རྒྱལ་བ་ཀརྨ་མཆོག་རྒྱ་བོད་ས་མཚམས་སུ་ཕེབས་ཆོག་པ།།

༄༅༎རྒྱལ་བ་ཀརྨ་པ་དབུ་རྒྱན་འཕྲིན་ལས་རྡོར་རྗེ་མཆོག་རྒྱ་བོད་གཉིས་ཀྱི་ས་མཚམས་ཁུལ་ཁག་ཅིག་ནང་ཆོས་འབྲེལ་གྱི་ཐོག་ནས་ཕེབས་ཆོག་པ་རྒྱ་གར་གཞུང་གིས་ཆོག་མཆན་གནང་ཡོད་པ་རེད་ཅེས་ཁ་ས་རེས་གཟའ་མིག་དམར་ཉིན་ཕྱིར་སྡོད་རྒྱ་གར་གྱི་གསར་འགྱུར་བརྒྱུད་ལམ་ནང་གནས་ཚུལ་བཀོད་འདུག

རྒྱལ་བ་ཀརྨ་པ་དབུ་རྒྱན་འཕྲིན་ལས་རྡོར་རྗེ་མཆོག་འདི་ལོ་ཕྱི་ཟླ་བདུན་པའི་ནང་རྒྱ་བོད་གཉིས་ཀྱི་ས་མཚམས་ས་ཁུལ་ལ་དྭགས་དང་ ཧི་མ་ཅལ་མངའ་སྡེའི་ཁུལ་དུ་ཡོད་པའི་ནང་པའི་དགོན་པ་དང་ས་ཁུལ་ཁག་ཅིག་ནང་ཆོས་འབྲེལ་གྱི་མཛད་འཕྲིན་བསྐྱང་གནང་བར་ཕེབས་ཆོག་པའི་རྒྱ་གར་གཞུང་ལ་བཀའ་ཁྲོལ་ཞུས་ཡོད་ཀྱང་ད་བར་རྒྱ་གར་གཞུང་ནས་ཀརྨ་པ་མཆོག་ས་ཁུལ་དེ་ཚོའི་ནང་ཕེབས་ཐོན་ཆོག་པའི་བཀའ་ཁྲོལ་གནང་མེད་པ་རེད་ ཡིན་ནའང་ད་ཆ་གོང་ཞུས་ས་ཁུལ་ཁག་ནང་ཆོས་འབྲེལ་གྱི་མཛད་འཆར་བསྐྱང་བར་ཕེབས་ཆོག་པའི་རྒྱ་གར་གཞུང་གི་བཀའ་ཁྲོལ་ཐོབ་གནང་ནས་ཕྱི་ཟླ་དགུ་པའི་ཚེས་༨ནས་བཟུང་ཐོག་མར་ལ་དྭགས་ནས་དབུ་བཙུགས་ཀྱིས་ཆོས་འབྲེལ་མཛད་འཆར་བསྐྱང་གནང་རྒྱུའི་ཐོག་རིམ་བཞིན་ལ་ཧོལ་དང་སི་པི་ཊི་སོགས་པ་འཛམ་གླིང་ནང་སྙན་གྲགས་ཅན་གྱི་ཏ་བོ་དགོན་པ་སོགས་སུ་ཆོས་འབྲེལ་གྱི་མཛད་པ་བསྐྱང་གནང་བར་ཕེབས་གནང་རྒྱུ་ཡིན་པ་རེད་ རྒྱལ་བ་ཀརྨ་པ་མཆོག་བཙན་བྱོལ་ནང་བྲོས་བྱོལ་དུ་ཕེབས་ནས་ལོ་ངོ་བརྒྱད་ཙམ་འགྲོ་ཡི་ཡོད་ཅིང་དེའི་ནང་ནས་དུས་ཡུན་མང་ཆེ་བ་བཞུགས་སྒར་རྡ་རམ་ས་ལའི་ཉེ་འདབས་སུ་ཆགས་པའི་རྒྱུད་སྟོད་དགོན་པའི་ནང་གཏན་བཞུགས་གནང་བཞིན་ཡོད་པ་རེད་