ཨ་རི་སྲིད་འཛིན་གྱིས་༸གོང་ས་མཆོག་དང་མཇལ་འཕྲད་གནང་རྒྱུ།

༄༎རྒྱ་ནག་གིས་ངོ་རྒོལ་བྱེད་བཞིན་དུ་ཨ་མི་རི་ཀའི་སྲིད་འཛིན་སྦ་ར་ཨོ་སྦ་མ་མཆོག་༧གོང་ས་སྐྱབས་མགོན་ཆེན་པོ་མཆོག་དང་མཇལ་འཕྲད་གནང་རྒྱུ་ཡིན་པའི་སྐོར་འབྲེལ་ཡོད་ཨ་མི་རི་ཀའི་སྲིད་འཛིན་ལས་ཁང་གི་ལས་བྱེད་ཀྱིས་ནན་བརྗོད་གནང་བའི་གནས་ཚུལ་ཐོན་འདུག

ཕྱི་ལོ་ཉིས་སྲྟོང་དགུའི་ཕྱི་ཟླ་བཅུ་པའི་ནང་ཨ་མི་རི་ཀའི་རྒྱལ་ས་ཝ་ཤིང་ཌོན་དུ།༧གོང་ས་སྐྱབས་མགོན་ཆེན་པོ་མཆོག་གིས་བདུན་ཕྲག་གཅིག་མིན་ཙམ་གྱི་མཛད་རིམ་བསྐྱངས་པའི་སྐབས།ཨ་མི་རི་ཀའི་སྲིད་འཛིན་ཨོ་སྦ་མཆོག་གིས་༧གོང་ས་སྐྱབས་མགོན་ཆེན་པོ་མཆོག་དང་མཇད་འཕྲད་གནང་མེད་ཅིང།རྒྱ་ནག་གི་རྒྱལ་དོན་འཚམས་གཟིགས་གྲུབ་པའི་རྗེས་སུ་མཇལ་འཕྲད་གནང་རྒྱུ་ཡིན་པའི་སྐོར་བཀའ་གནང་ཡོད་པ་རེད།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཀྱང་།ཕྱི་ལོ་ཉིས་སྟོང་བཅུའི་འགོ་སྟོད་ནང་ཨ་མི་རི་ཀའི་སྲིད་འཛིན་མཆོག་དང་མཇལ་འཕྲད་གནང་རྒྱུའི་སྐོར་བཀའ་གནང་ཡོད་པ་རེད།དེ་མ་ཟད་ཉེ་སྔོན་ཨ་མི་རི་ཀའི་སྲིད་འཛིན་ལས་ཁང་གི་མགྲིན་ཚབ་པ་མའི་ཀི་ཧེ་མར་གྱིས།རྒྱལ་ས་ཝ་ཤིང་ཌོན་དུ་གསར་འགོད་པར་ཨ་མི་རི་ཀའི་སྲིད་འཛིན་ཨོ་སྦ་མ་མཆོག་གི་ངོས་ནས།༧གོང་ས་སྐྱབས་མགོན་ཆེན་པོ་མཆོག་མཇལ་འཕྲད་གནང་རྒྱུ་ཡིན་པ་ཐུགས་གཏན་འཁེལ་བའི་གནད་དོན་ཞིག་ཡིན་པ་དང་།སྲིད་འཛིན་མཆོག་གིས་རྒྱ་ནག་གི་དཔོན་རིགས་རྣམས་ལ་ཡང་༧གོང་ས་མཆོག་དང་མཇལ་འཕྲད་གནང་རྒྱུ་ཡིན་པའི་སྐོར་གསུངས་གྲུབ་ཡོད་པ་བརྗོད་འདུག

འོན་ཀྱང་ཕྱོགས་གཉིས་ཀའི་ངོས་ནས་མཇལ་འཕྲད་ཀྱི་ཟླ་ཚེས་གསལ་ཁ་བཏོན་གནང་མེད་ཀྱང་།ཕྱི་ཟླ་གཉིས་པའི་ཟླ་དཀྱིལ་ཙམ་དུ་མཇལ་འཕྲད་གནང་སྲིད་པའི་ཚོད་དཔག་གནང་གི་ཡོད་པ་བཅས་ཀྱི་གནས་ཚུལ་ཐོན་འདུག།