བོད་རྔ་པ་ཀིརྟི་དགོན་པར་བསུན་བཙིར་བྱེད་བཞིན་པ།

༄༅༎བོད་ཀྱི་ཨ་མདོ་རྔ་པ་ཀི་རྟི་དགོན་པའི་ནང་རྒྱ་ནག་གཞུང་གིས་ལས་བྱེད་འབོར་ཆེན་བཏང་ནས་དགེ་འདུན་པ་རྣམས་རེ་རེ་བཞིན་དུ་སོ་སོའི་གྲ་ཤག་ནང་རྒྱལ་གཅེས་ཆོས་གཅེས་ཀྱི་ལས་འགུལ་ཟེར་བའི་ནང་བསུན་བཙིར་བྱེད་བཞིན་པ་ཡིན་པ་གནས་ཚུལ་ཤེས་རྟོགས་བྱུང་འདུག་། འདི་ག་རླུང་འཕྲིན་ཁང་ནས་འབྲེལ་ཡོད་མི་སྣས་འགྲེལ་བརྗོད་གནང་དོན་ལྟར་ན་ རྔ་པ་ཀི་རྟི་དགོན་པའི་ནང་དགེ་འདུན་པ་རྣམས་མུ་མཐུད་ནས་དགོན་པའི་ནང་བཀག་ཉར་བྱས་པ་མ་ཟད་ ས་གནས་གཞན་ནས་འབྱོར་བའི་རྒྱ་ནག་གི་ལས་བྱེད་ཙམ་དུ་མ་ཟད་། རྔ་པ་རྗོང་གི་ལས་བྱེད་དང་ སློབ་གྲའི་དགེ་རྒན་ལས་བྱེད་སོགས་མི་གྲངས་བརྒྱད་བརྒྱ་ཙམ་དགོན་པའི་ནང་དུ་རྒྱལ་གཅེས་ཆོས་གཅེས་ཀྱི་ལས་འགུལ་ནང་མཉམ་ཞུགས་བྱེད་དགོས་པའི་བཀའ་བཏང་ནས་དགོན་པའི་ནང་འབྱོར་ཡོད་པ་དང་ དགོན་པའི་ནང་དུ་བཀག་ཉར་བྱེད་བཞིན་པའི་དགེ་འདུན་པ་རྣམས་ལ་མི་གྲངས་བཅུ་དང་ དེ་ནས་རིམ་བཞིན་དགེ་འདུན་རེ་རེ་སོ་སོའི་གྲ་ཤག་ནང་དྲི་བ་བཏང་བ་དང་ དགོངས་ཚུལ་བཤད་དུ་བཅུག་པ་སོགས་བྱས་ཡོད་པ་དང་ གལ་ཏེ་ལན་འདེབབས་དེ་རྒྱ་ནག་གི་འདོད་པ་ལྟར་མ་བྱུང་དུས་ད་དུང་སློབ་གསོ་ཐེབས་མེད་པའི་སྐྱོན་བརྗོད་བྱས་ནས་སློབ་གསོའི་ལས་འགུལ་དུས་འགྱངས་གཏོང་དགོས་པའི་འཇིགས་བསྐུལ་བྱས་ཡོད་པ་རེད་འདུག་། ས་གནས་ཀྱི་དད་ལྟན་པ་རྣམས་དགོན་པའི་ནང་དུ་ཆོས་མཇལ་འགྲོ་རྒྱུར་བཀག་འགོག་བྱས་ཡོད་པ་མ་ཟད་ དད་ལྡན་པ་རྣམས་དགོན་པའི་གླིང་བསྐོར་དུ་ཡང་འགྲོ་རྒྱུར་བཀག་འགོག་བྱས་ཡོད་པ་མ་ཟད་ བསྐོར་ལམ་དུ་ཡོད་པའི་མ་ཎིའི་འཁོར་ལོ་ཡང་གཟེར་ཀ་རྒྱབ་ནས་བེད་སྤྱོད་གཏོང་རྒྱུར་འགོག་རྐྱེན་བཟོས་ཡོད་པའི་གནས་ཚུལ་ཤེས་རྟོགས་བྱུང་འདུག་། བཙན་བྱོལ་ནང་གི་བོད་མིའི་གནས་ཡུལ་ས་གནས་མང་པོའི་ནང་ རྔ་པ་ཀི་རྟི་དགོན་པའི་དགེ་འདུན་པ་རྣམས་ཀྱི་ལྷན་དུ་གདུང་སེམས་མཉམ་བསྐྱེད་ཀྱི་ཆེད་ཟས་བཅད་ངོ་རྒོལ་དང་མར་མེའི་ཁྲོམས་བསྐོར་སོགས་གནང་བཞིན་པ་བཅས་ཀྱི་གནས་ཚུལ་ཐོན་འདུག་༎