བོད་མིའི་ངོ་བོ་རྩ་མེད་བཟོ་རྒྱུའི་སྲིད་ཇུས་འཛིན་བཞིན་པར་ཐུགས་འཚབ།

བོད་མིའི་ངོ་བོ་རྩ་མེད་བཟོ་རྒྱུའི་རྒྱ་ནག་གི་སྲིད་ཇུས་ལ་རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་ཐུགས་འཚབ་གནང་བཞིན་པ་རེད།
དེ་ཡང་ཧིན་བོད་འབྲེལ་མཐུད་ལས་ཁང་གིས་དེ་རིང་གནས་ཚུལ་སྤེལ་དོན་ལྟར་ན། ཁ་ས་རྒྱ་གར་གྱི་རྒྱལ་ས་ལྡི་ལི་གསར་པའི་ནང་གི་Himachal Bhavanནང་Parliamentary Forum for Tibetཞེས་རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་མི་རྣམས་ལྷན་འཛོམས་གནང་ཡོད་པ་དང་། བོད་དོན་སྐོར་བཀའ་བསྡུར་གནང་སྐབས་དུས་རབས་༢༡་པ་འདིའི་ནང་ལ་ཡང་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་ཚབས་ཆེ་གཏོང་བཞིན་པ་དང་། བོད་མིའི་ངོ་བོའམ་རྣམ་པ་རྩ་མེད་བཟོ་རྒྱུའི་སྲིད་ཇུས་འཛིན་བཞིན་པར་ཐུགས་འཚབ་ཡོད་པའི་དགོངས་ཚུལ་བཏོན་གནང་ཡོད་འདུག
ལྷན་འཛོམས་སྐབས་རྒྱ་གར་གྱི་སྲིད་དོན་ཚོགས་པ་དྲུག་གི་འཐུས་མི་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག སྤྱི་འཐུས་ཀརྨ་ཡེ་ཤེས་ལགས། སྤྱི་འཐུས་ཨ་ཅ་རི་ཡ་ཡེ་ཤེས་ཕུན་ཚོགས་ལགས་ཀྱང་ལྷན་བཞུགས་གནང་འདུག  
ཐོག་མར་ལྷན་འཛོམས་འདི་སྐོང་ཚོགས་གནང་མཁན་Shanta Kumarམཆོག་ནས་ཚོགས་མི་རྣམས་ལ་དགའ་བསུའི་གསུང་བཤད་གནང་བ་དང་། དེ་ནས་མཛད་འཆར་གཞིར་བཟུང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་ད་ལྟའི་བོད་ནང་གི་གནས་སྟངས་གསུངས་དགོས་པའི་འབོད་སྐུལ་གནང་བར། ཚོགས་གཙོ་མཆོག་ནས་རྒྱ་ནག་གཞུང་གིས་བོད་མི་རིགས་ཀྱི་ངོ་བོ་རྩ་མེད་བཟོ་རྒྱུར་དམིགས་པའི་སྲིད་ཇུས་ལག་བསྟར་བྱེད་ཀྱི་ཡོད་སྐོར་སོགས་གནས་ཚུལ་སྙིང་བསྡུས་ཤིག་སྙན་སྒྲོན་གནང་འདུག
ལྷན་ཚོགས་འདི་ནི་BJPཚོགས་པའི་ཚོགས་མི་Shanta Kumarམཆོག་ནས་སྣེ་འཁྲིད་གནང་སྟེ་གྲོས་ཚོགས་འཐུས་མི་ལྕམ་Maneka Gandhiམཆོག་དང་། Bashista Narain Singh་མཆོག Ninong Eringམཆོག ལྕམ་Kavitaམཆོག Bhagat Singh Koshyariམཆོག Dr. Udit Raj་མཆོག ལྕམ་Kanak Lata Singhམཆོག Dr. Arun Kumarབཅས་ལྷན་བཞུགས་གནང་འདུག

གསར་འགོད་པ་སེང་གེ་རི་བསོད་ནམས་ལྷ་མོ།