རྒྱ་ནག་གི་གྲོང་གསེབ་ནས་གྲོང་ཁྱེར་དུ་ལས་ཀ་འཚོལ་མཁན་སྐོར།

༄༅༎རྒྱ་ནག་གཞུང་གིས་གྲོང་གསེབ་ཁག་ནས་གྲོང་ཁྱེར་ནང་འཕྲལ་སེལ་འཚོ་ཐབས་ཀྱི་ལས་ཀ་བྱེད་མཁན་མི་འབོར་ས་ཡ་༢༡༡ ཡོད་པ་ནས་ཕྱེད་ཀ་ལྷག་གི་གནས་ཚུལ་མཁོ་གྲུབ་བྱེད་པའི་ལས་དོན་གྲུབ་བཞིན་ཡོད་པའི་སྐོར་རེས་གཟའ་ཉི་མའི་ཉིན་འབྲེལ་ཡོད་དཔོན་རིགས་ནས་བཤད་ཡོད་པ་རེད།

དེ་ཡང་རེས་གཟའ་ཉི་མའི་ཉིན་པེ་ཅིང་དུ་ཚོགས་པའི་མི་འབོར་དང་འཆར་ལྡན་བུ་བཙའི་ལས་དོན་ཚོགས་འདུའི་ཐོག་རྒྱ་ནག་རྒྱལ་ཡོངས་མི་འབོར་དང་འཆར་ལྡན་བུ་བཙའི་ལས་དོན་ལྷན་ཁང་གི་འགོ་ཁྲིད་ལི་སྦིན་གྱིས་གཏམ་བཤད་བྱས་དོན། གྲོང་ཁྱེར་ནང་འཕྲལ་སེལ་འཚོ་ཐབས་བྱེད་མཁན་མི་འབོར་ས་ཡ་༡༢༠འི་གནས་ཚུལ་བསྡུ་རུབ་བྱས་པ་དང། ཁོང་ཚོས་རྒྱ་ནག་རྒྱལ་ཡོངས་ཀྱི་གྲོང་ཁྱེར་ཁག་ནང་འཕྲལ་སེལ་འཚོ་ཐབས་བྱེད་མཁན་གྱི་མི་འབོར་དང་འཕེལ་ཚད་ཀྱི་གྲངས་ཀ་ངེས་གཏན་ཡོང་ཐབས་ཀྱི་ཆེད་དུ་༢༠༡༠ནས་རྒྱ་ནག་གི་གྲོང་ཁྱེར་ཁག་བརྒྱ་ལྷག་གི་ནང་ཞིབ་འཇུག་དང་འཚོལ་བསྡུའི་ལས་དོན་འགོ་བཙུགས་པའི་སྐོར་དང༌། ད་དུང་ཁོང་ཚོ་བརྒྱ་ཆ་༩༣ཙམ་ལ་ཕྲུ་གུ་སྐྱེས་འགོག་གི་ཆ་རྐྱེན་རིན་མེད་དུ་སྤྲོད་ཀྱི་ཡོད་པའི་སྐོར་བཤད་ཡོད་པ་རེད།

༢༠༡༠ལོར་རྒྱ་ནག་གི་མི་འབོར་དང་འཆར་ལྡན་བུ་བཙའི་ལས་དོན་ལྷན་ཁང་གི་བསྡོམས་རྩིས་བཏོན་པར་གཞིགས་ན། ༢༠༠༩བར་རྒྱ་ནག་རྒྱལ་ཡོངས་ཀྱི་གྲོང་ཁྱེར་ཁག་ནང་གྲོང་གསེབ་ས་ཁུལ་ནས་འཚོ་ཐབས་ཀྱི་ལས་ཀ་བྱེད་མཁན་མི་འབོར་ས་ཡ་༢༡༡ཡོད་པ་དང༌། མ་འོངས་པའི་མི་ལོ་༣༠ནང་འཕྲལ་སེལ་འཚོ་ཐབས་ཀྱི་ལས་ཀ་བྱེད་མཁན་གྱི་གྲངས་ཚད་མགྱོགས་པོ་འཕེལ་རྒྱས་མི་འགྲོ་བའི་རེ་བ་བྱེད་ཀྱི་ཡོད་པ་རེད།