དངོས་བྱུང་གློག་བརྙན་འདི་ངའི་ཁྱིམ་འདི་ཡིན་ཟེར་ས་མི་འདུག

ཨ་རིའི་གསར་འགོད་པས་བོད་དང་གྲངས་ཉུང་མི་རིགས་ལ་འཕྲད་བཞིན་པའི་མི་རིགས་དབྱེ་འབྱེད་ཀྱི་དཀའ་ངལ་གནས་སྟངས་གསལ་བཏོན་གནང་འདུག
དེ་ཡང་ཨ་མི་རི་ཀའི་གསར་འགོད་པ་ཞིག་གིས་རྒྱ་ནག་པེ་ཅིན་ལ་ཡོད་པའི་བོད་རིགས་བུད་མེད་ཞིག་གི་འཚོ་བ་དངོས་དང་འབྲེལ་ནས་དངོས་བྱུང་གློག་བརྙན་ངའི་ཁྱིམ་འདི་ཡིན་ཟེར་ས་མི་འདུག་ཞེས་བ་བཟོ་བསྐྲུན་གྱིས་རྒྱ་ནག་ནང་བོད་མི་གཙོ་བའི་གྲངས་ཉུང་མི་རིགས་ལ་འཕྲད་བཞིན་པའི་མི་རིགས་དབྱེ་འབྱེད་ཀྱི་དཀའ་ངལ་ཁག་གཅིག་གསལ་བཏོན་གནང་ཡོད་པ་རེད། ངའི་ཁྱིམ་འདི་ཡིན་ཟེར་ས་མི་འདུག་ཅེས་བའི་དངོས་བྱུང་གློག་བརྙན་དེའི་ངོ་སྤྲོད་ཚན་པ་ཞིག་ཕྱི་ལ་སྤེལ་པའི་ནང་། ནང་དགུང་གྲངས་༢༨་ལ་སླེབས་པའི་བོད་རིགས་བུད་མེད་Zantaཞེས་བའི་བཟའ་ཟླ་འདས་གྲོངས་སུ་སོང་རྗེས། ལོ་ན་བདུན་ཙམ་ཡིན་པའི་ཁོང་གི་བུ་ཕྲུག་གི་མདུན་ལམ་ཆེད་རྒྱ་ནག་པེ་ཅིན་ལ་སོང་ནས་འཚོ་བ་སྐྱེལ་ཐབས་བྱེད་བཞིན་པའི་འཚོ་བ་དངོས་དང་འབྲེལ་ཡོད་པ་དང་། རྒྱ་ཧན་མི་རིགས་ཕོན་ཆེ་འདུས་པའི་གྲོང་ཁྱེར་པེ་ཅིན་དུ་རྒྱ་བོད་གཉིས་ཀྱི་ཆབ་སྲིད་ཀྱི་རྙོག་དྲའི་འོག་མི་རིགས་དབྱེ་འབྱེད་ཀྱི་དཀའ་ངལ་ཤུགས་ཆེན་ཡོད་པ་དང་། བོད་མི་ལ་མཐོང་ཆུང་བརྙས་བཅོས་བྱེད་པ་མ་ཟད། ཐ་ན་བོད་མི་ཡིན་ན་སྡོད་སའི་ཁང་བ་མི་གཡར་བ་སོགས་ཀྱི་དཀའ་ངལ་བོ་གསལ་སྟོན་བྱས་ཡོད་པ་རེད། འོན་ཀྱང་ཁོ་མོས་བུ་ཕྲུག་གི་མདུན་ལམ་ཆེད་པེ་ཅིན་ཁྲོམ་ལམ་དུ་མུ་མཐུད་དཀའ་ངལ་ལ་མ་འཛེམ་པར་བོད་དང་འབྲེལ་བའི་ཅ་དངོས་ཙག་ཙིག་གི་ཐང་ཁྲོམ་བསྟན་ནས་བསྡད་ཡོད་པ་རེད།
གློག་བརྙན་དེས་བོད་མི་ཚོ་རྒྱ་ནག་གི་གྲོང་ཁྱེར་ཁག་གི་ནང་ལས་དོན་འདྲ་མིན་ཆེད་བསྐྱོད་སྐབས་མཐོང་ཆུང་བརྙས་དཀའ་ཡོང་བཞིན་པ་འཚོ་བ་དངོས་དང་སྦྱར་ཡོད་པ་དང་། དེའི་ཐད་ཀྱི་དངོས་ཡོད་གནས་སྟངས་ཕྱིར་བསྒྲགས་གནང་བའི་གློག་བརྙན་ཐོག་མའི་གྲས་ཡིན་པར། དེ་ནི་རྒྱ་ནག་གི་རྒྱལ་ས་པེ་ཅིང་དུ་རྟེན་གཞི་བྱེད་པའི་ཨ་མི་རི་ཀའི་གློག་བརྙན་བཟོ་བསྐྲུན་པ་དང་། གསར་འགོད་པ་Jocelyn Fordལགས་པེ་ཅིན་ཁྲོམ་གཞུང་ནས་གོང་གི་བོད་པའི་བུད་མེད་དེའི་ཐང་ཁྲོམ་སྟོན་བཞིན་པའི་སྐབས་དངོས་སུ་ཐུག་འཕྲད་བྱུང་རྗེས་འཚོ་དངོས་དང་སྦྱར་ནས་བཟོ་བསྐྲུན་གནང་བའི་གློག་བརྙན་ཞིག་ཡིན་པ་རེད།
གློག་བརྙན་གྱི་མཚམས་སྦྱོར་ཚན་པ་གཤམ་གྱི་དྲ་ཐག་ནས་གཟིགས་ཐུབ།

གསར་འགོད་པ་དབྱངས་སྒྲོན།