རྒྱ་ནག་མི་མང་ནས་ཨ་རིར་འབྲེལ་བ་སྡུག་ཏུ་ཕྱིན་པར་ངོས་འཛིན།

༄༅༎རྒྱ་ནག་གི་སྲིད་འཛིན་ཧུ་ཅིང་ཏའོ་ཨ་རིའི་ནང་གཞུང་འབྲེལ་ལྟ་སྐོར་ལ་མ་ཐོན་གོང་རྒྱ་ནག་ཉིན་རེའི་གསར་ཤོག་གིས་རྒྱ་ནག་མང་ཚོགས་ཀྱི་བསམ་ཚུལ་བསྡུ་ལེན་བྱས་པའི་ནང་ རྒྱ་ནག་མི་མང་ཕྱེད་ཀ་ལྷག་ཙམ་གྱིས་༢༠༡༠ལོར་རྒྱ་ནག་དང་ཨ་རི་གཉིས་དབར་གྱི་འབྲེལ་བ་ཇེ་སྡུག་ཏུ་ཕྱིན་ཡོད་པར་ངོས་འཛིན་བྱས་འདུག།

རྒྱ་ནག་མི་མང་ཉིན་རེའི་གསར་ཤོག་གིས་ཟླ་བ་སྔོན་མར་རྒྱ་ནག་མི་མང་༡༤༤༣གི་བསམ་ཚུལ་བསྡུ་ལེན་བྱས་པའི་ནང༌། མི་༡༠ནང་༤ས་རྒྱ་ནག་དང་ཨ་རི་གཉིས་དབར་གྱི་འབྲེལ་བ་ཡག་པོ་མེད་པའི་བསམ་ཚུལ་བཏོན་ཡོད་པ་དང༌། དེའི་ནང་ནས་བསམ་ཚུལ་བརྗོད་མཁན་བརྒྱ་ཆ་༨༠ས་ཕྱོགས་གཉིས་དབར་གྱི་འབྲེལ་བ་ཇེ་སྡུག་ཏུ་ཕྱིན་པའི་ལེ་ཁག་ཨ་རིའི་སྲིད་འཛིན་ཨོ་བ་མ་ཐོག་བཙུགས་འདུག།

དེ་བཞིན་བརྒྱ་ཆ་༩༠ལྷག་ཙམ་གྱིས་རྒྱ་ནག་དང་ཨ་རི་གཉིས་དབར་འབྲེལ་ལམ་བཟང་པོ་དགོས་རྒྱུ་དེ་གནད་དོན་གལ་ཆེ་ཞིག་ལ་རྩིས་ཡོད་པ་དང༌། བསམ་ཚུལ་བསྡུ་མཁན་༡༠ནང་ནས་༦གིས་མ་འོངས་པར་རྒྱལ་ཁབ་གཉིས་དབར་གྱི་འབྲེལ་བ་སྲ་བརྟན་གནས་པའི་རེ་བ་བྱས་འདུག།