རྒྱ་ནག་གི་ཀོང་ཞི་ཀྲོང་ཁུལ་ནང་རི་ལིའི་ལྕགས་ལམ་འཛུགས་སྐྲུན།

༄༅༎རྒྱ་ནག་གཞུང་གིས་རྒྱ་ནག་གི་ལྷོ་ཕྱོགས་ཀོང་ཞི་ཀྲོང་རང་སྐྱོང་ས་ཁུལ་ནང་རི་ལིའི་ལྕགས་ལམ་འཛུགས་སྐྲུན་གྱི་ལས་གཞི་འགོ་བཙུགས་ཟིན་པ་དང་ལས་གཞི་དེ་ཡིས་མ་འོངས་རྒྱ་ནག་གི་ལྷོ་ཕྱོགས་ས་ཁུལ་ཡར་རྒྱས་ཐོག་ཕན་ཐོགས་ཆེན་པོ་ཡོང་རྒྱུ་ཡིན་པ་ངོས་འཛིན་བྱེད་ཀྱི་ཡོད་པ་རེད།

རི་ལིའི་ལྕགས་ལམ་འཛུགས་སྐྲུན་ལས་ཁང་གི་དཔོན་རིགས་ནས་དེ་རིང་བཤད་དོན་ལ་ཉེ་ཆར་ཕྱི་ཟླ་བཅུ་པ་ནས་རི་ལིའི་ལྕགས་ལམ་ཁག་བཞི་འཛུགས་སྐྲུན་གྱི་ལས་གཞི་འོག་བཙུགས་ཟིན་པ་དང་ད་དུང་ལྕགས་ལམ་ཁག་བཅུ་གཉིས་འཛུགས་སྐྲུན་གྱི་ལས་གཞི་རིང་མིན་ཕྱི་ལོ་༢༠༠༩ཤར་མཚམས་འགོ་བཙུགས་ཏེ་ཁྱོན་ལྕགས་ལམ་འཛུགས་སྐྲུན་གྱི་ལས་གཞི་ཁག་བཅུ་དྲུག་ཡོད་པ་དེ་དག་གིས་ལམ་ཐག་ཀི་ལོ་མི་ཊར་བཞི་སྟོང་ཉིས་ བརྒྱ་ལྷག་བར་འགྲིམས་འགྲུལ་བྱ་ཐུབ་རྒྱུ་ཡིན་ཞིང་དེའི་ནང་ནས་རི་ལིའི་ལྕགས་ལམ་ཀི་ལོ་མི་ཊར་ཉིས་སྟོང་བརྒྱད་བརྒྱ་ཙམ་ཀོང་ཞི་ས་ཁུལ་ནང་འཛུགས་སྐྲུན་བྱ་རྒྱུ་ཡིན་པ་བཤད་ཡོད་པ་རེད།

རི་ལིའི་ལྕགས་ལམ་དེ་དག་ཕྱི་ལོ་༢༠༡༦ནང་འཛུགས་སྐྲུན་ཆ་ཚང་ཟིན་རྒྱུའི་འཆར་གཞི་ཡོད་པ་དང་དེ་ཡང་ཀོང་ཞི་ས་གནས་ཀྱི་རྒྱལ་ས་ནན་ཉིང་ནི་རི་ལིིའི་འབབ་ཚུགས་ཀྱི་ལྟེ་གནས་བྱས་ཏེ་དེ་ནས་རྒྱ་ནག་གི་ལྷོ་ནུབ་དང་དབུས་སོགས་སུ་འགྲིམས་འགྲུལ་བྱ་ཐུབ་པའི་འགྲོ་ལམ་བཟོ་རྒྱུ་དང་ལྷག་པར་དུ་ཆ་རྐྱེན་དེ་ཡིས་མི་དམངས་ཚོར་ད་ལྟའི་འགྲིམས་འགྲུལ་དཀའ་ངལ་སེལ་ཐུབ་པ་ཙམ་དུ་མ་ཟད་ས་ཕྱོགས་ཁག་མང་པོ་ཞིག་ཏུ་འགྲིམས་འགྲུལ་བྱ་རྒྱུ་ཡོད་པའི་ཁར་དུས་ཚོད་ཐུང་ངུའི་ནང་འབྱོར་རྒྱུ་སོགས་ད་ལྟའི་འགྲིམས་འགྲུལ་གྱི་ཆ་རྐྱེན་ལས་ཧ་ཅང་གི་སྟབས་བདེ་རུ་བཏང་སྟེ་ད་ལྟ་ཀོང་ཞིའི་རྒྱལ་ས་ནན་ཉིང་ནས་རྒྱལ་ས་པེ་ཅིང་བར་འགྲིམས་འགྲུལ་བྱེད་པར་ཚོུད་ཉི་ཤུ་རྩ་བརྒྱད་འགོར་གཞི་ཡོད་ཀྱང་མ་འོངས་པར་རི་ལིའི་ལྕགས་ལམ་གསར་པ་དེ་འཛུགས་སྐྲུན་བྱས་པའི་རྗེས་ཚོུད་དགུ་ལས་འགོར་རྒྱུ་མིན་པ་བཤད་ཀྱི་ཡོད་པ་རེད༎