བཀའ་ཁྲི་ནས་ཆོས་ལུགས་ཁག་གི་གྲོས་ཚོགས་ཐོག་གསུང་བཤད།

༄༅༎བཙན་བྱོལ་བོད་གཞུང་གི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་གིས་ཟླ་བ་འདིའི་ཚེས་བདུན་ནས་བཅུ་གཅིག་བར་ཨོ་སི་ཀྲོ་ལི་ཡའི་གྲོང་ཁྱེར་མཱེལ་སྦེན་ནང་ཚུགས་བཞིན་པའི་འཛམ་གླིང་གི་ཆོས་ལུགས་ཁག་གི་གྲོས་ཚོགས་ཐོག་གསུང་བཤད་གནང་རྒྱུའི་ཆེད་དུ་རྒྱ་གར་གྱི་རྒྱལ་ས་ལྡི་ལི་ནས་ཨོ་སི་ཀྲོ་ལི་ཡ་རུ་དེ་རིང་ཆིབས་བསྒྱུར་གནང་རྒྱུ་ཡིན་པ་བཙན་བྱོལ་བོད་གཞུང་གི་དྲ་རྒྱའི་ཐོག་གཞུང་འབྲེལ་དྲིལ་བསྒྲགས་གནང་འདུག ཆོས་ལུགས་ཚོགས་ཆེན་གྱི་ཚེས་དགུའི་སྔ་དྲོ་བྱམས་བརྩེ་ནི་འགྲོ་བ་མིའི་རིན་ཐང་ཡིན་པ་དང་འཛམ་གླིང་ནང་གི་བཟའ་བཅའི་དཀའ་གནད་སེལ་ཐབས་བྱ་རྒྱུ་ནི་ཆོས་ཕྱོགས་ཀྱི་ཁ་གཏད་ཅེས་པའི་བརྗོད་གཞིའི་ཐོག་ལ་བཀའ་བློན་ཁྲི་པ་མཆོག་གིས་གསུང་བཤད་བསྩལ་གནང་མཛད་རྒྱུ་ཡིན་པ་རེད་ ཉི་མ་བདུན་རིང་ཚོགས་རྒྱུའི་ཆོས་ལུགས་ཁག་གི་གྲོས་ཚོགས་ཚོགས་ཆེན་དེ་ནི་ཟླ་བ་འདིའི་ཚེས་གསུམ་ཉིན་ནས་བཟུང་དབུ་ཚུགས་ཡོད་པ་དང་ ཚོགས་ཆེན་དེར་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་པས་འཛམ་གླིང་གི་ས་ཕྱོགས་སྣ་ཚོགས་ནས་ཆོས་ལུགས་འདྲ་མིན་གྱི་མི་སྣ་གྲངས་༨༠༠༠ཙམ་གྱིས་མཉམ་ཞུགས་གནང་དང་གནང་མུས་ཡིན་པ་རེད་ ཟླ་བ་འདིའི་ཚེས་བཅུའི་ཉིན་མོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་བྱ་དགའ་འབུལ་བཞེས་མཛད་དེ་མི་ལོ་ཉི་ཤུ་འཁོར་བའི་དུས་དྲན་སྲུང་བརྩི་ཞུ་རྒྱུའི་མཛད་སྒོར་བཀའ་བློན་ཁྲི་པ་མཆོག་གིས་ཆིབས་བསྒྱུར་བསྐྱང་གནང་རྒྱུ་ཡིན་པ་རེད།