བཀའ་བློན་ཁྲི་པ་མཚོག་གི་ཨི་ཊ་ལིའི་ནང་འཚམས་གཟིགས།

༄༅༎བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་མཆོག་གིས་ཨི་ཊ་ལི་རྒྱལ་ཁབ་ཀྱི་རང་སྐྱོང་ཁུལ་ལྷོ་ཀྲའེ་རོལ་རང་སྐྱོང་ཁུལ་གྱི་སྲིད་འཛིན་ དང་མཇལ་འཕྲད་གནང་ཡོད་འདུག
ཟླ་བ་འདིའི་ཕྱི་ཚེས་༢༨ཉིན་ ལྷོ་ཀྲའེ་རོལ་རང་སྐྱོང་ས་གནས་ཀྱི་གཙོ་འཛིན་ལུཨི་ཌན་ལྦོལ་ཌར་མཆོག་གིས་བཀའ་བློན་ཁྲི་པ་བློ་བཟང་སེངྒེ་མཆོག་དང་ཐུགས་འཕྲད་གནང་ཡོད་ཅིང་། ཁོང་རྣམ་གཉིས་མཇལ་ཕྲད་གནང་བའི་སྐབས་ ལྷོ་ཀྲའེ་རོལ་ཡི་གཙོ་འཛིན་ནས་ང་ཚོའི་མི་མང་དབར་མཛའ་འབྲེལ་གཏིང་ཟབ་ཡོད་པ་དང་། གཞོན་སྐྱེས་དབུ་ཁྲིད་ཁྱེད་ཀྱིས་ང་ཚོའི་དབར་གྱི་མཛའ་འབྲེལ་མུ་མཐུད་རྒྱུན་འཛིན་གནང་བར་ཧ་ཅང་དགའ་པོ་བྱུང་། ལྷོ་ཀྲའེ་རོལ་ཁོངས་མི་རིགས་འདྲ་མིན་གསུམ་ཡོད་པ་དང་། རང་སྐྱོང་གི་གནས་བབ་འོག་ཞིང་ཆེན་འདིའི་ནང་ཞི་བདེ་དང་བདེ་འཇགས་ཡོད་ཅིང་། རྒྱ་ནག་གིས་ཀྱང་ལྷོ་ཀྲའེ་རོལ་གྱི་རང་སྐྱོང་གི་ངོ་བོ་ནས་མིག་དཔེ་ལེན་ཆོག་གི་རེད་ཅེས་གསུང་འདུག  དེའི་སྐབས་བཀའ་བློན་ཁྲི་པ་མཆོག་གིས་ ལྷོ་ཀྲའེ་རོལ་ལ་འགྲན་ཟླ་མེད་པའི་རང་སྐྱོང་ཡོད་པ་ནི་བཙན་བྱོལ་བོད་མིའི་སྤྱི་ཚོགས་ནང་ཤེས་གསལ་རེད་ཅེས་གསུངས་ཡོད་།