སེམས་དང་སྲོག་གི་བགྲོ་གླེང་ཐེངས་༢༦པ།

༄༅།    ཟླ་བ་འདིའི་ཚེས་༡༧ཉིན་༧གོང་ས་མཆོག་གི་དབུ་བཞུགས་ཐོག་སེམས་དང་སྲོག་གི་བགྲོ་གླེང་ཚོགས་འདུ་ཐེངས་༢༦པ་དེ་དབུ་འཛུགས་གནང་ཡོད་པ་དང་།    ཚོགས་འདུ་དབུ་འབྱེད་ཀྱི་མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སྩལ་དོན།    འགོ་སྟོད་དུ་ཚན་རིག་པ་དང་ལྷན་དུ་འབྲེལ་བ་བྱས་ན་ཡག་པོ་མེད་སྐོར་ཕྱི་རྒྱལ་གྱི་མིས་ཀྱང་ངོས་ལ་བཤད་བྱུང་། འོན་ཀྱང་ངོས་ཀྱིས།    དགེ་སློང་བདག་གམ་མཁས་རྣམས་ཀྱིས། །བསྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བ་བྱ་ཡི་གུས་ཕྱིར་མིན། །    ཞེས་པ་དེར་བསམ་བློ་གཏོང་གི་ཡོད། ཚན་རིག་པས་བདེན་དོན་འཚོལ་གྱི་ཡོད་པ་རེད་ལ།    སངས་རྒྱས་པའི་ཆོས་ཀྱིས་ཀྱང་བདེན་དོན་འཚོལ་གྱི་ཡོད། ངོས་ཀྱིས་ནང་ཆོས་དང་ཚན་རིག་དབར་བགྲོ་གླེང་བྱེད་དགོས་པའི་དམིགས་ཡུལ་གཉིས་ཡོད། དང་པོ་ནི། ནང་ཆོས་དང་ཚན་རིག་ཕྱོགས་གཉིས་ཀའི་ཤེས་ཚད་གོང་སྤེལ་གཏོང་རྒྱུ་ཙམ་མ་ཟད། ཕྱོགས་གཉིས་ཀྱིས་བརྟག་དཔྱད་ཞིབ་འཇུག་གི་གྲུབ་དོན་ཐོག་ནས་འགྲོ་བ་མིའི་རིགས་ལ་ཞབས་འདེགས་བསྒྲུབ་རྒྱུ་དེ་ཡིན། གཉིས་པ་ནི། རྫས་ཀྱི་རྣམ་གཞག་དེ་དག་ལ་སློབ་སྦྱོང་བྱས་འབྲས་སུ་དཔེར་ན། སྨན་ལ་ཆ་བཞག་ན། བརྟག་དཔྱད་རིམ་པ་བྱས་པའི་མཐར་ལུས་པོར་ཕན་ཐོགས་ཡོད་པ་དེ་དག་ཚུར་དང་དུ་བླངས་ཏེ་གོང་འཕེལ་རྒྱ་ཆེར་སྤེལ་དགོས་པ་དང་། གནོད་པའི་རིགས་ཉུང་དུ་བཏང་ནས་སྔོན་འགོག་གི་ཐབས་ཤེས་བྱ་རྒྱུ་དེ་རྫས་ཀྱི་ནུས་པར་ཤེས་པའི་སྒོ་ནས་རིམ་པ་གཉིས་པ་དེ་བླང་དོར་ཐོག་སླེབས་ཀྱི་ཡོད་པ་སོགས་ཞིབ་ཕྲའི་བཀའ་སློབ་བསྩལ་གནང་ཡོད་པ་རེད།།