ཀརྨ་པ་མཆོག་གིས་ལས་སྨོན་རྟེན་འབྲེལ་ཚང་མ་འཛོམས་པའི་སྐབས་སུ་ང་ཚོ་རྒྱ་གར་ནས་ཞལ་འཛོམས་ཐུབ་པའི་རེ་བ་ཆེན་པོ་ཡོད་པ་བཀའ་གནང་འདུག

དཔལ་རྒྱལ་དབང་ཀརྨ་པ་རིན་པོ་ཆེ་ཨྱོན་འཕྲིན་ལས་རྡོ་རྗེ་མཆོག་གིས་སྐུ་ཉིད་རྒྱ་གར་ནང་ཕྱིར་ཕེབས་གནང་རྒྱུའི་ཆེད། ད་ལྟ་རྒྱ་གར་གཞུང་དང་བཀའ་མོལ་གནང་མུས་ཡིན་པས་བཀའ་མོལ་ཡག་པོ་བྱུང་ཚེ་རྒྱ་གར་ལ་ཕེབས་རྒྱུའི་དགོངས་པ་བཞེས་བཞིན་ཡོད་པ་གསུངས་འདུག
དེ་ཡང་རྒྱལ་དབང་ཀརྨ་པ་ཨྱོན་འཕྲིན་ལས་རྡོ་རྗེ་མཆོག་གིས། ཉེ་ལམ་༢༠༢༣ལོའི་བཀའ་རྒྱུད་སྨོན་ལམ་འཕར་མའི་ཚོགས་མགོན་དུ་དྲ་ཐོག་བརྒྱུད་དབུ་བཞུགས་གནང་གནང་བ་དང་། སྒྲོལ་མ་ལྷ་ལྔའི་ཆོ་གའི་གསུང་ཆོས་བསྩལ་ཞོར་སྤྱི་ཚེས་༥ཉིན། རྒྱལ་དབང་ཀརྨ་པ་མཆོག་གིས། སྐུ་ཉིད་རྒྱ་གར་ནང་ཕྱིར་ཕེབས་གནང་རྒྱུའི་ཆེད། ད་ལྟ་རྒྱ་གར་གཞུང་དང་བཀའ་མོལ་གནང་མུས་ཡིན་པས་བཀའ་མོལ་ཡག་པོ་བྱུང་ཚེ་རྒྱ་གར་ལ་ཕེབས་རྒྱུའི་དགོངས་པ་བཞེས་བཞིན་ཡོད་པ་མ་ཟད། ཐོག་མར་བལ་ཡུལ་བརྒྱུད་བོད་ནས་ཕེབས་སྐབས་བལ་ཡུལ་ནང་ཚོུད་འགའ་ཤས་ཞིག་ལས་བཞུགས་རྒྱུ་མ་བྱུང་བ་དང་། དེ་ནས་ད་བར་བལ་ཡུལ་ནང་ཕེབས་མྱོང་མེད་སྟབས། མ་འོངས་པར་བལ་ཡུལ་ནང་ཕེབས་ཐུབ་པའི་ཐུགས་རེ་ཆེན་པོ་ཡོད་ལ། དེ་བཞིན་འབྲུག་ཡུལ་ལ་ཆ་མཚོན་ན་འབྲུག་རྒྱལ་སྐུ་གོང་མ་ཚོ་དང་རྒྱལ་དབང་ཀརྨ་པ་སྐུ་ཕྲེང་བཅོ་ལྔ་པ་དང་བཅུ་དྲུག་པ་སོགས་ཀརྨ་པ་རིམ་བྱོན་དང་འབྲེལ་བ་ཆེན་པོ་ཡོད་པ་ཞིག་ཡིན་དུས་འབྲུག་ཡུལ་དུ་ཡང་ཕེབས་ཐུབ་པའི་རེ་བ་ཡང་ཆེན་པོ་ཡོད། ལས་སྨོན་རྟེན་འབྲེལ་ཚང་མ་འཛོམས་པའི་སྐབས་སུ་ང་ཚོ་རྒྱ་གར་ནས་ཞལ་འཛོམས་ཐུབ་པའི་རེ་བ་ཆེན་པོ་ཡོད་པ་བཀའ་གནང་འདུག

གསར་འགོད་པ། དབྱངས་སྒྲོན།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།