ཨ་རིའི་སྲིད་འཛིན་ལ་ཞུ་འབོད།

༄༅།    །ཨ་རིའི་སྲིད་འཛིན་Obama དང་རྒྱ་ནག་གི་སྲིད་འཛིན་Xi Jinping གཉིས་དེ་རིང་རེས་གཟའ་པ་སངས་ཉིན་ཨ་མི་རི་ཀའི་ནུབ་ཕྱོགས་མངའ་སྡེ་California དུ་ཚོགས་རྒྱུའི་ལྷན་ཚོགས་ཐོག་མཇལ་འཕྲད་གནང་གི་ཡོད་པ་རེད།    ད་རེས་ཀྱིས་མཇལ་འཕྲད་དེའི་སྐབས་ལ་རྒྱ་ནག་ཕྱོགས་ནས་ཨ་མི་རི་ཀའི་དྲ་རྒྱའི་ནང་འཛུལ་ཏེ་གནས་ཚུལ་རྐུ་འཁྱེར་བྱེད་པའི་བྱ་སྤྱོད་དང།    བྱང་ཀོ་རི་ཡས་རྡུལ་ཕྲན་བཟོ་སྐྲུན་བྱེད་པ་དང་རྡུལ་ཕྲན་གོ་མཚོན་ཚོད་ལྟ་བྱེད་པའི་དཀའ་ངལ་སོགས་ཀྱི་སྐོར་བཀའ་བསྡུར་གཙོ་བོ་གནང་གི་ཡོད་ཅིང། Xi Jinping གྱིས་འདི་ལོའི་ཕྱི་ཟླ་གསུམ་པའི་ནང་རྒྱ་ནག་གི་སྲིད་དབང་འཛིན་པ་ནས་བཟུང་ད་རེས་ཨ་རིའི་ནང་དུ་འཚམས་འདྲི་ཐེངས་དང་པོ་ཡིན་པ་དང། ཨ་རིའི་ནང་དུ་ཡོད་པའི་རྒྱ་ནག་གི་གནད་དོན་ལ་རྟོགས་ཞིབ་གནང་མཁན་གྱི་ཚོགས་པས་འདས་ཟིན་པའི་ལོའི་ནང་ཨ་རི་དང་རྒྱ་ནག་དབུ་ཁྲིད་ལྷན་ཚོགས་གནང་བའི་ནང་ནས་ད་རེས་ཀྱི་ཨ་རི་དང་རྒྱ་ནག་གི་སྲིད་འཛིན་རྣམ་གཉིས་ཀྱི་ལྷན་ཚོགས་དེ་ནི་ཧ་ཅང་གི་གལ་འགངས་ཆེན་པོ་ཞིག་ཏུ་ངོས་འཛིན་གནང་གི་ཡོད་པ་རེད།
ཨ་མི་རི་ཀའི་ནང་གཏན་སྡོད་བོད་མིའི་སྒྲིག་འཛུགས་ཁག་གིས་ཨ་རིའི་སྲིད་འཛིན་Obama མཆོག་ལ། རྒྱ་ནག་གི་སྲིད་འཛིན་དང་མཇལ་འཕྲད་གནང་བའི་སྐབས།  བོད་དོན་གླེང་གློང་གནང་སྐྱོང་ཡོང་བའི་འབོད་སྐུལ་གྱི་སྙན་ཞུ་ཞིག་ཕུལ་གནང་འདུག    ཨ་རིའི་སྲིད་འཛིན་ལ་ཕུལ་བའི་སྙན་ཞུ་དེའི་ནང་ཞུ་དོན་གསུམ་ཡོད་པ་ནི། དང་པོ་སྲིད་འཛིན་Xi Jinping ལ་བོད་དོན་སྐོར་གཞུང་འབྲེལ་དང་སྐུ་སྒེར་གཉིས་ཐོག་ནས་གླེང་གློང་དང་སྦྲགས་ཡོངས་ཁྱབ་གསལ་བསྒྲགས་གནང་དགོས་རྒྱུ། གཉིས་པ་བོད་མིའི་ས་ཁུལ་ཁག་ནས་དྲག་པོའི་དཔུང་དམག་ཕྱིར་འཐེན་དགོས་རྒྱུའི་འབོད་སྐུལ་རྒྱ་ནག་གི་སྲིད་འཛིན་ལ་གནང་དགོས་རྒྱུ། གསུམ་པ་རྒྱ་གཞུང་གིས་བཙན་བྱོལ་བོད་མིའི་སྒྲིག་འཛུགས་དང་གྲོས་མོལ་བསྐྱར་གསོ་དགོས་པའི་སྐུལ་མ་གནང་རྒྱུ་བཅས་རེད་འདུག།