བོད་མཐོ་སྒང་དུ་གནས་པའི་བོད་མིའི་རིགས་རྒྱུན་ས་བོན་ལ་འགྱུར་བ།

བོད་ཀྱི་རིགས་རྒྱུད་ཀྱི་རྣམ་པར་དུས་དང་ཁོར་ཡུག་གི་གནས་སྟངས་དང་མཐུན་པའི་འགྱུར་ལྡོག་བྱུང་ཚུལ་རྐྱེན་རྩ་རྩད་ཆོད་བྱུང་འདུག
ཆ་སྙོམས་མཚོ་ངོས་ནས་མཐོ་ཚད་མི་ཀྲར་ཆིག་སྟོང་གཉིས་བརྒྱ་ཙམ་གྱི་མཐོ་སྒང་དུ་བོད་མི་རྣམས་གནས་སྡོད་བྱེད་ཐུབ་པའི་རྒྱུ་མཚན་ནི། ས་མཐོའི་གནས་སྟངས་ལ་གཞིགས་པའི་བོད་མིའི་རིགས་རྒྱུད་ཀྱི་རྣམ་པ་ལ་དུས་དང་མཚམས་པའི་འགྱུར་བ་ཕྱིན་པའི་རྒྱུ་མཚན་གྱི་ཡིན་པ་ཚན་རིག་པས་ཉམས་ཞིབ་བྱས་པ་ནས་གསལ་ཐོན་ཡོང་གི་ཡོད་འདུག
དེ་ཡང་ད་བར་འཛམ་གླིང་གི་མི་མང་གཞན་ཚོས། གྲང་ངར་ཆེ་ཞིང༌། ཉི་མའི་ཟེར་དུག་གི་ངར་ཆེ་བ་དང་། དེ་བཞིན་ཟ་བཅའི་མཐུན་རྐྱེན་དཀོན་པའི་མཐོ་སྒང་བོད་དུ་བོད་མི་རྣམས་གནས་ཐུབ་པ་དེར་ཡ་མཚན་གྱི་བལྟ་ཚུལ་ཞིག་འཛིན་གྱི་ཡོད་པ་དེ་ལྟར་ཡང༌། འདས་པའི་དུས་ཡུན་གང་མཚམས་རིང་ཚན་རིག་པས་བོད་མིའི་རིགས་རྒྱུན་ས་བོན་ལ་ཞིབ་འཇུག་རྟག་དཔྱད་བྱས་པའི་འབྲས་བུར། བོད་ཀྱི་མཐོ་སྒང་དུ་དུས་ནས་དུས་སུ་ཁོར་ཡུག་དང༌། ཟས་བཅུད་སོགས་ཀྱི་འགྱུར་ལྡོག་ཕྱིན་པ་དང་མཉམ་དུ་བོད་མིའི་རིགས་རྒྱུད་ཀྱི་རྣམ་པར་ཡང་འགྱུར་བ་འགྲོ་ཐུབ་པ་བྱུང་བའི་རྐྱེན་རྩ་རྣམ་གྲངས་བདུན་རྩད་གཅོད་ཐུབ་པ་བྱུང་ཡོད་འདུག རིགས་རྒྱུད་ཀྱི་རྣམ་པར་དུས་དང་ཁོར་ཡུག་གི་གནས་སྟངས་དང་མཐུན་པའི་འགྱུར་ལྡོག་འགྲོ་ཐུབ་པ་བྱུང་བ་དེའི་རྐྱེན་པས། གྲང་ངར་ཆེ་ཞིང༌། སྲོག་འཚོ་བའི་རླུང་དང་འཚོ་བའི་མཐུན་རྐྱེན་ཆེས་ཞན་པའི་མཐོ་སྒང་བོད་དུ་བོད་མི་རྣམས་གནས་སྡོད་བྱེད་ཐུབ་ཀྱི་ཡོད་པ་ཨོས་ཀྲོརོ་ལི་ཡའི་གྲོང་ཁྱེར་ (Brisbane) ནང་རྟེན་གཞི་བྱེད་པའི་ (Queensland) གཙུག་ལག་སློབ་གྲྭ་ཆེན་མོ་དང༌། རྒྱ་ནག་ནང་ཡོད་པའི་ (Wenzhou) སྨན་གཞུང་གཙུག་ལག་སློབ་གྲྭ་ཆེན་མོའི་ཚན་རིག་པ་ཁག་ཅིག་ཟུང་འབྲེལ་གྱི་ཐོག་ནས་ཞིབ་འཇུག་བྱས་པ་ནས་ཤེས་རྟོགས་ཐུབ་པ་བྱུང་ཡོད་འདུག།

གསར་འགོད་པ་ངག་ཆོས།