ཏ་ལི་བན་གྱིས་འཇིགས་སྐུལ་དྲག་སྤྱོད་ཀྱི་གཏོར་རྒོལ།

༄༅༎པ་ཀི་སི་ཐན་ནང་ཡོད་པའི་ཐ་ལ་བན་འཇིགས་སྐུལ་དྲག་སྤྱོད་ཤོག་ཁག་གིས་དེ་རིང་གཟའ་པ་སངས་ཉིན་པ་ཀི་སི་ཐན་གྱི་གྲོང་ཁྱེར་པེ་ཤ་ལྦར་ནང་ཡོད་པའི་ཨ་རིའི་སྐུ་ཚབ་དོན་གཅོད་ལས་ཁང་གི་སྲུང་སྐྱོབ་རུ་ཁག་ཐོག་གཏོར་རྒོལ་བཏང་ཡོད་ལུགས་བརྗོད་འདུག དེ་ནི་ཨ་རིའི་དམིགས་བསལ་དམག་དཔུང་གིས་འཇིགས་སྐུལ་དྲག་སྤྱོད་པའི་བྱེད་གཏེ་བིན་ལའ་ཀྲན་དམར་བསད་བཏང་བའི་རྗེས་ ཁོ་པའི་རྗེས་འབྲངས་པས་ནུབ་ཕྱོགས་པར་གཏོར་རྒོལ་གྱི་དྲག་སྤྱོད་རིགས་སྤེལ་བ་ཐོག་མ་དེ་ཡིན་པ་རེད་ ཨ་རིའི་དོན་གཅོད་ལས་ཁང་དེའི་མགྲིན་ཚབ་པ་ཨེལ་སྦར་ཀྲོ་རོ་ཌོརོ་གེཛ་ཡིས་གསུང་ན་ སྦག་སྦག་བཞོན་ནས་རང་ལུས་ལ་འབར་རྫས་འཁྱེར་བ་ཞིག་གིས་འབར་རྫས་སྤར་ནས་་གཏོར་རྒོལ་གྱི་བྱ་སྤྱོད་སྤེལ་བའི་ནང་ཨ་རིའི་མི་སེར་གཅིག་ཀྱང་ཤི་རྨས་བྱུང་མེད་པ་དང་ པ་ཀི་སི་ཐན་གྱི་མི་གཅིག་རྐྱེན་འདས་སུ་ཕྱིན་པ་དང་ དེ་མིན་མི་གྲངས་བཅུ་ལ་རྨས་སྐྱོན་ཕོག་པ་གསུང་འདུག འབར་རྫས་གས་འཐོར་དེ་བཞིན་གྲོང་ཁྱེར་དེའི་ནང་གཞུང་ཚབ་མི་སྣ་གནས་སྡོད་བྱེད་སའི་ས་གནས་གཙོ་བོ་ཞིག་ཡིན་པ་དང་ ཨ་རིའི་དོན་གཅོད་ལས་ཁང་གི་སྲུང་སྐྱོབ་མོ་ཊ་གཉིས་ལ་འབར་རྫས་ཀྱི་གཏོར་རྒོལ་བཏང་ནས་མོ་ཊ་གཅིག་ལ་འབར་རྫས་ཀྱིས་གཏོར་རྒོལ་ཕོག་ཡོད་པ་དང་ ཞིབ་ཕྲའི་གནས་ཚུལ་བརྟག་དཔྱད་བྱེད་བཞིན་ཡིན་པ་ཨ་རིའི་སྐུ་ཚབ་དོན་གཅོད་ལས་ཁང་གི་མགྲིན་ཚབས་པས་གསུང་འདུག ཨ་རིའི་དམིགས་བསལ་དམག་དཔུང་གིས་འཇིགས་སྐུལ་དྲག་སྤྱོད་པའི་བྱེད་གཏེ་བིན་ལའ་ཀྲན་དམར་བསད་བཏང་བའི་རྗེས་ཨེལ་ཁ་ཌ་དང་པ་ཀི་སི་ཐན་ནང་ཡོད་པའི་ཐ་ལ་བན་འཇིགས་སྐུལ་དྲག་སྤྱོད་ཤོག་ཁག་གིས་པ་ཀི་སི་ཐན་གཞུང་དང་ དེ་བཞིན་ནེ་ཀྲོ་(NATO)འམ་བྱང་ཨར་ལན་ཁྲེག་དམག་དོན་སྤྱི་ཆིངས་སྒྲིག་འཛུགས་ཀྱི་ཁོངས་གཏོགས་ཡུལ་གྲུའི་གཞུང་འབྲེལ་མི་སྣའི་ཐོག་གཏོར་རྒོལ་གཏོང་རྒྱུ་ཡིན་ལུགས་འཇིགས་སྐུལ་དྲག་སྤྱོད་ཤོག་ཁག་དེའི་མགྲེན་ཚབ་པས་རོས་ཁྲར་གསར་འགྱུར་བརྒྱུད་ལམ་ལ་ ཁ་པར་ཐོག་ནས་་བཤད་ཡོད་པ་རེད་