༸གོང་ས་མཆོག་དང་ཨེསི་ཀྲོ་ནི་ཡའི་བློན་ཆེན་མཇལ་འཕྲད་གནང་རྒྱུ།

༄༅༎༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨེས་ཀྲོ་ནི་ཡའི་ནང་ཆིབས་བསྒྱུར་གནང་བའི་སྐབས་བློན་ཆེན་ཁག་ཅིག་མཇལ་འཕྲད་གནང་རྒྱུའི་མཛད་འཆར་ཡོད་འདུག

བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཟླ་བ་འདིའི་ཚེས་བཅུ་བཞི་ནས་ཕ་རན་སིའི་ནང་ཆིབས་བསྒྱུར་གྱིས་ཆོས་འབྲེལ་གྱི་མཛད་འཆར་ཁག་ཅིག་བསྐྱངས་གནང་གི་ཡོད་པ་དང་། དེ་ནས་ཤར་ཡུ་རོབ་ཀྱི་རྒྱལ་ཁབ་ཨིས་ཏོ་ནི་ཡའི་ནང་ཆིབས་བསྒྱུར་གནང་གི་ཡོད་འདུག

དེ་ཡང་ཕ་ཡུལ་དྲ་གནས་ནང་ད་རིང་གནས་ཚུལ་སྤེལ་བར་གཞིགས་ན། ༧གོང་ས་མཆོག་གི་ཁུལ་དེའི་ནང་གི་ཆིབས་བསྒྱུར་གོ་སྒྲིག་ཞུ་མཁན་ཆོས་ཚོགས་ཀྱི་འགན་འཛིན་ནས་གསར་འགོད་ལྷན་ཚོགས་ཐོག ༧གོང་ས་ཏཱ་ལའི་བླ་མ་མཆོག་ཨིས་ཏོ་ནི་ཡའི་ནང་ཕེབས་པའི་སྐབས་བློན་ཆེན་བཞི་ཙམ་དང་མཇལ་འཕྲད་གནང་རྒྱུ་མ་ཟད་ཚེས་བཅུ་བདུན་ཉིན་རྒྱལ་ས་ཏ་ལིན་ནང་། འཛམ་གླིང་ཀུན་ལ་ཁྱབ་པའི་འགན་འཁྲི་ཞེས་པའི་བརྗོད་གཞིའི་ཐོག་མང་ཚོགས་ལ་གསུང་བཤད་གནང་རྒྱུའི་མཛད་འཆར་ཡོད་པའི་སྐོར་འགྲེལ་བརྗོད་གནང་འདུག ཡང་ཁོང་གིས་མུ་མཐུད་ནས་༧གོང་ས་མཆོག་ཡུལ་འདིའི་ནང་ཆིབས་བསྒྱུར་གནང་རྒྱུར་རྒྱ་ནག་ནས་གནོན་ཤུགས་ཐེབས་དགོས་པའི་རྒྱུ་མཚན་གང་ཡང་མེད་ལུགས་གསུངས་དོན། ཨིས་ཏོ་ནི་ཡའི་རྒྱལ་ཁབ་འདི་བཞིན་རིན་ཐང་ལ་གུས་བཀུར་ཞུ་རྒྱུའི་སྲིད་བྱུས་འཛིན་མཁན་ཞིག་ཡིན་དུས། ༧གོང་ས་ཏཱ་ལའི་བླ་མ་མཆོག་ནི་འཛམ་གླིང་ཁྱོན་ཡོངས་སུ་ཞི་བདེ་དང་མིའི་རིན་ཐང་གོང་འཕེལ་གཏོང་གནང་མཁན་ཞིག་ཡིན་པ་རེད། དེ་འདྲ་ཡིན་དུས་༧གོང་ས་ཏཱ་ལའི་བླ་མ་མཆོག་ནི་རྒྱལ་ཁབ་ཀྱི་གཞི་རྩའི་ལངས་ཕྱོགས་དང་མཐུན་པའི་མི་སྣ་ཞིག་ཀྱང་ཆགས་ཀྱི་ཡོད་རེད་ཅེས་གསལ་བཤད་གནང་ཡོད་འདུག

ཟླ་བ་སྔོན་མའི་ནང་། ༧གོང་ས་མཆོག་ཨ་མི་རི་ཀའི་ནང་ཆིབས་བསྒྱུར་མཛད་འཕྲིན་སྐབས་སུའང་སྲིད་འཛིན་ཨོ་བྷ་མ་མཆོག་དང་། གྲོས་ཚོགས་གོང་འོག་གཉིས་ཀའི་འཐུས་མི་རྣམས་པ་དང་མཇལ་འཕྲད་གནང་བའི་སྐབས་སུའང་། རྒྱ་ནག་གཞུང་ནས་དེ་ནི་རྒྱ་ནག་གི་ནང་སྲིད་ལ་ཐེ་བྱུས་བྱེད་པ་ཞིག་རེད་ཅེས་སྐྱོན་བརྗོདཤུགས་ཆེ་བྱས་ཡོད་པ་རེད།།