བོད་མིར་གདུང་སེམས་མཉམ་བསྐྱེད་ཀྱི་རྒྱལ་སྤྱིའི་ལས་འགུལ།

༄༅༎རྒྱལ་སྤྱིའི་ཁྱོན་ཡོངས་སུ་ཡོད་པའི་བོད་དོན་ཐོག་ལ་རྒྱབ་སྐྱོར་གནང་མཁན་གྲོས་ཚོགས་ཀྱི་ཚོགས་པ་ཡོངས་ཀྱིས་ད་ལྟའི་བོད་ནང་གི་གནས་སྟངས་ཛ་དྲག་ཏུ་འགྲོ་བཞིན་པར་བརྟེན་བོད་མི་ཚོར་གདུང་སེམས་མཉམ་བསྐྱེད་ཀྱི་ཆེད་དུ་ཕྱི་ཟླ་དྲུག་པའི་ཚེས་༢༠ ཉིན་དུས་གཅིག་ལ་རྒྱལ་སྤྱིའི་ནང་ལས་འགུལ་སྤེལ་རྒྱུའི་འཆར་གཞི་ཡོད་པ་རེད།

བོད་ནང་གི་བོད་མི་ཚོར་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་དགོས་པའི་ཡོངས་ཁྱབ་གསལ་བསྒྲགས་སྤེལ་མཁན་ནི། རྒྱལ་སྤྱིའི་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ལས་དོན་འབྲེལ་མཐུད་གནང་མཁན་ཚོགས་པ་དེ་ཡིན་ཞིང༌། ཚོགས་པ་དེའི་ཚོགས་མའི་ཁོངས་སུ་ཡོ་རོབ་གྲོས་ཚོགས་དང༌། ལྷོ་ཨ་ཕེ་རི་ཀ། ཨའེ་སི་ལེནདྲ། ཀེམ་སྦོ་ཌི་ཡ། ཁེ་ན་ཌ། ཨོསི་ཀྲོ་ལི་ཡ། རྒྱ་གར་གྲོས་ཚོགས་བཅས་ཀྱི་འཐུས་མི་ལས་གྲུབ་པ་ཞིག་ཡིན་ཞིང༌། རྒྱལ་སྤྱིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་ཚོགས་པ་དེ་ཡིས། ཉེ་ཆར་ཕྱི་ཟླ་བཞི་པའི་ཚེས་༢༧ ནས་༢༩ བར་ཁེ་ན་ཌའི་རྒྱལ་ས་ཨོ་ཊ་ལྦ་དུ་རྒྱལ་སྤྱིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པ་དེ་གོ་སྒྲིག་གནང་མཁན་དེ་ཡིན་པ་རེད། ད་དུང་རྒྱལ་སྤྱིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ལས་དོན་འབྲེལ་མཐུད་ཚོགས་པ་དེ་ཡིས། བོད་དོན་རྒྱབ་སྐྱོར་གནང་མཁན་གྱི་གྲོས་ཚོགས་ཀྱི་ཚོགས་པ་ཚོས་སོ་སོའི་གཞུང་ལ། རྒྱ་ནག་གི་དཔོན་རིགས་དང་བཙན་བྱོལ་བོད་མིའི་སྒྲིག་འཛུགས་ལྷན་དུ་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་ཅིག་འཐོབ་པའི་ཆེད་དུ་ཁ་ཞེ་གཉིས་མེད་ཀྱི་གྲོས་མོལ་ཡོང་ཐབས་ཐད་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་བརྒྱུད་སྐུལ་བྱ་དགོས་པ་མ་ཟད། ད་དུང་རྒྱལ་ཁབ་སོ་སོའི་གཞུང་གིས། རྒྱ་ནག་དང་ཚོང་འབྲེལ་སོགས་ཀྱི་འབྲེལ་ལམ་བཙུགས་པའི་སྐབས། ངེས་པར་དུ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་སྲུང་སྐྱོབ་བྱ་དགོས་པ་སོགས་ཀྱི་ཆ་རྐྱེན་ཁག་བཏོན་དགོས་པ་དང༌། ལྷག་དོན་རིང་མིན་ཕྱི་ཟླ་དྲུག་པའི་ཚེས་༡༨ ཉིན་སུད་སི་གྲོང་ཁྱེར་ཇི་ནི་ལྦ་དུ་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་༢༠ པ་སྐོང་ཚོགས་གནང་གི་ཡོད་པ། དེའི་སྐབས་རྒྱལ་ཁབ་སོ་སོའི་གཞུང་གི་ཐོག་ནས་བོད་ནང་དུ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བའི་བྱ་སྤྱོད་ཐེར་འདོན་བྱ་རྒྱུར་བརྒྱུད་སྐུལ་བྱ་དགོས་པ་སོགས་འབོད་སྐུལ་ཞུས་ཡོད་པ་རེད།