ཨོསིཀྲོ་ལི་ཡའི་གྲོས་ཚོགས་ཚོགས་གཙོར་འཚམས་འདྲི།

༄༅༎ཨོསིཀྲོ་ལི་ཡའི་གྲོས་ཚོགས་ཀྱི་ཚོགས་གཙོ་གཞོན་པ་ཚོགས་གཙོར་བསྐོ་བཞག་བྱུང་བར་བོད་མིའི་སྒྲིག་འཛུགས་ཀྱིས་འཚམས་དྲི་ཞུས་གནང་འདུག
ཕྱི་ཚེས་༢༥ཉིན་བཙན་བྱོལ་བོད་མིའི་སྒྲིག་འཛུགས་ཀྱིས་དེ་སྔ་ཨོསིཀྲོ་ལི་ཡའི་གྲོས་ཚོགས་ཀྱི་ཚོགས་གཙོ་གཞོན་པ་སྐུ་ཞབས་པི་ཀྲར་སི་ལི་པཱར་མཆོག་ཨོསིཀྲོ་ལི་ཡའི་གྲོས་ཚོགས་ཀྱི་ཚོགས་གཙོར་བསྐོ་བཞག་བྱུང་བར་འཚམས་འདྲི་ཞུས་གནང་ཡོད་པ་དང་ འཚམས་འཕྲིན་ནང་འཁོད་དོན་ལྟར་ན་ སྐུ་ཉིད་ཨོསིཀྲོ་ལི་ཡའི་གྲོས་ཚོགས་འོག་མའི་ཚོགས་གཙོར་བསྐོ་བཞག་བྱུང་བར་བཙན་བྱོལ་བོད་མིའི་སྒྲིག་འཛུགས་ཀྱིས་སྙིང་ཐག་པ་ནས་དགའ་བསུའི་འཚམས་འདྲི་ཞུ་རྒྱུ་ཡིན་ སྐུ་ཉིད་དེ་སྔ་ཨོསིཀྲོརི་ཡའི་གྲོས་ཚོགས་འོག་མའི་ཚོགས་གཞོན་གྱི་ཐུགས་འགན་བཞེས་པའི་སྐབས་ སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཕྱི་ལོ་ཉིས་སྟོང་དགུ་ལོའི་ཟླ་བ་དྲུག་པའི་ནང་ཨོསིཀྲོ་ལི་ཡའི་གྲོས་ཚོགས་སུ་གདན་འདྲེན་ཞུས་གནང་ཡོད་པ་མ་ཟད་ ལོ་དེའི་ཕྱི་ཟླ་བདུན་པའི་ནང་ཁྱེད་ཀྱིས་སྣེ་འཁྲིད་དེ་ཨོསིཀྲོ་ལི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་ཁག་ཅིག་བཞུགས་སྒར་རྡ་རམ་ས་ལར་འཚམས་གཟིགས་སུ་ཕེབས་པ་དེ་དག་ལ་ང་ཚོས་དགའ་སེམས་འཁོལ་བའི་ངང་རྗེས་དྲན་ཞུ་བཞིན་ཡོད་ཅེས་དང་ དེ་བཞིན་ཉེ་ལམ་བོད་ནང་བོད་མི་༡༡གིས་རང་ལུས་མེར་སྲེག་བཏང་བའི་དོན་རྐྱེན་བྱུང་བ་དེ་ལས་དེང་སྐབས་བོད་ནང་་དོན་དངོས་ཐོག་དམག་ཁྲིམས་སྡོམ་བཞིན་ཡོད་པ་ར་སྤྲོད་གསལ་པོ་ཐུབ་པར་བརྟེན་སྐུ་ཉིད་ཀྱིས་དམིགས་བསལ་གོ་གནས་དེའི་ཐོག་ནས་བོད་ཀྱི་གནད་དོན་མགྱོགས་མྱུར་སེལ་རྒྱུའི་འབད་རྩོན་གནང་རོགས་ཞེས་འབོད་སྐུལ་ཞུ་རྒྱུ་ཡིན་སོགས་འཁོད་ཡོད་འདུག