མདོ་སྨད་མཚོ་སྔོན་རྨ་ལྷོ་སོག་རྫོང་མི་མང་༸གོང་ས་མཆོག་ལ་བརྟན་བཞུགས།

མདོ་སྨད་མཚོ་སྔོན་རྨ་ལྷོ་སོག་རྫོང་མི་མང་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་ཚུལ་དུ་མཎྜལ་རྟེན་གསུམ་འདེགས་འབུལ་ཞུས་ཡོད་པ་དང་སྦྲགས  ཉིན་འདིར་ཨ་རིའི་མངའ་སྡེ་ཀེལ་ཕྷོ་ནེ་ཡའི་གྲོང་ཁྱེར་ཞིག་གི་གྲོང་སྡེའི་སྤྱི་ཁྱབ་ཟུར་པ་གཙོས་པའི་མངའ་སྡེ་དེའི་ཚོང་ལས་མི་ཁག་ཅིག་ལ་མཇལ་མོལ་གནང་འདུག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མདོ་སྨད་མཚོ་སྔོན་རྨ་ལྷོ་སོག་རྫོང་མི་མང་རྣམས་ཀྱིས་ཇི་ལྟར་གསོལ་འདེབས་ཞུས་དོན་ལྟར། ཟླ་བ་འདིའི་སྤྱི་ཚེས་༢༩ ཉིན་བཞུགས་སྒར་རྡ་རམ་ས་ལའི་༸རྒྱལ་བའི་ཕོ་བྲང་དུ་མགོན་པོ་གང་ཉིད་མཆོག་ལ་བརྟན་བཞུགས་ཚུལ་དུ་མཎྜལ་རྟེན་གསུམ་འདེགས་འབུལ་ཞུས་འདུག་ཅིང་། དེ་སྔ་རྒྱ་ནག་གཞུང་གིས་མདོ་སྨད་མཚོ་སྔོན་རྨ་ལྷོ་སོག་རྫོང་དུ་གཏོར་བཤིག་བཏང་བའི་དགོན་པ་ཁག་ཅིག་སླར་གསོ་ཞུས་ཡོད་པའི་སྐོར་མགོན་པོ་གང་ཉིད་མཆོག་ལ་སྙན་སེང་ཞུས་ཡོད་པར། ༸གོང་ས་༸སྐྱབས་མགོན་ཆེན་པོ་མཆོག་གིས་བསྔགས་བརྗོད་དང་འབྲེལ། བསླབ་པ་སློབ་གཉེར་བྱེད་དགོས་པའི་སྐོར་བཀའ་སློབ་ཕེབས་འདུག

ཡང་གོང་ས་༸སྐྱབས་མགོན་ཆེན་པོ་མཆོག་ནས་ཨ་རིའི་ནུབ་རྒྱུད་མངའ་སྡེ་ཀེལ་ཕྷོ་ནེ་ཡའི་གྲོང་ཁྱེར་(Anaheim)གྱི་སྤྱི་ཁྱབ་ཟུར་པ་སྐུབས་ཞབསTom Tait ལགས་ཀྱིས་སྣེ་ཁྲིད་པའི་མངའ་སྡེའི་ཚོང་ལས་མི་སྣ་༡༣ལ་མཇལ་མོལ་གནང་ཏེ་མགོན་པོ་གང་ཉིད་མཆོག་གིས་ཚད་རྡུལ་དངོས་ཁམས་དང་འབྲེལ་བའི་སྐོར་བཀའ་སློབ་ཕེབས་ཡོད་པའི་ཁར།  གང་ཟག་སྒེར་གཅིག་གིས་བྱམས་བརྩེ་གོང་འཕེལ་ཡོང་སླད་ཕྱག་ལ་གནང་བ་དེས་གཞན་གྱིས་བསམ་བློ་ལ་ཡང་འགྱུར་བ་བཏང་ཏེ། རིམ་པས་འགྲོ་བ་མི་ཡོང་ལ་ཤུགས་རྐྱེན་སྤྲོད་ཐུབ་པའི་སྐོར་བཀའ་སློབ་ཕེབས་འདུག