོང་ཁྱེར་ཀེཔ་ཀྲའོན་དུ་ཚོགས་རྒྱུའི་རྒྱལ་སྤྱིའི་ཞི་བདེའི་ཚོགས་འདུའི་དབུ་འབྱེད་མཛད་རྒྱུ་དང༌། ལྦིཏ་ལྦ་ཏར་སི་རེནདྲ་གཙུག་ལག་སློབ་གྲའི་ནང་གསུང་བཤད་གནང་རྒྱུའི་གསོལ་འདེབས་ཞུས་ཡོད་པ་རེད།
རེས་གཟའ་ཟླ་བའི་ཉིན་ཆོས་དཔོན་ཌེ་སི་མེན་ཀྲུ་ཀྲུ་མཆོག་གི་ཞི་བདེའི་ལྟེ་གནས་ཁང་སོགས་གནད་ཡོད་ཚོགས་པ་ཁག་གིས། ལྷོ་ཨ་ཕེ་རི་ཀའི་གཞུང་ལ། སྤྱི་ནོར་༧གོང་ས་སྐྱབས་མགོན་ཆེན་པོ་ལ་ཐོངས་མཆན་འབུལ་མིན་དེ་རིང་ནང་ཚུད་ལ་ལན་དགོས་ཞེས་དགོས་འདུན་བཏོན་ཡོད་པ་མ་ཟད། ཌེ་སི་མེན་ཀྲུ་ཀྲུ་མཆོག་གི་ཞི་བདེ་ལྟེ་གནས་ཁང་གི་མགྲིན་ཚབ་པ་ནོམ་ཕུན་ཌོ་ལྦ་ལ་ཛ་ཞུ་བས། ང་ཚོའི་རྒྱལ་ཁབ་ཀྱི་རིན་ཐང་ཨ་མི་རི་ཀ་དང་རྒྱ་ནག་ལས་རྩ་ཆེར་འཛིན་དགོས་ཀྱི་རེད་ཅེས་དང༌། དེ་བཞིན་ངོ་རྒོལ་ལས་འགུལ་དེའི་ནང་མཉམ་ཞུགས་གནང་མཁན་ཆེད་ལས་མི་སྣ་ཞིག་གིས། ཌེ་སི་མེན་ཀྲུ་ཀྲུ་མཆོག་ནི་ལྷོ་ཨ་ཕེ་རི་ཀའི་རྒྱལ་ཁབ་རང་དབང་འཐབ་རྩོད་ནང་ཐུགས་འགན་བཞེས་མཁན་གཙོ་བོ་ཞིག་ཡིན་པ་དང༌། ཁོང་གི་གྲོགས་པོ་གདན་ཞུ་བྱ་རྒྱུའི་ཐོབ་ཐང་བཀག་འགོག་བྱས་པར་སོང་ལྷོ་ཨ་ཕ་རི་ཀའི་གཞུང་གིས། རྒྱ་ནག་གི་གནོན་ཤུགས་ལ་མགོ་སྒུར་རྒྱུ་ཡོད་པ་མ་རེད་ཅེས་གསུང་ཡོད་པ་རེད།