༸གོང་ས་མཆོག་གི་མཇལ་ཁ་ཐོབ་པ་ནི་རྨི་ལམ་མངོན་སུམ་དུ་གྲུབ་པ་ལྟ་བུ་ཞིག་བྱུང་ཞེས། ཤིམ་ལའི་ཆེས་མཐོའི་ཁྲིམས་ཁང་གི་ཁྲིམས་ཞིབ་པ་ཆེན་མོ་སྐུ་ཞབས་ Rajiv Shakdher ལགས་ཀྱིས་གསུངས་པ།

ཕྱི་ལོ་ ༢༠༢༤ ཟླ་ ༡༠ ཚེས་ ༡༡ ཉིན་གྱི་སྔ་དྲོའི་ཕྱག་ཚོད་ ༩ པ་མ་ཟིན་ཙམ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ། རྒྱ་གར་ཧི་མ་ཅཱལ་མངའ་སྡེའི་རྒྱལ་ས་ཤིམ་ལའི་ཆེས་མཐོའི་ཁྲིམས་ཁང་གི་ཁྲིམས་ཞིབ་པ་ཆེན་མོ་སྐུ་ཞབས་ར་ཇིལྦ་ཤག་དྷེར་ Rajiv Shakdher ལགས་སུ་མཇལ་ཁ་སྩལ་གནང་སོང་བ་དང་། མཇལ་ཁ་གྲུབ་མཚམས་འདི་ག་གསར་འགོད་པས་སྐུ་ཞབས་ Rajiv Shakdher ལགས་སུ་༸གོང་ས་མཆོག་གི་མཇལ་ཁ་ཐོབ་པའི་སེམས་ཚོར་ཇི་བྱུང་དང་འབྲེལ་བཀའ་འདྲི་ཞུས་པར་ཁོང་གིས། ཐེངས་འདིར་ང་དང་ངའི་བཟའ་ཟླ་དེ་བཞིན་ངའི་ལས་རོགས་ཁག་ཅིག་ནས་༸གོང་ས་མཆོག་གི་མཇལ་ཁ་ཞུ་ཆེད་དུ་བཅར་ཡོད་པ་དང་། ང་ལ་མཚོན་ན་༸གོང་ས་མཆོག་གི་མཇལ་ཁ་ཐོབ་པ་ཐེངས་དང་པོ་དེ་ཆགས་ཀྱི་ཡོད་པས། ༸མགོན་པོ་མཆོག་གི་མཇལ་ཁ་ཐོབ་པ་དེ་ནི་བསམ་ཡུལ་ལས་འདས་པ་དང་ངའི་མི་ཚེའི་ནང་གི་རྨི་ལམ་ཞིག་དེ་རིང་མངོན་སུམ་དུ་གྲུབ་པ་ལྟར་བརྗོད་དཀའ་བའི་ཚོར་བ་སྐྱིད་པོ་ཞིག་བྱུང་ལ། དེ་རིང་༸གོང་ས་མཆོག་གིས་བདེ་སྐྱིད་ཀྱི་སྙིང་པོ་གཙོ་བོ་ནི་ཞི་བདེ་ཡིན་ཞེས་བཀའ་སྩལ་སོང་བ་ནི་ངའི་མི་ཚེ་གང་བོའི་ནང་ཕན་རླབས་ཅན་ཞིག་ཏུ་གྱུར་སོང་ཞེས་དང་། བོད་མི་རྣམས་ནི་རྒྱ་གར་དང་སེམས་ཐག་ཧ་ཅང་ཉེ་པོ་ཡོད་ཅིང་། ༸མགོན་པོ་མཆོག་ནས་ཀྱང་གསུངས་དོན་ལ་གང་ཉིད་མཆོག་རྒྱ་གར་དུ་བཞུགས་དོན་གཙོ་བོ་གཅིག་ནི་རྒྱ་གར་ནས་ཆོས་ལུགས་ཚང་མར་གཅིག་མཚུངས་ཀྱི་གུས་བརྩི་དང་ཆེ་མཐོང་སྤྲད་ཀྱི་ཡོད་པར་བརྟེན་ཡིན་པ་དང་། སྤྱིར་མགོན་པོ་མཆོག་གི་མཇལ་ཁ་ཞུས་མཁན་ཤིན་ཏུ་ནས་མང་པོ་ཡོད་པས་མཇལ་ཁ་ཐོབ་རྒྱུ་དཀའ་ཡང་། གལ་སྲིད་ང་ལ་མ་འོངས་༸གོང་ས་མཆོག་གི་མཇལ་ཁ་ཞུ་རྒྱུའི་སྐལ་བཟང་གི་གོ་སྐབས་བྱུང་ན་ངའི་བུ་ཕྲུག་དང་ནང་མི་ཆ་ཚང་ལྷན་དུ་མགོན་པོ་མཆོག་གི་མཇལ་ཁ་ཞུ་ཆེད་དུ་ཡོང་རྒྱུའི་རེ་བ་ཆེན་པོ་བྱེད་ཀྱི་ཡོད། ཅེས་གསུངས་བྱུང་།

༸གོང་ས་མཆོག་གི་མཇལ་ཁ་གྲུབ་མཚམས་སྐུ་ཞབས་ Rajiv Shakdher ལགས་ནས་ཐེག་ཆེན་ཆོས་གླིང་གཙུག་ལག་ཁང་དུ་མཆོད་མཇལ་ཞུས་གནང་སོང་བ་དང་། ཐེངས་འདིར་ཁོང་དང་ལྷན་དུ་རྒྱ་གར་གྱི་ཀང་རྭ་རྫོང་གི་ཆེས་མཐོའི་དཔོན་རིགས་ཁག་ཅིག་དང་རྡ་ས་ས་གནས་འགོ་འཛིན་དཀོན་མཆོག་མིག་དམར་ལགས་ནས་ཀྱང་ལྷན་བཅར་ཞུས་གནང་ཡོད་པ་རེད།

གསར་འགོད་པ། བདེ་ཆེན་དབང་མོ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།