འབར་མའི་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ།

༄༅༎འབར་མའི་རྒྱལ་ས་ནེ་པི་ཌོ་ནང་ཡོད་པའི་ཨ་རིའི་གཞུང་ཚབ་ལས་ཁང་མདུན་དུ་འབར་མའི་བེུད་གཉིས་དང་ཕྲུ་གུ་བཞི་ཡིས་བཙོན་པ་གློད་བཀྲོལ་ཡོངས་ཐབས་སུ་ཨ་རི་གཞུང་ནས་འབར་མའི་དྲག་པོའི་སྲིད་གཞུང་ལ་གནོན་ཤུགས་སྤྲོད་དགོས་པའི་ཞུ་གཏུགས་ཀྱི་ལས་འགུལ་སྤེལ་བར་འབར་མའི་ཉེན་རྟོག་མི་སྣས་ཁོང་རྣམས་དོ་དམ་འོག་འཛིན་བཟུང་བྱས་ཡོད་པའི་གནས་ཚུལ་ཐོན་འདུག

གོང་གསལ་བེུད་གཉིས་ནས་བེུད་གཅིག་གི་བཟའ་ཟླ་དེ་ཉེ་སྔོན་འབར་མའི་དྲག་པོའི་སྲིད་གཞུང་གིས་འཛིན་བཟུང་བཙོན་འཇུག་བྱས་འདུག་པ་དང་ཁ་ས་བེུད་གཉིས་པོ་དེ་དང་དེ་བཞིན་ཕྲུ་གུ་བཞི་བཅས་ནས་ཨ་རིའི་གཞུང་ཚབ་ལས་ཁང་མདུན་དུ་འབར་མའི་དྲག་པོའི་སྲིད་གཞུང་གིས་ཁོང་གི་བཟའ་ཟླ་ཁྲིམས་འགལ་གྱི་འཛིན་བཟུང་བྱས་ཡོད་པ་དང་ཁོང་གློད་བཀྲོལ་ཡོང་ཆེད་དུ་ཨ་རི་གཞུང་གི་རོགས་སྐྱོབ་གནང་རོགས་ཞེས་པའི་འཕྲེད་དར་འཕྱར་ཡོད་པ་རེད། འབར་མའི་ཉེན་རྟོག་ལས་བྱེད་པ་ཞིག་གིས་བེུད་གཉིས་དང་ཕྲུ་གུ་བཞི་པོ་དེས་ཨ་རིའི་གཞུང་ཚབ་ལས་ཁང་མདུན་དུ་ངོ་རྒོལ་བྱས་པའི་རྐྱེན་ཁོངས་རྣམས་དོ་དམ་འཛིན་བཟུང་བྱས་ཡོད་ཅིང་ད་ལྟ་དོ་དམ་བཀག་ཉར་ཁང་ནང་ཁོང་རྣམས་ལ་འདྲི་རྩད་བྱེད་མུས་ཡིན་སྐོར་ལས་གཞན་ཞིབ་ཕྲའི་འགྲེལ་བརྗོད་གང་ཡང་བྱས་མེད་པ་རེད། འཛམ་གླིང་མཉམ་སྦྲེལ་རྒྱལ་ཚོགས་ཀྱི་གྲངས་ཐོར་གཞིགས་ན་འབར་མའི་དྲག་པོའི་སྲིད་གཞུང་གི་དམ་བསྒྲགས་འོག་འབར་མའི་ཆབ་སྲིད་བཙོན་པ་༢༡༠༠ལྷག་ད་ལྟ་བཙོན་ཁང་ནང་ལུས་མུས་ཡིན་པ་རེད།།