ཨ་རིའི་ནེ་ལྦཀ་གྲོང་ཁྱེར་ནང་བོད་ཀྱི་གནའ་རྫས་སྐོར་བགྲོ་གླེང༌།

༄༅༎ཨ་རིའི་མངའ་སྡེ་ནིའུ་ཇར་སིའི་གྲོང་ཁྱེར་ནེ་ལྦཀ་ནང་རྟེན་གཞི་བྱས་པའི་ནེ་ལྦཀ་འགྲེམས་སྟོན་ཁང་གིས་མངའ་སྡེ་དེའི་ནང་གི་ཀྲི་ནེཀ་ ཞེས་པའི་གྲོང་ཁྱེར་གྱི་དཔེ་མཛོད་ཁང་དུ་བོད་དང་བོད་ཀྱི་རྩ་ཆེའི་དངོས་རྗས་ཅེས་པའི་སྐོར་བགྲོ་གླེང་དང་ངོ་སྤྲོད་ཀྱི་གསུང་བཤད་གོ་སྒྲིག་ཞུ་རྒྱུ་ཡིན་པའི་སྐོར་གནས་ཚུལ་ཐོན་འདུག
ནེ་ལྦཀ་འགྲེམས་སྟོན་ཁང་ནི་ནིའུ་ཇར་སི་མངའ་སྡེ་ནང་གི་འགྲེམས་སྟོན་ཁང་རྒྱ་ཆེ་ཤོས་དེ་ཡིན་ཞིང་། འགྲེམས་སྟོན་ཁང་དེའི་ནང་རིག་གཞུང་དང་དངོས་རྗས་འདྲ་མིན་ཁག་༨༠ཐམ་མའི་སྡེ་ཚན་ཡོད་པ་རེད། དེའི་ཁོངས་སུ་བོད་ཀྱི་སྡེ་ཚན་དེ་བཞིན་རྒྱལ་སྤྱིའི་ཐོག་བོད་ཀྱི་དངོས་རྗས་དང་སྒྱུར་རྩལ་གྱི་འགྲེམས་སྟོན་སྣ་འཛོམས་ཆེ་ཤོས་ཤིག་ལ་ཡོངས་གྲགས་ངོས་འཛིན་བྱེད་བཞིན་ཡོད་འདུག ནེ་ལྦཀ་འགྲེམས་སྟོན་དབུ་བརྙེས་ནས་ལོ་བརྒྱ་འཁོར་བའི་དགའ་སྟོན་སྲུང་བརྩི་ཞུ་བཞིན་འདུག་པ་དང་། དེའི་ཁོངས་སུ་འགྲེམས་སྟོན་ཁང་གི་གོ་སྒྲིག་འོག་ཀྲི་ནེཀ་ཞེས་པའི་ས་གནས་ཀྱི་སྤྱི་བའི་དཔེ་མཛོད་ཁང་དུ་བོད་དང་བོད་ཀྱི་དངོས་རྗས་ཅེས་བོད་ཀྱི་ལོ་རྒྱུས་དང་། བོད་མིའི་ཆོས་དང་རིག་གཞུང་། སྲོལ་རྒྱུན་གོམས་གཤིས། བོད་ཀྱི་སྒྱུ་རྩལ་དང་། བོད་མིའི་རྒྱུན་ལྡན་གྱི་འཚོ་བའི་བྱ་གཞག་སོགས དངོས་རྗས་ཀྱི་ལམ་ནས་འགྲེམས་སྟོན་གནང་བ་དང། དེ་བཞིན་མཁས་པའི་ངོ་སྤྲོད་དང་གསུང་བཤད་སོགས་གོ་སྒྲིག་ཞུ་རྒྱུ་ཡིན་འདུག།