ར་ཤི་ཡའི་སྲིད་བློན་རྒྱ་ནག་ཏུ་འཚམས་འདྲི།

༄༅༎ར་ཤི་ཡའི་སྲིད་བློན་ལྦ་ལ་རྡི་མིར་པུ་ཀྲིན་ད་རེས་རྒྱ་ནག་གི་འཚམས་འདྲི་དེ་ནི། ཡུལ་གྲུ་གཉིས་བར་ལ་རྡོ་སྣུམ་ཚོང་འབྲེལ་ཐོག་དོན་འབྲས་སོན་པའི་གྲུབ་འབྲས་གང་ཡང་མ་བྱུང་བར་དེ་རིང་རེས་གཟའ་ལྷག་པའི་ཉིན་ར་ཤི་ཡ་དུ་ཕྱིར་ལོག་གནང་ཡོད་པ་རེད།
དེ་ཡང་སྲིད་བློན་ལྦ་ལ་རྡི་མིར་པུ་ཀྲིན་ཡིས་ཁོང་སླར་ཡང་ར་ཤི་ཡའི་སྲིད་འཛིན་འོས་མིའི་ནང་བཞེངས་རྒྱུའི་གསལ་བསྒྲགས་གནང་བའི་རྗེས། ད་རེས་ཁོང་རྒྱ་ནག་ཏུ་ཕྱི་འབྲེལ་གྱི་ཐོག་ནས་འཚམས་འདྲིར་ཕེབས་པ་ཐེངས་དང་པོ་ཡིན་ཞིང༌། ཁོང་གིས་རྒྱ་ནག་ཏུ་འཚམས་འདྲི་གནང་བའི་རིང་རྒྱ་ནག་གི་སྲིད་བློན་ལྦེན་ཅ་བའོ་དང་སྲིད་འཛིན་ཧུ་ཇིན་ཐའོ་དང་གོ་བསྡུར་གནང་ཡོད་པ་རེད།
ར་ཤི་ཡ་ནི་འཛམ་གླིང་ནང་ནས་གློག་གི་ནུས་ཤུགས་ཐོན་སྐྱེད་མང་ཤོས་བྱེད་མཁན་ཞིག་ཡིན་ཞིང། ཁོང་གིས་ད་རེས་གསུང་པར་གཞིགས་ན། ར་ཤི་ཡས་རྒྱ་ནག་ལ་རྡོ་སྣུམ་ཚོང་བསྒྱུར་བྱ་རྒྱུའི་གནད་དོན་ཡར་རྒྱས་ཕྱིན་ཏེ་གྲོས་མོལ་ཐོག་ས་རྟགས་བཀོད་དེ་མི་ལོ་སུམ་ཅུ་འགྲོ་གི་ཡོད་ཀྱང་རྡོ་སྣུམ་གྱི་རིན་གོང་ཐོག་ལ་ཕྱོགས་གཉིས་པོ་མི་མཐུན་པར་གནས་ཡོད་པའི་སྐོར་གསུང་ཡོད་པ་དང་ འོན་ཀྱང་པུ་ཀྲིན་གྱིས་རེས་གཟའ་མིག་དམར་ཉིན་གྱི་གྲོས་མཐུན་དེའི་ཐོག་ནས་ར་ཤི་ཡའི་ཕྱོགས་ནས་རྒྱ་ནག་གི་ཁྲོམ་རའི་ནང་རྡོ་སྣུམ་མཁོ་འདོན་བྱ་རྒྱུའི་ལས་དོན་མཐའ་མའི་ཐག་གཅོད་བྱ་རྒྱུའི་མཚམས་ལ་སླེབས་ཡོད་པའི་སྐོར་གསར་འགོད་པ་གསུང་ཡོད་པ་དང༌། དེ་བཞིན་དེ་རིང་ར་ཤི་ཡའི་སྲིད་བློན་གཞོན་པ་ཨི་གོར་སེ་ཆིན་གྱིས་ཀྱང་ར་ཤི་ཡས་རྒྱ་ནག་ལ་རྡོ་སྣུམ་མཁོ་འདོན་བྱ་རྒྱུའི་གྲོས་མཐུན་ཡོང་རྒྱུར་འགག་རྩའི་ཐོག་ཏུ་གནས་ཡོད་པའི་སྐོར་གསུང་ཡོད་ཀྱང་ད་རེས་པུ་ཀྲིན་རྒྱ་ནག་ཏུ་ཕེབས་ཏེ་འཚམས་འདྲི་དེའི་རིང་ལ་རྒྱལ་ཁབ་གཉིས་པོ་རྡོ་སྣུམ་ཚོང་འབྲེལ་ཐད་ཐག་གཅོད་ཐུབ་པ་ཞིག་བྱུང་མེད་པ་རེད།