ཨ་རིས་རྒྱ་ནག་དང་འགྲོ་བ་མིའི་ཐོབ་ཐང་སྐོར་གླེང་སློང་གནང་རྒྱུ།

༄༅༎བདུན་རྗེས་མ་རྒྱ་ནག་གི་སྲིད་འཛིན་ཧུ་ཅིང་ཏའོ་ཨ་རིའི་ནང་གཞུང་དོན་ཕྱོགས་སྐྱོད་ལ་འབྱོར་རྒྱུ་ཡིན་པའི་གོང་དེར། ཨ་རིའི་སྲིད་འཛིན་ ཨོ་བ་མ་མཆོག་གིས་རེས་གཟའ་ཕུར་བུའི་ཉིན་རྒྱ་ནག་ནང་གི་འགྲོ་བ་མིའི་ཐོབ་ཐང་དོན་གཉེར་མི་སྣ་ལྔ་དང་ཐུགས་འཕྲད་གནང་ཡོད་པའི་སྐོར་ཨ་རིའི་སྲིད་འཛིན་ཕོ་བྲང་དཀར་པོའི་མགྲིན་ཚབ་པས་གསུང་བཞག།

ཨ་རིའི་སྲིད་འཛིན་མཆོག་གིས་དུས་ཡུན་སྐར་མ་༧༥རིང་ཕོ་བྲང་དཀར་པོའི་ནང་རྒྱ་ནག་གི་འགྲོ་བ་མིའི་ཐོབ་ཐང་དོན་གཉེར་བ་དང་ཐུགས་འཕྲད་གནང་ཡག་དེ་ནི་སྲིད་འཛིན་ཨོ་བ་མ་མཆོག་གིས་ཕོ་བྲང་དཀར་པོའི་ནང་རྒྱ་ནག་གི་འགྲོ་བ་མིའི་ཐོབ་ཐང་དོན་གཉེར་བ་དང་ཐུགས་འཕྲད་གནང་བ་ད་རེས་ཐེངས་དང་པོ་དེ་ཡིན་པ་དང༌། དེའང་རྒྱ་ནག་གི་སྲིད་འཛིན་ཧུ་ཅིང་ཏའོ་དང་ལྷན་འཛོམས་གནང་རྒྱུའི་གྲ་སྒྲིག་ཞིག་ཀྱང་ཡིན་པ་རེད།

ཨ་རིའི་སྲིད་འཛིན་ཨོ་བ་མ་མཆོག་གིས་རྒྱ་ནག་གི་སྲིད་འཛིན་ཧུ་མཉམ་ཟུང་འབྲེལ་གསར་འགོད་ལྷན་ཚོགས་གནང་སྐབས་འགྲོ་བ་མིའི་ཐོབ་ཐང་སྐོར་གསུང་རྒྱུ་ཡིན་པ་མ་ཟད་ནང་མོལ་མཇལ་འཕྲད་སྐབས་སུའང་གནད་དོན་ད་གའི་སྐོར་བཀའ་མོལ་གནང་རྒྱུ་ཡིན་ལུགས་ འབྲེལ་ཡོད་ཨ་རིའི་དཔོན་རིགས་ཀྱིས་གསུངས་པ་ཨ་རིའི་ལྦ་ཤིང་ཊོན་ཕོ་ཉ་གསར་ཤོག་གིས་ལུང་འདྲེན་གནང་འདུག། 

རྒྱ་ནག་གི་སྲིད་འཛིན་ཧུ་ཅིང་ཏའོ་བདུན་རྗེས་མ་ཨ་རིའི་ནང་གཞུང་དོན་ཕྱོགས་སྐྱོད་ལ་ཕེབས་དགོས་དོན་གཙོ་བོ་ནི་བྱང་ཀོ་རི་ཡའི་རྡུལ་ཕྲན་ལས་འཆར་དང་འབྲེལ་བའི་བདེ་འཇགས་ཀྱི་གནད་དོན་དང་རྒྱ་ནག་གི་དངུལ་གི་ཛ་ཐང་དང་འབྲེལ་བའི་དཔལ་འབྱོར་གྱི་གནད་དོན་སྐོར་ཨ་རིའི་སྲིད་འཛིན་མཆོག་དང་གྲོས་མོལ་གནང་རྒྱུ་ཡིན་པ་རེད། གོང་ཞུས་ཨ་རིའི་གསར་ཤོག་དེའི་ནང་ སྲིད་འཛིན་ཨོ་བ་མ་དང་མཇལ་འཕྲད་ཞུ་མཁན་འགྲོ་བ་མིའི་ཐོབ་ཐང་དོན་གཉེར་བ་ལྔ་པོ་དེ་རྣམས་ནི། ཀོ་ལམ་བི་ཡ་གཙུག་ལག་སློབ་གྲྭ་ཆེན་མོའི་ཨེམ་དོ་རི་ནེ་ཐེན་དང་རྒྱ་ནག་གི་གཞོན་ནུའི་རིག་གཞུང་སྐོར་ལ་མཁས་པ་ཀྲ་ཅིའན་དབྱིང་ ཡེལ་གཙུག་ལག་སློབ་གྲྭ་ཆེན་མོའི་ནང་རྒྱ་ནག་གི་ཁྲིམས་ལུགས་ལྟེ་གནས་ཁང་གསར་འཛུགས་གནང་མཁན་པོལ་ག་ལྦིཛ་ རྒྱ་ནག་ནང་བསྐྱེད་པའི་རྩོམ་པ་པོ་སྦེ་ཏི་བའོ་ལོདྲ་དང༌། ༡༩༨༠ནས་བཟུང་ཨ་རིའི་ནང་གནས་སྡོད་རྒྱ་ནག་གི་འགྲོ་བ་མིའི་ཐོབ་ཐང་དོན་གཉེར་བ་ལི་ཤའ་རོང་བཅས་ཡིན་པ་རེད།།