གཞོན་ནུ་ཚོགས་པས་ངན་ཁག་འཁྱོག་བཤད་ལ་ངོས་ལེན་མེད།

ཚེས་༡༥ཉིན་རྒྱ་ནག་གི་གསར་འགྱུར་བརྒྱུད་ལམ་ཁག་ཏུ་གནས་ཚུལ་བཀོད་དོན། ཀན་སུའུ་ཞིང་ཆེན་གྱི་ཉེན་རྟོག་པས་ཏྰ་ལེ་རུ་ཚོགས་དང་། བོད་ཀྱི་གཞོན་ནུ་ཚོགས་པའི་གནད་ཡོད་ཀྱི་ཚོགས་མིས་སྐུལ་སློང་བྱས་ནས་ལོ་ཉེར་དྲུག་ཡིན་པའི་སངས་རྒྱས་རྒྱ་མཚོ་ལོ་སྔོན་མའི་ཟླ་༡༠བའི་ཚེས་༦ཉིན་རང་ལུས་མེར་བསྲེགས་སུ་བཅུགས་ནས་འདས་གྲོངས་ལ་སོང་ཡོད་པ་དང་། གཞན་སྐལ་བཟང་རྒྱ་མཚོ་དང་། མགོན་པོ་སྐྱབས། བཀྲ་ཤིས་རྒྱ་མཚོ་སོགས་མགོ་གཏེ་བདུན་རྩད་ཆོད་བྱུང་ཡོད་། ཉིས་སྟོང་བདུན་ལོར་སངས་རྒྱ་མཚོ་དང་སྡེ་བ་གཅིག་ཡིན་ལ། བོད་ཀྱི་གཞོན་ནུ་ཚོགས་པའི་ཚོགས་མི་ཡིན་པའི་ཆོས་རྒྱ་མཚོ་རྒྱལ་ནང་དུ་འཛུལ་ནས་ལས་འགུལ་སྤེལ་བཞིན་པའི་སྐབས་སུ། སངས་རྒྱས་རྒྱ་མཚོའིི་སེམས་སུ་བོད་རང་བཙན་སྐོར་གྱི་བསམ་བློ་མང་བོ་བཅུགས་ཡོད་པ་དང་། ལོ་དེའི་སྤྱི་ཟླ་དགུ་བའི་ནང་དུ་ཁོ་རྒྱ་གར་ལ་ཕྱིར་ལོག་རྗེས་སུ་ཡང་། དྲ་ལམ་དང་ཁ་པར་སོགས་བརྒྱུད་ནས་འབྲེལ་བ་མུ་མཐུད་དུ་བྱས་ཡོད་པ་མ་ཟད། ལུས་པོ་མེར་སྲེག་གཏོང་མཁན་དག་ནི་དཔའ་བོ་ཡིན་ཚུལ་དང་། བོད་དོན་དུ་བྱས་རྗེས་བཞག་ནས་རང་ཉིད་དང་། རང་གི་ཁྱིམ་ཚང་གི་གནས་རིམ་མཐོ་རུ་གཏོང་དགོས་ཚུལ་གྱི་སྐུལ་སློང་བྱས་ཡོད་འདུག་ཅེས་དང་། ཉིས་སྟོང་བཅུ་གཉིས་ལོའི་ཟླ་དང་པོའི་ནང་དུ་ཏྰ་ལེ་རུ་ཁག་གིས་རྒྱ་གར་དུ་དུས་འཁོར་དབང་ཆེན་འཚོགས་པའི་སྐབས་སུ། ཆོས་རྒྱ་མཚོས་བོད་ཀྱི་གཞོན་ནུ་ཚོགས་པའི་གནད་ཡོད་མི་སྣ་མགོན་པོ་སྐྱབས་གཉིས་མཉམ་འབྲེལ་གྱིས་དུས་འཁོར་དབང་ཆེན་ལ་ཡོང་ཡོད་པའི་སྐལ་བཟང་རྒྱ་མཚོ་སོགས་ཀན་ལྷོ་ས་ཁུལ་གྱི་གྲྭ་བཙུན་སུམ་ཅུ་ལྷག་བསྡུས་ནས་ཚོགས་འདུ་འཚོགས་ཏེ། བོད་ནང་ཁུལ་དུ་རང་ལུས་མེར་སྲེག་གི་ལས་འགུལ་ཇི་ལྟར་སྤེལ་དགོས་པའི་སྐོར་ལ་འཆར་བཀོད་འཐེན་རྗེས། ཉིས་སྟོང་བཅུ་གཉིས་ལོའི་ཟླ་བཞི་བར་མགོན་པོ་སྐྱབས་རྒྱ་གར་ནས་ཕྱིར་ཡོང་དེ་སངས་རྒྱས་རྒྱ་མཚོར་ཐུག་ནས་ངན་སྐུལ་སྣ་ཚོགས་བྱས་ཡོད། སྐབས་དེར་ཁྱོད་ཀྱིས་རང་ལུས་མེར་བསྲེགས་པ་ཡིན་ན་ཁྱོད་ཀྱི་པར་སོགས་ཕྱི་ཕྱོགས་སུ་འབྱོར་ཐུབ་རྒྱུ་ཁས་ལེན་བྱས་ཡོད་པ་མ་ཟད། ཏྰ་ལེ་རྩ་འཛུགས་ཀྱིས་ཁྱོད་ཀྱི་ཆེད་དུ་བསྔོ་སྨོན་སོགས་འདོན་རྒྱུ་ཁག་ཐེག་བྱས་ནས་སངས་རྒྱ་རྒྱ་མཚོར་རང་ལུས་མེར་སྲེག་གཏོང་རྒྱུའི་སེམས་ཐག་གཅོད་དུ་བཅུགས་ཡོད་ཚུལ། དེ་ལྟར་མགོན་པོ་སྐྱབས་ཟེར་བས་ཉིས་སྟོང་བཅུ་གཉིས་ལོའི་ཟླ་བཅུ་བའི་ཚེས་དྲུག་ཉིན་སངས་རྒྱས་རྒྱ་མཚོ་མེར་སྲེག་ཏུ་བཅུགས་རྗེས་ཕྱི་ཕྱོགས་སུ་བྲོས་བྱོལ་དུ་སོང་ནས་དྲིལ་བསྒྲགས་བྱས་ཡོད་པས། རྒྱ་ནག་ཉེན་རྟོག་པས་དེ་ནི་རྩ་འཛུགས་ཡོད་པ་དང་འཆར་གཞི་ཡོད་པའི་སྒོ་ནས་མིའི་ཚེ་སྲོག་ལ་བསམ་གཟེས་ནས་གཏོར་བརླགས་བཏང་བའི་ཁྲིམས་འགལ་གྱིི་བྱ་སྤྱོད་ལ་ངོས་འཛིན་བྱེད་ཀྱིན་ཡོད་སྟབས། མུ་མཐུད་དུ་གྱོད་དོན་འདིའི་རིགས་ལ་རྩད་གཅོད་ནན་མོ་བྱེད་རྒྱུ་ཡིན་པས། རྒྱ་ནག་གི་ཉེན་རྟོག་པས་རྒྱལ་སྤྱིའི་ཉེན་རྟོག་པར་གྱོད་དོན་འདིའི་རིགས་ཐག་གཅོད་བྱེད་རྒྱུར་རོགས་འདེགས་བྱེད་དགོས་པའི་འབོད་སྐུལ་ཞུ་བཞིན་ཡོད་ཚུལ་བཀོད་ཡོད་པ་དང་། ད་དུང་རྩ་འཛུགས་དང་འཆར་གཞི་ཡོད་པའི་ལས་འགུལ་དེ་དག་བོད་ཀྱི་གཞོན་ནུ་ལྷན་ཚོགས་དང་འབྲེལ་བ་ཐད་གར་ཡོད་ཚུལ་བསྒྲགས་ཡོད་པ་རེད། འདི་ག་རླུང་འཕྲིན་ཁང་གིས་གནས་ཚུལ་དེའི་ཐད་ཐད་གཞོན་ནུའི་ཚོགས་གཞོན་དོན་གྲུབ་ལྷ་དར་ལ་བཅར་འདྲི་བྱས་སྐབས་བརྗོད་དོན། བོད་ནང་གི་རང་ལུས་མེ་བསྲེགས་དེ་བོད་ཀྱི་གཞོན་ནུ་ལྷན་ཚོགས་དང་འབྲེལ་བ་ཡོད་ཚུལ་རྒྱ་ནག་གིས་བཤད་པ་ནི་གསར་བ་གང་ཡང་མ་རེད། ཐེངས་ཁ་ཤས་བཤད་མྱོང་བ་རེད། དེ་གཙོ་བོ་བོད་རྒྱ་ནག་གིས་བཙན་བཟུང་གི་རྒྱུད་རིམ་ཁྲོད་བོད་མི་རིགས་རྩ་མེད་བཟོ་བའི་སྲིད་ཇུས་བོད་མི་མང་གིས་ངོས་ལེན་བྱེད་གི་མེད་པ་དང་། ཚེ་སྲོག་བློས་གཏོང་གི་ངོ་རྒོལ་བྱེད་བཞིན་པའི་ངོ་ཚ་འགེབས་ཆེད་གཞོན་ནུ་ཚོགས་པ་དང་། ༧གོང་ས་མཆོག། བོད་གཞུང་བཅས་པར་ངན་ཁག་དཀྲིས་བཞིན་པ་མ་གཏོགས་བདེན་པ་མ་རེད། ངན་ཁག་དང་འཁྱོག་བཤད་དེ་ང་ཚོ་གཞོན་ནུ་ཚོགས་པའི་ངོས་ནས་ངོས་ལེན་རྩ་བ་ནས་མེད་ལ་དེ་དང་མཉམ་རང་ལུས་མེ་བསྲེགས་ཐད་རྒྱུད་སྐུལ་དང་སྐུལ་སློང་ནམ་ཡང་བྱས་མྱོང་མེད་ཅེས་བརྗོད་བྱུང་།