ཨ་རིའི་ནང་ངོ་མཚར་ཅན་གྱི་བོད་ཀྱི་རིག་གཞུང་སྒྱུ་རྩལ་སྐོར་བསྐྱོད།

འབྲས་སྤུངས་བློ་གསལ་གླིང་གྲ་ཚང་གི་དགེ་འདུན་པ་ཁག་ཅིག་གིས་ཨ་མི་རི་ཀའི་ནང་ངོ་མཚར་ཅན་གྱི་བོད་ཀྱི་རིག་གཞུང་སྒྱུ་རྩལ་སྐོར་བསྐྱོད་གནང་བཞིན་པ།
དེ་ཡང་གདན་ས་ཆེན་པོ་འབྲས་སྤུངས་བློ་གསལ་གླིང་གྲ་ཚང་གི་དགེ་འདུན་པ་ཁག་ཅིག་གིས་ཨ་མི་རི་ཀའི་ནང་ངོ་མཚར་ཅན་གྱི་བོད་ཀྱི་རིག་གཞུང་སྒྱུ་རྩལ་སྐོར་བསྐྱོད་གནང་བཞིན་པ་དང་། ཁོང་རྣམ་པས་འདི་ག་ཨ་རིའི་རྒྱལ་ས་ཝ་ཤིན་ཀྲོན་གྱི་ཉེ་འཁྲིས་སུ་ཡོད་པའི་ཝིར་ཇི་ནི་ཡའི་མངའ་སྡེའི་ནང་འདི་ཚེས་༤ནས་འགོ་འཛུགས་ཀྱིས་ཚེས་༩བར། མང་ཚོགས་ལ་བོད་ཀྱི་ཐུན་མོང་མ་ཡིན་པའི་ཆོས་ཕྱོགས་ཀྱི་རིག་གཞུང་གཟིགས་འབུལ་ཞུ་བཞིན་པ་རེད།
འདིའི་སྐོར་གསལ་བསྒྲགས་ཤིག་སྤེལ་ཡོད་པའི་ནང་། ཐེངས་འདིའི་རིག་གཞུང་གཟིགས་འབུལ་དེ་བཞིན་ཝིར་ཇི་ནི་ཡའི་ནང་ཡོད་པའི་ཡེ་ཤུའི་ལྷ་ཁང་Unity of Fairfaxཞེས་བའི་ནང་གོ་བསྒྲིགས་གནང་ཡོད་པ་ལྟར། འདི་ཚེས་༤ཉིན་གྱི་དགོང་དྲོ་ལས་དོན་འདིའི་ཆེད་ཕེབས་པའི་འབྲས་སྤུངས་བློ་གསལ་གླིང་གི་དགེ་འདུན་པ་ཞལ་གྲངས་༡༡ དང་། དེ་བཞིན་སྐབས་དེར་འདུ་འཛོམས་བྱུང་བའི་མང་ཚོགས་རྣམས་ཀྱིས་དབུ་འབྱེད་ཀྱི་མཛད་སྒོ་ཞིག་གནང་ཡོད་པ་དང༌། དེ་ནས་རིམ་པས་འདི་ཚེས་༩བར་དགེ་འདུན་པ་རྣམ་པས་མང་ཚོགས་ལ་སངས་རྒྱས་སྨན་ལྷའི་རྡུལ་མཚོན་གྱི་དཀྱིལ་འཁོར་བཞེངས་སྟངས་དང༌། འདོན་རྟ་དབྱངས། ནང་ཆོས་དང་འབྲེལ་བའི་རོལ་དབྱངས་སོགས་ཀྱི་གཟིགས་འབུལ་རྒྱུ་ཡིན་པ་རེད།
དེ་དག་གི་དམིགས་ཡུལ་ནི། མང་ཚོགས་ཀྱི་སེམས་ནང་རྩ་བརླག་འགྲོ་ཉེན་ཡོད་པའི་བོད་ཀྱི་རིག་གཞུང་ཐོག་དོ་སྣང་བསྐྲུན་རྒྱུ་དང༌། དེ་བཞིན་རྒྱ་གར་ནང་ཡོད་པའི་བོད་མི་སྐྱབས་བཅོལ་བ་ཚོའི་ཐོག་རྒྱབ་སྐྱོར་སོན་ཐབས་ཀྱི་ཆེད་དུ་ཡིན་པ་འཁོད་འདུག

གསར་འགོད་པ་ངག་དབང་ཆོས་འཕེལ།