བོད་དོན་གོམ་བགྲོད་གནང་འཆར་འདུག

༄༅།    །དེ་ཡང་རྒྱལ་སྤྱིའི་བོད་རང་བཙན་ལས་འགུལ་ཚོགས་པས་རིང་མིན་སྤེལ་རྒྱུའི་ལས་འགུལ་དེ་ ཨ་རིའི་ཀ་ལི་ཕོར་ནི་ཡའི་མངའ་སྡེའི་ཨོཀ་ལེན་དྲ་གྲོང་ཁྱེར་ནས་འགོ་བཙུགས་ཏེ། སན་ཕ་རན་སི་ཀོའི་བར་མེལ་ལེ་བརྒྱ་དང་བརྒྱད་ཙམ་ཉིན་གྲངས་བརྒྱད་རིང་གོམ་བགྲོད་གནང་རྒྱུ་ཡིན་འདུག ཐེངས་འདིའི་གོམ་བགྲོད་ཀྱི་འབོད་སྒྲ་ནི། ཉེ་ལམ་བོད་ནང་གཞིས་ལུས་བོད་རིགས་སྤུན་ཟླ་མང་པོས་༧གོང་ས་༧སྐྱབས་མགོན་ཆེན་པོ་མཆོག་བོད་ནང་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་པའི་འབོད་སྒྲ་བསྒྲགས་ཤིང་།    གཅེས་པའི་སྲོག་ཚུན་ཆད་ཀྱང་གཅིག་མཇུག་གཉིས་མཐུད་ཀྱིས་མེར་བསྲེགས་གནང་བའི་ལས་འགུལ་ལ་གདུང་སེམས་མཉམ་བསྐྱེད་དང་། ལྷག་པར་དུ་ཁོང་རྣམ་པའི་ཞལ་ཆེམས་དང་དགོས་འདུན་ཇི་ཡོད་རྒྱལ་སྤྱིའི་སྡིངས་ཆའི་སྟེང་བསྐྱེལ་ཐུབ་ཐབས།    ཨ་རིའི་མི་མང་རྣམས་ལ་བོད་ནང་གི་དངོས་ཡོད་གནས་སྟངས་གོ་རྟོགས་སྤེལ་ཐབས་བཅས་སུ་དམིགས་ནས་ལས་འགུལ་སྤེལ་རྒྱུ་ཡིན་ལུགས་ཚོགས་པའི་སྤྱི་བསྒྲགས་སྤེལ་འདུག།