ཧུའུ་ཇིན་ཏའོས་ཨ་རིའི་སྲིད་འཛིན་གསར་པར་ཞལ་དཔར་ཕུལ་བ།

༄༅༎རེས་གཟའ་ཉི་མའི་ཉིན་རྒྱ་ནག་གི་སྲིད་འཛིན་ཧུའུ་ཇིན་ཏའོས་ཨ་མི་རི་ཀའི་སྲིད་འཛིན་གསར་པ་སྐུ་ཞབས་སྦ་རཀ་ཨོ་སྦ་མ་མཆོག་ལ་ཞལ་དཔར་གནང་སྟེ་ཁོང་རྣམ་གཉིས་དབར་བཀའ་མོལ་གནང་སྐབས་ཐའེ་ལྦན་གྱི་གནད་དོན་ཐད་ལ་ཨ་མི་རི་ཀའི་སྲིད་འཛིན་མཆོག་གིས་འོས་མཚམ་ལྡན་པའི་ཐོག་ནས་འབྲེལ་བ་གནང་བ་ཡིན་ན་དེ་ཡིས་རྒྱ་ནག་དང་ཨ་མི་རི་ཀའི་དབར་གྱི་འབྲེལ་བ་བཟང་དུ་འགྲོ་རྒྱུར་ཕན་རླབས་བྱེད་ཀྱི་རེད་ཅེས་ཧུའུ་ཇིན་ཏའོ་ཡིས་བརྗོད་ཡོད་པ་རེད། ཐའེ་ལྦན་གྱི་སྲུང་སྐྱོབ་དགོས་མཁོ་དང་བསྟུན་ཏེ་ཨ་མི་རི་ཀས་ཐའེ་ལྦན་ལ་གོ་ལག་མཚོན་ཆ་འཚོང་འགྲེམས་བྱ་རྒྱུའི་སྲིད་བྱུས་དེ་ཡང་མཚམས་འཇོག་གནང་ཐབས་སྐོར་ཧུའུ་ཇིན་ཏའོ་ཡིས་རེ་འདུན་བཏོན་ཡོད་པ་རེད། སྐུ་ཞབས་སྦ་རཀ་ཨོ་སྦ་མ་མཆོག་གིས་སྲིད་འཛིན་འོས་བསྡུའི་དྲིལ་བསྒྲགས་གནང་སྐབས་ཐའེ་ལྦན་ལ་མཚོན་ཆ་འཚོང་འགྲེམས་གནང་རྒྱུ་སྲིད་བྱུས་ཐོག་ལ་རྒྱབ་སྐྱོར་ཡོད་ཚུལ་གསུངས་ཡོད་པ་རེད། སྐུ་ཞབས་སྦ་རག་ཨོ་སྦ་མ་མཆོག་གི་ངོས་ནས་དེང་སྐབས་ཀྱི་འཛམ་གླིང་གི་ཆབ་སྲིད་གླེང་བསྟེགས་ནང་ཨ་མི་རི་ཀ་དང་རྒྱ་ནག་དབར་གྱི་འབྲེལ་བ་དེ་ནི་གལ་འགངས་ཆེ་ཤོས་གྲས་ཤིག་རེད་ཅེས་རྒྱ་ནག་གི་སྲིད་འཛིན་མཆོག་ལ་བཀའ་ལན་གནང་ཡོད་པ་རེད༎