ནོ་བེལ་བྱ་དགའ་དཔྱད་བསྡུར་ཚོགས་མིས་ལྐོག་རྔན་ལེན་མིན།

༄༅༎ནོ་བེལ་གཟེངས་བསྟོད་བྱ་དགའ་དཔྱད་བསྡུར་ཚོགས་མིས་རྒྱ་ནག་ལ་འཚམས་འདྲིར་བསྐྱོད་དེ་ལྐོག་རྔན་ལེན་པའི་འབྲེལ་བར་བརྟག་དཔྱད་བྱེད་བཞིན་ཡོད་འདུག

དེའང་ནོ་བེལ་ཚན་རིག་བྱ་དགའི་དཔྱད་བསྡུར་མཁན་གྱིས་རྒྱ་ནག་གཞུང་གི་སྣེ་ལེན་གདན་ཞུ་ཐེངས་མང་དང་ལེན་བྱས་ཏེ་རྒྱ་ནག་ལ་འཚམས་འདྲིར་བསྐྱོད་ནས་ལྐོག་རྔན་ལེན་ཡོད་མེད་ལ་སུའུ་ལྦི་ཌེན་ཞིབ་དཔྱོད་ཁང་ནས་བརྟག་དཔྱད་བྱེད་བཞིན་ཡོད་པ་རེད། གལ་སྲིད་ཉེས་འཛུགས་བྱས་ཚེ་དུས་བཀག་བཙོན་འཇུག་ལོ་གཉིས་ཀྱི་གནས་སྟངས་འཕྲད་སྲིད་པ་རེད། སུའུ་ལྦི་ཌེན་གཞུང་གི་ལྐོག་ཟ་ལ་རྒོལ་བའི་གྱོད་དོན་ཞིབ་དཔྱོད་དཔོན་ཉིའིར་སི་ཧྲུའུ་ཚི་ཡིས་རྣམ་པ་བསྟེན་ཡག་ལ་ནོ་བེལ་བྱ་དགའ་དཔྱད་བསྡུར་ཚོགས་མི་ཡིས་སྤྱི་ལོ་༢༠༠༦དང་༢༠༠༨ལོར་རྒྱ་ནག་གཞུང་གིས་འགྲོ་གྲོན་བཏང་ནས་རྒྱ་ནག་ཏུ་ཐེངས་ཁ་ཤས་བསྐྱོད་ཡོད་པས་དེས་བྱ་དགའ་སྤྲོད་ཡུལ་འདེམས་སྒྲུག་ལ་ཤུགས་རྐྱེན་གྱི་ཀུན་སློང་ཐེབས་ཡོད་མེད་ལ་གསལ་རྟོགས་བྱེད་ཐུབ་རྒྱུར་རེ་བ་བྱེད་ཀྱི་ཡོད་ཅེས་བཤད་ཡོད་འདུག ནོ་བེལ་རྫས་འགྱུར་དང་དངོས་ཁམས།དཔལ་འབྱོར་བྱ་དགའི་སྤྲོད་ཐབས་ཀྱི་འགན་འཁུར་མཁན་རུའི་ཏན་གོང་མ་ཚང་གི་ཚན་རིག་ཁང་གི་གཙོ་འཛིན་ཨའོ་ཅ་སི་ཐའ་ནས་གོང་གསལ་འཚམས་འདྲི་དེ་ལྟ་བུ་ནི་འོས་ཤིང་འཚམས་པ་ཞིག་མ་རེད། ང་ཚོས་ངེས་པར་དུ་ཧ་ཅང་ཟབ་ནན་གྱི་སྒོ་ནས་ནོ་བེལ་དཔྱད་བསྡུར་ལྷན་ཁང་གི་ལས་དོན་ལ་དོགས་པ་ཡོང་གཞི་ཞིག་མི་ཡོང་བ་བྱེད་དགོས་པ་ཡིན།གལ་སྲིད་ང་ཚོས་འཚམས་འདྲི་དེའི་རིགས་སྔོན་ནས་ཤེས་རྟོགས་བྱུང་ཡོད་ན་ང་ཚོས་ཁོང་ཚོ་བསྐྱོད་རྒྱུར་སྐུལ་ལྕག་བྱེད་ཀྱི་མ་རེད་ཅེས་གསུང་གླེང་གནང་ཡོད་འདུག