རྒྱ་ནག་ནང་ཚོཊ་པ་མང་པོ་ཡོད་ན་དཀའ་ངལ་འཕྲད་སྲིད།

༄༅༎རྒྱ་ནག་གུང་གྲན་ཏང་དབུ་བརྙེས་ནས་ལོ་ངོ་དགུ་བཅུ་འཁོར་བའི་དུས་དྲན་ཉིན། རྒྱ་ནག་གཞུང་གི་གསར་འགྱུར་བརྒྱུད་ལམ་ཁག་ནང་སྤེལ་བའི་ཆེད་བརྗོད་ཀྱི་སྙིང་དོན་ནི།

སྲིད་དོན་ཚོགས་པ་སྣ་ཚོགས་ཡོད་པའི་ལམ་ལུགས་ཡོད་ན། རིག་གནས་གསར་བརྗེའི་སྐབས་དང་མཚུངས་པའི་ཟིང་འཁྲུག་ཡོང་གི་ཡོད་ལུགས་བཀོད་ཡོད་པ་རེད།  དེ་ཡང་རེས་གཟའ་པ་སངས་ཉིན་རྒྱ་ནག་གུང་གྲན་ཁོ་ནས་སྲིད་དབང་བཟུང་ནས་རྒྱུན་རིང་ཕྱིན་པའི་དུས་སྟོན་ཉིན་སྤེལ་བའི་གཞུང་འབྲེལ་གསར་འགྱུར་བརྒྱུད་ལམ་གྱི་ཆེད་བརྗོད་ནང་། ནུབ་ཕྱོགས་ཡུལ་གྲུ་ཁག་ནང་དར་བའི་ཆབ་སྲིད་རིང་ལུགས་ནི།  རྒྱ་ནག་གི་རང་བཞིན་གནས་བབས་ལ་འོས་འཚམས་མེད་ཅིང་། གལ་ཏེ་རྒྱ་ནག་གིས་ནུབ་ཕྱོགས་པའི་སྲིད་དོན་ཚོགས་པ་མང་པོ་ཡོད་པའི་གྲོས་ཚོགས་ཀྱི་ཆབ་སྲིད་ལམ་ལུགས་ལ་དཔེ་བལྟ་བ་ཡིན་ན། རིག་གནས་གསར་བརྗེའི་སྐབས་ཀྱི་ཟིང་འཁྲུག་དང་བག་ལྷོད་མེད་པའི་ལོ་རྒྱུས་བསྐྱར་ཟློས་བྱེད་སྲིད་པ་དང་།   ཤོག་ཁག་འདྲ་མིན་ཡང་ལངས་སྲིད་པ་རེད་ཅེས། རྒྱ་ནག་གི་གཞུངའབྲེལ་གསར་འགྱུར་བརྒྱུད་ལམ་ཁག་ནང་བཀོད་འདུག 

ཕྱི་ལོ་༡༩༦༦ནས་༡༩༧༦་བར་གྱི་རིག་གནས་གསར་བརྗེའི་ལས་འགུལ་དེ་མའོ་ཚེ་ཐུང་གིས་མ་རྩའི་རིང་ལུགས་ལ་ཁ་གཏད་བཅོག་ཆེད་སྤེལ་བ་ཡིན་ཞིང་། དེ་ནི་མའོ་ཚེ་ཐུང་གི་ལྟ་བ་མཐར་ལྷུང་བའི་རྫོགས་ལྡན་བསམ་བློར་དགའ་མོས་མི་བྱེད་མཁན་ཚོ་རྩ་མེད་བཟོ་བའི་ལས་འགུལ་ཞིག་ཡིན་པ་རེད། མའོ་ཚེ་ཐུང་གི་ལས་འགུལ་དེའི་ནང་མི་མང་མཐོ་འབྲིང་བར་གསུམ་ལ་མུ་མཐའ་མེད་པའི་སྡུག་བསྔལ་མྱོང་དགོས་བྱུང་བ་རེད།  གང་ལྟར་ཕྱི་ལོ་༡༩༢༡་ལོར་གུང་གྲན་ཏང་དབུ་བརྙེས་ཏེ་ཕྱི་ལོ་༡༩༤༩་ལོར་སྲིད་དབང་བསྒྱུར་ནས་ད་བར་ལོ་གྲངས་དགུ་བཅུ་སོང་ཡང་། ད་དུང་སྲིད་དབང་དམ་འཛིན་བྱ་རྒྱུ་ལས་ཆབ་སྲིད་བཅོས་བསྒྱུར་གཏོང་འཆར་མེད་པ་སྲིད་འཛིན་ཧུ་ཅིན་ཏའོ་ཡིས་གཏམ་བཤད་ནང་མངོན་པར་གསལ་བ་བྱས་ཡོད་པ་རེད།

འདས་པའི་ལོ་ངོ་བཅུ་ཕྲག་གསུམ་ཙམ་རིང་རྒྱ་ནག་མི་མང་ས་ཡ་ཉིས་བརྒྱ་བརྒལ་བ་ཉམ་ཐག་གི་དཀའ་སྡུག་ལས་གྲོལ་ཐུབ་པའི་གྲུབ་འབྲས་གསལ་བཏོན་གནང་སྟེ་གུང་གྲན་ཏང་གིས་རྒྱ་ནག་མི་མང་གི་བདེ་དོན་ལ་བལྟ་རྟོག་བྱེད་ཀྱི་ཡོད་པ་དང༌།

དེས་ན་སྲིད་འཛིན་ཧུ་ཅིན་ཏའོ་ཡིས་སྲིད་དབང་གུང་གྲན་ཏང་ཚོགས་པ་ཁོ་ནས། རྒྱ་ནག་གི་སྲིད་དབང་བཟུང་དང་བཟུང་བཞིན་པ་དེ་ཁྲིམས་མཐུན་ཆགས་ཀྱི་ཡོད་པའི་དག་ཐེར་བྱེད་ཐབས་བྱས་ཡོད་པ་རེད།  འོན་ཀྱང་སྲིད་དོན་ཉམས་ཞིབ་པས་གསུངས་ན། རྒྱ་ནག་ནང་དཔལ་འབྱོར་འཕེལ་རྒྱས་འགྲོ་བཞིན་པ་ལྟར། ཆབ་སྲིད་དང་སྤྱི་ཚོགས་བཅོས་བསྒྱུར་འགྲོ་ཐུབ་མེད་པས་ད་ལྟ་དཀའ་རྙོག་མང་པོར་གདོང་ལེན་བྱེད་དགོས་ཤིང་། ལྷག་པར་དུ་ལྐོག་ཟ་རུལ་སུངས་དང་། དབུལ་ཕྱུག་མི་སྙོམ་པ།   ཁོར་ཡུག་འབག་བཙོག  བཟའ་བཅའ་དང་ཡུལ་དུས་རིན་གོང་འཕར་བ།  གྲངས་ཉུང་མི་རིགས་ཀྱིས་རང་སྐྱོང་ཐོབ་ཐང་རྩོད་བཞིན་པ་སོགས་གུང་གྲན་ཏང་གི་གཞུང་ལ་དཀའ་རྙོག་དུ་མར་གདོང་ལེན་བྱེད་དགོས་ཀྱི་ཡོད་པ་རེད༎