རྒྱ་མིའི་ཉེན་རྟོག་པས་གྲོང་གསེབ་པ་གཉིས་རྐྱེན་ལམ་དུ་བཏང་བ།

༄༅༎རྒྱ་ནག་གི་ལྷོ་ནུབ་གྲོང་གསེབ་ས་ཁུལ་ནང་གྲོང་གསེབ་པ་དང་རྒྱ་མིའི་ཉེན་རྟོག་པའི་བར་དྲག་པོའི་རྒོལ་འཛིངས་བྱུང་སྟེ་ཉེན་རྟོག་པས་མི་གཉིས་རྐྱེན་ལམ་དུ་བཏང་ཡོད་པའི་སྐོར་ལ་ཧོང་ཀོང་གི་འགྲོ་བ་མིའི་ཐོབ་ཐང་ཚོགས་པ་དང་རྒྱ་ནག་གཞུང་འབྲེལ་གསར་ལམ་ཐོག་གནས་ཚུལ་སྤེལ་ཡོད་ཅིང༌། དྲག་པོའི་དོན་རྐྱེན་དེ་ནི་རྒྱ་ནག་ནང་རྒྱལ་སྤྱིའི་ཨོ་ལིམ་པིག་རྩེད་འགྲན་ཚུགས་འགྲོ་ཡོད་པའི་སྐབས་དེར་སྤྱི་ཚོགས་ཐོག་གི་ཟིང་ཆའི་གནད་དོན་གསར་པ་ཞིག་ཡིན་པ་རེད། དོན་རྐྱེན་བྱུང་རིམ་ནི་ཡུ་ནན་ཞིང་ཆེན་གྱི་ས་གནས་གཞུང་གིས་ས་གནས་དེའི་ནང་འགྱིག་རིགས་བཟོ་སྐྲུན་ཆེད་དུ་མཁོ་བའི་རྒྱུ་ཆ་འདེབས་ལས་ཀྱི་འཚོ་ཐབས་བྱེད་མཁན་གྱི་གྲངས་ཉུང་མི་རིགས་ཀྱི་ཞིང་པ་ཚོར་ཁོང་ཚོའི་འཚོ་བའི་ཐོན་ཁུངས་འབྱིག་བཟོ་ཡ་གི་རྒྱུ་ཆ་འདེབས་ལས་བྱེད་ཡུལ་གྱི་ས་ཞིང་ས་གནས་གཞུང་ལ་ཚོང་འགྲེམས་བྱ་དགོས་པ་དང་དེ་ཡང་བརྒྱ་ཆ་༤༠ རིན་གོང་དམའ་བ་བྱས་ཏེ་ཚོང་དགོས་པའི་བཙན་བཀའ་བཏང་བར་བརྟེན་ཞིང་པ་རྣམས་ཁོང་ཁྲོ་ཆེན་པོའི་སྒོ་ནས་རེས་གཟའ་སྤེན་པའི་སྔ་དྲོ་ཞིང་པ་ཆིག་སྟོང་ལྷག་འདུ་འཛོམས་ཀྱིས་ས་གནས་གཞུང་ལ་ངོ་རྒོལ་བྱས་པའི་སྐབས་ཉེན་རྟོག་པ་དང་དྲག་པོའི་གདོང་ཐུག་བྱུང་སྟེ་ཉེན་རྟོག་པས་ངོ་རྒོལ་བྱེད་མཁན་གྱི་ཞིང་པ་གཉིས་རྐྱེན་ལམ་དུ་བཏང་བ་དང་གཅིག་ལ་ཚབས་ཆེའི་རྨས་སྐྱོན་ཕོག་ཡོད་པ། མི་གྲངས་༢༠ ཙམ་འཛིན་བཟུང་བྱས་པའི་སྐོར་ཧོང་ཀོང་ནང་གི་འགྲོ་བ་མིའི་ཐོབ་ཐང་དང་དམངས་གཙོ་ལྟེ་གནས་ཁང་གིས་གསུང་ཡོད་པ་རེད། རྒྱ་ནག་གཞུང་འབྲེལ་ཤིང་ཧྭ་གསར་ཤོག་ཐོག་ལ། མི་གཉིས་རྐྱེན་ལམ་དུ་ཕྱིན་པ་ངོས་ལེན་བྱས་ཡོད་པ་དང་ཡིན་ནའང་ གྲོང་གསེབ་པ་༡༣ དང་ཉེན་རྟོག་པ་༤༡ ལ་རྨས་སྐྱོན་ཕོག་པ། ཉེན་རྟོག་པའི་མོ་ཊ་བརྒྱད་གཏོར་སྐྱོན་བཏང་བའི་སྐོར་བཤད་ཡོད་པ་རེད།